Selebrasion iti kasangay, nagtungpal iti patay

MAGSINGAL, Ilocos Sur – Napan nakipagselebrar iti kasangay ngem ditoy metten a ginudas ti armado a tao ti biagna.

Daytoy ti napasamak ken ni Cornelio Rosario y Castro, 47, baro, ken residente iti Sitio Latao, Barangay Patong, ditoy nga ili idi dimmar-ay iti kasangay idi sardam ti Enero 4.

Segun iti report, napan nakikasangay ni Rosario iti balay ni Julie Ceria y Rillamas, 62, naasawaan, kalugaranda met laeng, ket bayat ti panaginomda ken ni Jonel Ceria, immasideg ti nakabonete a lalaki ket pinaputokanna iti sumagmamano a daras ti biktima a nagsagrapanna kadagiti sugat iti ulo ken bagina.

Nasugatan met ti makannigid nga abaga ni Julie Ceria nga adda iti asideg ti biktima.

Naitaray dagiti dua iti Magsingal District Hospital ngem indeklara ti doktor nga awanen ti biag ni Rosario. Naiyalis ni Julie Ceria iti Gabriela Silang General Hospital para iti naan-anay a pannakataming ti sugatna.

Kuna ti polis a Cal. 45 pistol ti naaramat iti pammapatay kas maibatay iti innem a kapsula, 2 a buli, ken maysa a bala a nasarakan iti crime scene.

Saan pay nga ammo ti motibo ti pammapatay.

Kabayatanna, naipaiman iti Opisina ti Provincial Prosecutor ti kaso a murder maikontra ken ni Ryan Rafanan y Aporongao, 31, residente iti Barangay IV, Vigan City gapu iti panangpaltogna ken ni Arnel Gascon y Bandico, 34, residente iti Barangay Capangpangan, Vigan City.

Maipalagip a pinaltogan ni Rafanan ni Gascon bayat ti panaggiinomda kas selebrasionda iti isasangbay ti baro a tawen.#