Selebrasion ti kasangay, nagtungpal iti trahedia

CAOAYAN, Ilocos Sur – Nagtungpal iti trahedia ti panagkasangay ti maysa nga estudiante gapu ta mismo a biag ti nagpasken ti nakeltay.

Nasarakan ti maysa a mangngalap a tumtumpaw iti kabaybayan a sakup ti Barangay Puro, Magsingal, Ilocos Sur ti bangkay ni Jadamae Llanes y Riotita, 15, estudiante iti Ilocos Sur National High School, ken residente iti Barangay Villamar, Caoayan, Ilocos Sur idi agarup alas 10:00 ti bigat ti Agosto 24 .

Segun iti report, nasalaw ni Larry Ramirez, 24, mangngalap ken residente iti Barangay Puro, Magsingal ti bangkay ni Llanes a tumtumpaw iti agarup dua a milia ti kaadayona iti kabaybayan ket inalawna sana intakdang iti barangayda.

Naipan ti bangkay ti biktima iti Saint Michael Funeral Homes para iti pannakaautopsiana.

Inreport met ni Analyn Tolentino y Bechaida, 43, naasawaan, ken residente iti Barangay Ayusan Norte, Vigan City, iti polis ti Caoayan a mapukpukaw ti anakna a ni Gerrylyn, 14, manipud pay idi malem ti Agosto 23 nga isusurotna iti panagkasangay ti kaklaseanna a taga-Caoayan.

Iti report manipud iti polis ditoy nga ili, naammuan ni Tolentino nga inawis ni Llanes dagiti kaklaseanna a pakairamanan ti anakna a ni Gerrylyn iti   3M’s Videoke Bar iti Barangay Fuerte, Caoayan ket nagraragsakda ditoy kas panangselebrar ni Llanes ti panagkasangayna idi agarup alas una ti malem ti Agosto 23.

Mapapati a napan nagdigos da Llanes, kaduana ni Tolentino ngem ginuyod ida ti koriente nga impatengnga iti baybay.

Iti pannakaisurat daytoy, di pay nabirokan ni Gerrylyn.#