Selpon, computer, natakaw iti pagtagilakuan

CANDON CITY – Sinerrek dagiti mannanakaw ti maysa a pagtagilakuan iti tiendaan publiko ditoy ket kinasakasda dagiti selpon, laptop a computer ken dadduma pay a pagtokaran ken ramramit.

Inreport ni Gundan Gumpa,  addaan naan-anay nga edad, ken temporario nga agnaed iti barangay San Juan ditoy, a sinerrek dagiti di pay nabigbig a mannanakaw ti tiendana a masarakan iti umuna a kadsaaran ti Candon City Public Market ket intarayda dagiti di pay ammo ti bilangda a cellphone nga addaan camera, mp4, laptop computer, DVD portable nga addaan monitor ken dadduma pay a high-tech nga accessories.

Mapattapatta nga agdagup iti P200,000 ti pateg dagiti natakaw.

Naammuan iti inisial nga inbestigasion ti polis a nakastrek dagiti suspek iti tienda babaen ti panangdadaelda iti kayo nga akinngato a paset daytoy.#