NANGRUGIN ti panangngilin dagiti Kristiano – Katoliko iti sangalubongan iti Semana Santa. Kas umili iti Pilipinas a pagilian dagiti kaaduan a Katoliko, sapay koma ta iti daytoy a Nasantuan a Lawas ket makaipaay iti naan-anay a gundaway kadagiti Pilipino a mamati ken ni Apo Jesucristo a mangamiris ken mangibiag ti kaipapanan ti pannakaparparigat, ipapatay ken panagungar ti timmao nga Anak ti Dios.
Sapay koma ta ti panangngilin ita Semana Santa, ken panglagip ti katan-okan a panagsakripisio ni Apo Jesus ket rubrobanna ti panagtalek dagiti tattao iti Dios tapno agtaklinda iti Apo ken maaddaanda iti tured, kired ken namnama a mangsango iti laklak-amenda a buteng ken rigat a pinarnuay ti Coronavirus disease 2019.
Mabigbig iti sangalubungan ti Pilipinas kas kangrunaan a Kristiano a nasion iti Asia, ken pagilian dagiti kaaduan a Kristiano – Katoliko. Mabigbig pay dagiti Pilipino gapu kadagiti naidumduma a wagas a panangngilin iti Semana Santa.
Sakbay ti pandemia, mabigbig dagiti Pilipino kadagiti nagduduma a wagas a panangngilinda ti Semana Santa. Kalaksidan kadagiti aktibidad iti Simbaan Katolika a paseten ti kultura ken tradision dagiti Pilipino kas dagiti Visita Iglesia, Station of the Cross, prusision ken dadduma pay a narelihiosuan a gannuat, mapagsidsiddaawan dagiti agpenpenitensia nangruna dagiti agpapailansa iti krus.
Uray mailabsing iti panursuro ti Pammati iti panangdangran iti bukod a bagi ta dayta ket maibilang a templo ti Espiritu Santo, nagadu dagiti Pilipino dagiti mangdangran iti bukodda a bagi kas mangipakita ti panagbabawi ken tarigagayda a mapakawan dagiti basolda.
No awan koma ti pandemia, ad-adda pay koma a naisangsangayan ti pannakangilin iti Pilipinas ita a Semana Santa ta ita a 2021 ti maika-500 a tawen ti pannakaitukit ti Kristianismo iti Pilipinas. Naangay ti umuna a Nasantuan a Misa idi Marso 31, 1521, Domingo Panagungar sadiay Limasawa Island, Southern Samar nga indauluan ni Padre Pedro de Valderrama, padi a kadua ni Ferdinand Magellan, ti Portuguese a nangidaulo kadagiti Kastila, ken nakadiskobre kadagiti isla ti Pilipinas.
Iti inaldaw a panagadu ti kaso ti Covid-19 iti Pilipinas, ket adu manen a pagallagadan dagiti nainget a maipatungpal nga ad-dda a mangparigat kadagiti Pilipino. Mapaidaman manen dagiti umili kadagiti naipakadawyanen nga ar-aramidenda no Semana Santa.
Sadiay Metro Manila ken kabangibangna a probinsia, a kaaduan dagiti kaso ti Covid-19, maipawil manen dagiti mass gatherings pakairamanan dagiti Misa. Uray iti Ilocos Sur ken dadduma a probinsia a ngimmato ti bilang dagiti kaso ti Covid-19, ket addan dagiti naipaulog a pagannurotan a mangikeddeng iti limitasion iti bilang dagiti makastrek kadagiti simbaan. Maipawil payen dagiti nakaugalian a religious activities.
Kas ti nagpasaran idi 2020 a kaaduanna ket saan a nakaruar dagiti umili kadagiti pagtaenganda ken pinalabasda laengen ti Semana Santa babaen iti panagdengneg iti radio wenno panagbuya iti telebision ken social media kadagiti aktibidad iti simbaan, maulit manen dayta a padas.
Iti panagtalinaed iti pagtaengan ita a Semana Santa, gundawayan koma dagiti Pilipino nga amirisen dagiti pasamak iti biagda ken padasenda a tukoden ti iparparipirip dagiti naidumduma a pagteng iti agdama a panawen.
Idi indeklarar ti World Health Organization idi agtapos ti Marso 2020 a maysan a pandemia ti Covid-19, impagarup dagiti sientista ken espesialista iti medisina a saan nga agpaut ti panagraira ti Covid-19 kas kadagiti nagkauna a klase ti Coronavirus a nagbutbutngan kadagiti naglabas a tawen kas ti SARS (Severe Acute Respiratory Symdrome) ken MERS (Middle East Respiratory Syndrome). Ngem nagbiddutda ta aginggana ita nga uray addan bakuna kontra Covid-19 ket agtultuloy ti panagadu dagiti maak-akaran.
Iti las-ud ti nasurok a makatawen ti pandemia nga agsagsagaba dagiti Pilipino iti nakaro a rigat, adu dagiti napukawan iti namnama ken nagsagaba iti nakaro a liday wenno depression a gapu ti nangkettelanda iti bukodda a biag. Immadu dagiti biktima ti panagpakamatay wenno panag-suicide.
Nagladingit a pagteng iti kaadu dagiti agpakpakamatay kabayatan ti pandemia ta kaaduanna kadakuada ket agkabannuag ken kapigpigsaanda. Adda dagiti ili, siudad ken probinsia nga ad-adu pay nga amang ti bilang dagiti nag-suicide ngem dagiti natay gapu iti Covid-19.
Ita a Semana Santa, para kadagiti marigrigat ket saanen a nasken ti panagayuno wenno panangliwatda a mangan ta nalabesen a bisin ti laklak-amenda. Para laengen dayta kadagiti babaknang ken aglaplapusanan a nasken a mangliwatda a mangan tapno mabisinanda ken malagipda ti rikna dagiti nagadu a Pilipino a mabisbisinan, ket mapanunotda a saranayen dagiti napanglaw a nabayagen a naapges dagiti tianda.
Para kadagiti managbasol, saanen a kasapulan ti pabuya a panagpenitensia kas ti panangsapsaplitda iti bagida wenno panagpailansada iti krus. Ti kapatgan ket ti napudno a panagbabawi ken panagbalbaliwda.
Sapay koma ta daytoy a Nasantuan a Lawas ket iturongna dagiti kaaduan a Pilipino nga agkamang iti Dios, agbabawi ken agbalbaliwda, ket surotenda dagiti panursuro nga imbati ni Apo Jesucristo a nagtutuok ken natay iti krus ken nagungar kalpasanna.
Sapay koma ta dayta a pammati ti pagubbogan ti inspirasion dagiti Pilipino – Kristiano man wenno saan – nga agiinnayat ken agsisinnaranay tapno maibaklayda ti nadagsen a krus ti Covid-19 agingga a dumteng ti Aldaw a Panagungar wenno pannakaparmek ti pandemia.