Seminar a mangpasayaat kadagiti serbisio, maangay

CITY OF SAN FERNANDO, LA UNION – Madama ti panagsanay iti Performance Measurement for Service Improvement (PMSI) and Personnel Capacity Enhancement Program (PCEP) II dagiti amin a departamento ken section offices ditoy siudad tapno maisagana dagiti programa ken proyekto a kas paset dagiti napagnunumuananda nga aramiden iti tawen 2013; panangadal ken panangatur kadagiti narugianen a naaramidan ken dagiti dadduma a sirmata; kasta met iti panangimutektek iti performance audit no kasano a mapapartak iti pannakaidanon dagiti serbisio, panangtakuat kadagiti pagpigsaan ken pagkapsutan iti tunggal departamento nga addaan pangrukodan iti matrabahuan ken panangammo kadagiti pamay-an ken pamuspusan tapno rummuar iti kapintasan a kababalin dagiti empleado, segun iti plano ti gobierno daytoy a siudad a pagturongan para iti tawen  2016.

Amin dagiti duapulo a departamento ken opisina ket mabingay iti 10 a grupo kas maibatay iti agdama a development framework ti siudad ket  dagitoy dagiti sumaruno nga iskediul ti pa-seminar:  Agosto 13-14 – General Services, Social Welfare Office, Day Care, Barangay-based workers iti Agosto 15-16 ken City Health Office , kaduna dagiti  Barangay Health Workers inton Agosto 24-25.

Sakbay daytoy, immuna a nalpasen a nagseminar dagiti opisina ti Treasury, Budget, Accounting, Assessor’s,  Permits and Licensing and Planning & Development; Office of the City Mayor ken dagiti naikappeng a unitna, legislative department, City Administration, Engineering Office; Civil Registry, Legal, Agriculture and Environment ken ti Traffic Operations.

Maangay dagitoy a workshop tapno maikkan iti gundaway dagiti empleado iti siudad a sistematiko a mangpasayaat dagiti kangrunaan a serbisio ket akmenda dagiti responsibilidad ken trabaho babaen iti panangipangrunada iti panagtrabaho ken panangidanon iti serbisio, segun iti sagudayen ti Integrated Management System (IMS, Performance Governance System (PGS), productivity and quality assurance plans ken Citizen’s Charter (CC) requirements.

Maaramid dagiti aktibidad  babaen ti panangilungalong ti Office of the Human Resource and Management Section, iti pannakikoordinasionna iti City Planning and Development Office, MS Committee (ISO) ken iti Office for Strategy Management (OSM).

Ni Ptr. Brennus Paragas, MSGC Member, ti nagtakem a facilitator iti seminar.#