Seminar iti panangisuro iti literatura, insayangkat ti wikang panrehion

LAOAG CITY – Babaen ti panangilungalong ni Dr. Francisca Nicolas, Director ti Wikang Panrehion iti Rehion I, naangay idi Marso 10 ti Seminar sa Pagtuturo ng Panitikan wenno panangisuro mainaig iti literature iti Mariano Marcos State University College of Teacher Education and Extention iti siudad ti Laoag.

Inatenderan daytoy dagiti napili a mamaestra ken estudiante kadagiti pagadalan elementaria, sekondaria ken kolehio manipud Ilocos Norte ken Ilocos Sur.

Karaman kadagiti nanglektiur ti mannaniw nga Ilocano a ni Daniel Nisperos a nangibinglay iti padasna iti panagsurat iti daniw, ni Efren Inocencio a nalaing nga agsurat iti humorous short story ken ti nobelista ken piksionista a ni Joel manuel a nangisuro iti ramen ti napintas a sarita nga Iluko ken no kasano a maaramat dagitoy iti panangisuro iti literatura.

Naisayangkat ti nadakamat a seminar tapno masaganaan no kas pangarigan maituloy ti plano a Mother Language Education wenno panangisuro usar ti nakayanakan a pagsasao ken kasta metten nga ammuen no ania dagiti epekto daytoy iti panagsursuro dagiti ubbing.#