Senior citizens dida kayat adda maipasdek balay taripato iti Vigan City

VIGAN CITY- – Saan a pabor dagiti senior citizens ditoy siudad iti pannakaipasdek iti maysa a balay a pagtaraknan kadagiti lallakay ken babbaket, daytoy ti limtuad iti konsultation nga insayangkat ti city government, segun iti mayor ditoy.

Kinuna ni Mayor Eva Marie S. Medina a limtuad iti series of consultations nga inangay ti gobierno ti siudad, saan a kayat dagiti senior citizens ti pannakaipasdek ti home for the aged ditoy siudad agsipud ta marakrak ti close family ties.

“Kaykayat dagiti taga-Vigan nga adda iti sidongda dagiti kapamiliada,” kinuna ni Medina bayat ti interbio kenkuana ni Peter Rebunal a naipatangatang iti DWRS itay nabiit.

“Apay pay laeng a kasapulantayo ti balay taripato iti siudad ti Vigan idinto a mga 30-45 minutes laeng ti kaadayo dagiti balay taripato ti probinsia?” kinuna pay ti mayora.

Adda impasdek ti gobierno probinsial a balay taripato a pakatartaraknan dagiti lallakay ken babbaket nga agmaymaysan ken awanen ti mangkita kadakuada a pamiliada wenno kabagianda iti Magsingal, Ilocos Sur a masarakan iti likud a mismo ti district hospital daytoy nga ili.

Sabali pay ti balay taripato a naipasdek iti Cabugao, Ilocos Sur babaen ti arrangement ti gobierno probinsial iti maysa a pribado nga ospital.

“Nadaras ti agipatakder iti balay taripato. Adda la masapulmo a P5 milion, makaipatakderkan,” kinuna ni Medina.

Ngem inyunay-unay ti mayora a no “fully equipped ken fully operational ti balay taripato,  ti maintenance ken operating expenses ti nadagsen agsipud ta masapul ti visiting doctors, nurses, caregivers ken dagiti dianitor.

Kinunana pay a  “saan a necessity” ti balay taripato ditoy siudad agsipud iti kaadda dagiti balay taripato iti Magsingal ken iti Cabugao, Ilocos Sur.#