Sensilio, natakaw iti pagtagilakuan

STA. CRUZ, Ilocos Sur – Karigat ti biag ket uray sensilio a nabati iti pagtagilakuan, inanusanen daytoy suspek a kinurimes. Ti makadakes, nasukalan iti akto a panagtakawna a puon ti nakatiliwanna.

Nagresponde a dagus dagiti polis idi nakaawatda iti report nga adda mapaspasamak a panagtakaw iti Lumen and Dolor Minimart a masarakan iti tiendaan publiko ditoy nga ili idi agarup 10:30 ti rabii ti Hulio 5 ket kinordonanda ti lugar sada sinawar ti posible a naglemmengan ti suspek.

Nasukalan dagiti polis ni Albert Valdez y Flores, 31, baro, ken residente iti Suyo, Ilocos Sur nga aglemlemmeng iti stockroom ti nasao a pasdek.

Nasukainan pay dagiti polis dagiti sensilio iti nadumaduma a denominasion iti ikut ni Valdez a mapapati a tinakawna iti tienda.

Naipan ti suspek iti police station para iti maiyataday a disposision ken pannakaisagana ti maikaso kenkuana.#