Sentenario ti pannakaipasdek ti monument ni Fr. Jose Burgos, maselebraran

VIGAN CITY – Selebraran ti gobierno ti siudad ditoy ti maika-100 a tawen ti pannakaipatakder ti monumento kas pammadayaw iti bannuar a padi a nakaipanaganan ti plasa iti abagatan ti Katedral ni San Pablo ditoy.

Kinuna ni Konsehal Everin Molina a rumbeng laeng a maselebraran ti centennial year ti pannakaipatakder ti monumento gapu iti kontribusion ni Fr. Jose Burgos iti historia ti pagilian.

Kinuna ti konsehal nga agkurang ti awareness dagiti umili maipanggep iti kontribusion ni Fr. Burgos iti historia ket indagadagna ti pannakabisita ti monumento iti Plaza Burgos tapno basaenda ti naikur-it iti monumento maipapan ken ni Fr. Burgos a naisurat iti tallo a lengguahe, Espaniol, English ken Iloko.

Madakamat a maysa ni Fr. Burgos kadagiti tallo a martyr-priest a natay babaen ti garrote idi Pebrero 17, 1872 gapu iti panangilungalongna kadagiti kalintegan dagiti Filipino a papadi (Basaen ti salaysay iti panid 3- Ed.).

Naipatakder ti monumento iti Plaza Burgos kas pammadayaw iti bannuar a padi idi Pebrero 17, 1910.

Kinuna ni Molina a ni Burgos koma ti agbalin a pagtaudan ti inspirasion saan laeng dagiti Ilokano no di pay amin a Filipino para iti panagmaymaysa ti pagilian.

Nadumaduma nga aktibidad ti insagana ti city government inton Pebrero 17 para iti centennial celebration ti pannakaipasdek ti monumento a kas iti sumaganad: 6:00 a.m. – misa iti St. Paul’s Cathedral; 8:00 a.m. parada a pakipartisiparan dagiti nadumaduma a pagadalan ditoy Vigan City; chalk painting competition; pannakalukat ti exhibit iti Museo ni San Pablo a naisentro ken ni Fr. Burgos; pannakailukat met ti Burgos Museum; ken maysa a cultural presentation nga ipabuya dagiti nadumaduma a pagadalan iti rabii.

Kinuna ni Molina nga addanto pay dagiti dadduma nga aktibidad agsipud ta napagnunummuanan a year-long ti selebrasion.#