SAN ESTEBAN, Ilocos Sur – Rinugianen dagiti agtuturay ken empleado daytoy nga ili ti panangselebrarda iti sentenario daytoy nga ili babaen ti panagaruatda iti kadaanan a kawes ni Ilokano bayat ti naisayangkat a flag ceremony itay nabiit.
Indauluan ni Mayor Chester Elaydo dagiti lallaki nga opisial ken empleado ti ili a nagaruat iti abel iloko idinto a maria clara met kadagiti babbai.
Kinuna pay ti mayor nga adun a kakailianda iti ballasiw-taaw ti nangipanamnama nga aggawidda iti San Esteban iti panangselebrarda iti sentenario ti pannakaipasdekna nga ili.
Rambakan daytoy nga ili ti piestana iti Disiembre 26.#