Shellfish manipud 2 ili ti Pangasinan, addaan red tide toxins

PANGASINAN – Nagballaag ti Bureau of Fisheries and Aquatic Resources (BFAR) iti publiko a dida agsida iti shellfish manipud iti Anda ken Bolinao iti Pangasinan gapu ta addaan dagitoy iti toxin.

Impakdaar daytoy ti BFAR kalpasan a naduktalan nga adda red tide iti kadanuman dagitoy dua nga ili ket kontaminado dagiti shellfish a maala ditoy.

Nupay kasta, imbaga ti BFAR a saan a peligro ti agsida iti ikan, pusit, pasayan ken arimbukeng no la ketdi presko ken naugasan dagitoy ken naikkat ti asang ken nagunegda sakbay ti pannakalutoda.

Dagiti makasida kadagiti shellfish nga addaan iti red tide toxins ket makarikna iti panagbibineg iti bibig ken ngiwatda, sa iti ramay, ima ken dapanda, ken agpakarigat nga umanges nga agtungpal iti pannakaparalisa ken ipapatay.#