Shooting spree ti napasamak iti tiendaan publiko ti Sta. Lucia: NPA/ACC

VIGAN CITY – Shooting spree ti napasamak idi Abril 19 iti tiendaan publiko ti Sta. Lucia, Ilocos Sur a nakainbolbaran dagiti kameng ti Phil. Army ken dagiti polis, segun iti maysa a grupo ti New People’s Army.

Iti surat nga impatulod ti Alfredo Cesar Command iti DWRS ditoy a naipatangatang iti Barangay Commando Brigada a programa ni Jun Ramos, kinunana a  maysa a shooting spree ti napasamak iti maysa a videoke bar a masarakan iti tiendaan publiko ti Sta. Lucia  a nakainbolbaran dagiti tropa ti 77th IB, Phil. Army ken dagiti polis a pakaibilangan ni Police Chief Inspector Joseph Cabreros ken ti police investigator a ni SPO3 Joffrey Palacio ket “segun iti report a naawat ti NPA/ACC, pilit a kalkaluban dagiti adda iti Army, ti PNP ken uray ti lokal a gobierno ti pasamak.”

“… Iti oras ti alas 11:30 ti rabii (Abril 19, 2008), pinaltopaltogan ti saan a bumaba a lima a nabarbartek a soldado da SP03 Joffrey Palacio, inbestigador ti municipal police station ti Sta. Lucia ken ni Melchor Angala, maysa a sibilian a taga-Ronda, Sta. Lucia,” kinuna ti nasao a surat.

Segun iti ACC, naginom ti lima a soldado a nakasibilian a nakabase iti Catayagan, Sta. Lucia iti paginuman a kukua ni Bobby Cortez ket idi nabartekdan, nagbalindan a nariri ken binastosda dagiti babbai isu a nagpatulong ti maseknan iti MPS Sta. Lucia.

Nagresponde da Cabreros ken ni Palacio ket sinitarda dagiti soldado ken pinapanawda iti bar, kinuna ti surat.

Segun iti surat, “agbabara dagiti soldado a pimmanaw ket gapu iti kinamalalakida, nagsublida a naka-full battle gear, nagayabda pay kadagiti kakaduada iti detachment iti Catayagan. Tinungpa ken kinatosanda ni Chief Cabreros ket idi naganawa ni Palacio, dagus a tinatekda iti armalite.”

“Nakigtot met ni sibilian nga Angala, isu a timmaray ket pinaltoganda met isuna,” kuna pay ti surat.

“Kabigatanna, nag-pack-up ti tropa ti 77th IB iti Catayagan, nagdardarasda a pimmanaw tapno panawanda ti krimen nga inaramidda,” innayon ti surat.

Ngem kinuna ni Police Senior Supt. Virgilio Fabros a saan a kasta ti napasamak kas maibatay iti inisial a report manipud iti nabuangay a Task Force Palacio. (Basaen ti kaabayna a damag. Ed)

Kinuna ni Fabros a propaganda laeng ti Alfredo Cesar Command ti suratda ket kayatda a pagparangen a sibubukel nga institusion manen ti nainbolbar iti pasamak.

Ngem temporario a rinelibo ni Fabros ni Cabreros gapu iti mapapati a dina panangireport  amin a napasamak iti ipapanda iti nasao a videoke bar a nakasibilian ken iti panagpaputokna nga awan ti warninganna.

“…Manipud idi napasamak daytoy, awan ti husto a report a naipakdaar iti publiko, mismo a kapamilia ti natay ket di pay nalawag kadakuada ti napasamak” idinto nga “uray report dagiti police stations ket agsasabali.”

Ngem kinuna ni Fabros a saan a pudno nga “adda gandat a panangkalub wenno pananglibak iti pudno a napasamak” no di “mapantayo iti husto a proseso tapno saantayo nga agtartaranta ket dagiti laeng agsungbat iti napasamak a krimen ti rumbeng nga agsungbat a di ket iraman ti sibubukel nga institusion”.

“…no adda kamali, saan nga ilibak ti kinapudno. Madillaw ken ilinteg ti panagkamali…” kinuna ti surat idinto nga inyunay-unayna a “rumbeng laeng a mairuar ti kinapudno ti napasamak a pammapatay… madusa dagiti soldados a rimmaut ken nangpatay kadagiti dua a biktima tapno maipaayanda iti hustisia ken dagiti pamilia dagiti naulila.”

“Definitely, pagsungbatentayo asino man iti akin-aramid,” kinuna ni Fabros.#