Siak, ni Maestra Ruby

Imbiit ni Rilo A. Bedo

KASLA teleserye ti biagko. Ngem dina kayat a sawen a paboritok ti agbuya iti teleserye. Sagpaminsan laeng, aglalo no nawayaak iti trabahok. No apay nga ammok ti teleserye iti agdama, gapu kadagiti annakko a pannakaarkos ti ngiwatda no agsasaritada. Ibuntok payen dagiti kamaestraak nga adik iti teleserye. Pakaung-ungtanda ken ni prinsipalmi ta maibayagda no dadduma a sumrek kadagiti klaseda no maimasandan ti agiistoria a pakasemsemak no dadduma.

Binuyayo la ngaruden, pagsasaritaanyo pay laeng!” kinunak iti naminsan kadagiti kamaestraak. “Kaskay’ la ubbing idi panawentayo nga apagruar pay laeng iti nakibuyaanna a balay, awanen ti paabak nga agistoria.”

Makapaubing ngarud iti rikna, sika met Madam Ruby!” inlibbi ni Ma’am Dianne a sumagpaten a kuarentana nga ala-Jessie Mendiola pay lat’ pammagina. Uppaten ti anakda ken ni Ronnie a lakayna a dati nga estudiantena idi damona ti agisuro. In-inauna ni lakayna iti dua a tawen ta maysa idi daytoy kadagiti Balik-Aral.

Masapulmo kad’ pay ti agpaubing iti rikna ket siaasawaka metten, ma’am?” kinunak idi. Kastakami nga agkakadua, “ma’am” latta ti innawagmi— awan ti baket ken ubing, ken awan ti nangatngato— tapno awan ti maalumiim; nasingsinged ti tunggal maysa.

Padasem met koma ngamin ti aguper nga agbuya kadagiti teleserye, ma’am,” insuhestion ni Ma’am Anna Liza a marpekan san’ ta di metten agbalaw.

Pakpakayang!” indilatko. “Pagibusak la ti oras, ma’am! Isu la nga isu ti taray dagita a mabuya. Kanayon nga adda love triangle a rekadona.”

Pangpaimas dayta kadagiti pasamak, ma’am,” inrason ni Ma’am Ana.

Ti diyo pannakauma kadagita,” kinunak latta met.

Kunam la ti kasta ta saan a namaris ti lovelife-mo, mama,” inkalawikiw a timek ni Sir Dolpho—a Ma’am Sophie ti kayatna a pangawag kenkuana.

Nasnasak la koma ti nagpuskol a foundation iti rupana. Ngem sabagay, pudno ti kinunana. Kasla ngamin silulukat a libro ti biag ti tunggal maysa kadakami.

Dimmakkelak iti nanumo a pamilia a makitaltalon laeng ti pagbibiagna. Awanan iti bukod a daga a sukayen wenno pasukay.

Innemkami nga agkakabsat. Kasta unay a rigat ti nagpasaranmi nga agkakaka gapu iti kinabaribar ti panunot ti amami.

Nangruna unay a naparigatan daydi nanang ta malaksid nga isu ti mangbibiag kadakami, isu pay ti nakakaammo a nangay-aywan kadakami nga agkakabsat. Makalak-amto pay laeng iti disnog, tungpa, ken kugtar no mapalaluan ni tatang ti agbartek.

Matdakami la idi nga umal-alikeskes nga agkakabsat.

Ket iti naganus a nakemko, naimula ti pananggurak kadagiti lallaki. Idi agbasaakon, ad-adaywak dagiti kaklasek a lallaki. Panagkitak lattan, isuda dagiti parsua nga agranggas. Agingga a naikarik iti bagik a diakto pulos mangasawa.

Idi addaakon iti Maikanem, isu metten ti panangrugi dagiti agipatpatayab iti riknada. Ngem diak inkaskaso ida. Nagpatinggaak lattan iti nalimed a panagtamed iti maysa kadakuada—pudno dayta, maymaysa laeng ti namagkintayeg ti riknak idi. Ngem pulos a diak inkankano. Kagurak dagiti lallaki… period!

Iti panaghayskulko, gapu ta adda met kupikopko a pusaksak (saan itan ta ala-Juana Change-nak metten), ad-adu manen dagiti nagipalapal iti ayatda. Inusarda payen dagiti programa idi iti radio tapno maiparipiripda ti “an-anek-eken” ti riknada. Kuidawda laeng ta di pulos naglukat ti pusok a bimmaton iti panagkunak gapu iti kinaulpit ni tatang.

Saanta a sabsabali, brod,” kunaek laeng idi kadagiti mangiparikna iti gagemda. “Pareho tayo ng hinahanap. No agpilitka, disnogek ‘ta rupam!”

Ti turedko idi nga agkuna kadagita a balikas. Ngem sabagay, agpayso a kabaelak ti dumisnog aglalo no malagipko iti kapkapay-an ni nanang iti ima ni tatang.

Gapu iti rigat ti panagbiagmi, inkagumaak ti nagadal. Nagtalawak iti balaymi idi nalpaskon ti hayskul. Nakipaggianak kadagiti tattao sadial ili. Inan-anusak ti ulpit dagiti dadduma a nagnaedak ayatko laeng ti makaturpos ken mayadayo iti sidong ti barrairong nga amami. Ngem iti unegko, maasianak la unay ken ni nanang. Naimbag ketdi ta natibker daytoy. Agingga’t mabalin, dina kayat nga ipakita kadakami a marigrigatan. Kasla ‘tay superwoman a kabaelanna ti amin.

Iti pasnekko a nagbasa, to cut the story short a kunada, naileppasko daytoy. Nga awan pulos ti gayyem wenno na-boyfriend-ko. Gagayyem a babbai, a, isu!

Pagyamanak iti dakkel iti Dios ta naipasak a dagus ti licensure exam.

Iti pannakastrekko a mangisuro, nagtugmok ti dalanmi iti daydi surdo a kaadalak iti elementaria. Naipalladaw gayam iti kabangibangmi nga ili a nakaipuruakak a mangisuro. Innala ti ulitegna a mangsukay kadagiti talonda.

Diak ninamnama ti panagpudnona. Inatipak a dagus. Imbagak ti karik iti bagik a diakto mangasawa ta kayatko nga ipaayan ni nanang ken dagiti kakabsatko iti nam-ay. Managsakit idin ni tatang gapu iti awan sardayna nga aginom iti nasanger.

Ngem ti loko a kaadalak ta dinadaelna ti karik iti bagik. Iti naminsan nga isasarungkarko kada nanang, simmurot ketdin. Kinapatangna da tatang ken nanang.

Kayatko nga ikallaysa ni Ruby, tata, nana,” kinunana a situtured.

Kinitanak ni tatang a nupay ineppesen ti arak ti bagina iti apagsurok a sisenta a tawenna, adda pay laeng bileg ti perrengna. Isuna laeng ta saanen a kas idi ti kinauyongna. Madlawna ngaminen a pagrakrakayaenen ti arak ti bagina.

Adda ken ni Ruby dayta, anakko,” kinuna ni nanang. “No nagkinnaawatankayon, paspasurotkami laengen.”

Diak ammo ta nagalutan ketdi idin ti dilak. Saanak a nakatimek. Ket napuotak laengen ti bagik a di nakatungpal ti karina iti bagina.

Ta kasano pay koma nga agtukiadak ket adda met panag-chrush-ko iti nagbalin nga asawak uray idi addakami pay laeng iti elementaria.

Tallo ti nagbalin nga annakmi ken ni Tering wenno Eleuterio—dua a lallaki ken maysa a babai.

Idiay balay, siak ti masurot. No agtukiad ti asawak, pasanguak iti armalayt a ngiwatko.

Ketdi, saankami nga agap-apa. Pagyamanak ta nagbalin a silent type ti asawak.

Dagiti met annakmi, linteg ti amin a saok kadakuada. Isu a natudioda met. Ngem ar-aramidek laeng ti kasdiay tapno agnakemda ket magun-odda ti arapaapda iti biag.

Natabbaaawak ti asawak iti naminsan a nalipatanna a sinibugan dagiti kayanga a masetasko ta naglaylay dagitoy. Saoak a sao.

Tatang, inton agasawakami ken ni manong,” kinuna ti maikadua nga anakmi, nga addan iti Maikanem, idi sangsanguenmin ti pangngaldaw, “daytayto saan a kas ken ni nanang.”

Imbes nga agungetak, naikulengak. Kunak idi iti bagik, diak mangasawa (aglalo no kas ken ni tatang). Ita, dagitoy annakmi…

ISU a medio kinissayakon ti kinauyongko

No kunaen dagiti kakaduak a mannursuro a saan a namaris ti lovelife-ko, nagbiddutda. Kaniak, isu ti kamarisan. Ta saan nga scripted kas kadagiti buybuyaenda a teleserye.…#