Sibubukel a SB ti La Trinidad, nasuspenso iti 90 aldaw

LA TRINIDAD, Benguet – Sinuspenso ti maysa a korte ditoy  dagiti kameng ti sibubukel a sangguniang bayan ditoy gapu iti panaglabsingda iti anti-graft practices law nga impila ti maysa nga agiwarwarnak nga indeklara ti konseho a persona non grata idi Disiembre 21 2010.

Sinuspenso ni Judge Danilo Camacho ti Regional Trial Court Branch 62 ditoy iti 90 nga aldaw dagiti siam a konsehal a pakaibilangan da Konsehal Jim Botiwey, Roderick Awingan, Francis Lee, Henry Kipas, Horacio Ramos, Von Ryan Tauli, Arthur Shontogan, Estrella Adeban ken Robert Namoro ken ni Vice Mayor Romeo Salda gapu iti panaglabsingda iti Section 3 ti RA 3019 wenno anti-graft practices law kas impila ni Jimmy Laking, ti agiwarwarnak nga indeklara ti konseho a persona non grata idi Disiembre 10, 2010.

Maipalagip a nangipasa ti sibubukel a konseho iti maysa a resolusion idi Disiembre 10, 2010 a nangideklaraanda ken ni Laking a persona non grata gapu kadagiti mapapati a “biddut a bambanag nga insursuratna a saan a naibatay iti intent ken pinal a desision daytoy a konseho.”

Gapu itoy a deklarasion ti konseho, nangipila ti mediaman ti kaso nga anti-graft practices kontra iti sibubukel a sangguniang bayan.

Naipublikar pay idi Enero 30, 2011 nga isyo ti Baguio Midland Courier ti kopia ti nasao a resolusion a binayadan ti opisina ti sangguniang bayan ti La Trinidad.

Tapno saan a mapaidaman dagiti umili iti naannayas a serbisio iti munisipio, pinagkatlo ni Camacho ti grupo dagiti masuspenso nga opisial: group 1 da Botiwey, Awingan ken Lee; group 2 da Kipas, Ramos ken Tauli, ken group 3 da Salda, Shontogan, Adeban ken Namoro.#