Footer

Sibubukel nga Abra, sumagmamano nga ili iti I. Sur, awan ti korienteda idi Enero 5

BANGUED, Abra – Inlawlawag ti maysa nga opisial ti National Grid Corporation of the Philippines (NGCP)a nagawan ti koriente iti sibubukel nga Abra ken dadduma nga ili iti Ilocos Sur gapu iti tinawen a preventive maintenance ken testing dagiti power transformers iti San Esteban, Ilocos Sur.

Nagawan ti koriente idi Enero 5 iti sibubukel a probinsia ti Abra ken dagiti ili ti Ilocos Sur a pakairamanan ti Galimuyod, Alilem, Banayoyo, Candon, Del Pilar, San Esteban, Sta. Cruz, Sta. Lucia, Santiago, Salcedo, Suyo, Tagudin, Narvacan, Santa, Sta. Maria, Burgos, San Emilio, Nagbukel ken Lidlidda.

Kinuna ni Lilibeth P. Gaydowen, NGCP North Luzon corporate communication and public affairs officer, a nagsubli met la ti koriente kalpasan a nalpas ti trabahona ket awan pakainaiganna iti panagawan ti koriente iti Abra idi napan a bulan.

Pinuted ti Aboitiz Power Renewables Inc. (APRI) ti suplay a koriente ti Abra Electric Cooperative idi  Disiembre 10 gapu iti panaglibtaw ti Abreco a nagbayad iti utangna iti nasao a nasao a pribado a suplayer.

Nupay kasta, insubli met la ti APRI ti koriente kalpasan nga inisial a nagbayad ti Abreco iti P4.9 million.#