Iti
itatabuno ti aganay 50 nga agmulmula iti kamatis iti sangguniang
panlalawigan itay Marso 5, nadismayada agsipud iti di panagparang ti
mangimaton iti Tomato Paste Plant tapno ilawlawagna no apay a saan
met laengen a mabayadan dagiti kamatis nga apitda idi pay la
kanikadua a tawen.
Linagidaw ti maysa a mannalon manipud Narvacan a napintas ti kalidad ti kamatisda a ginatang ti planta ket no apay nga agingga ita, saanda met laengen a mabayadan.
Kinuna ni Roberto Fiesta, dadaulo dagiti mannalon iti Sinait, nga awanen ti igatangda pay ti kanenda ket indagadagna a no saanen nga agkurri ti planta, maisubli koma kadakuada ti capital build-up yantangay nagtaud met la daytoy kadakuada.
Sagudayen ti CBU a maikkat ti 10 sentabos tunggal kilo ti kamatis nga ideliber dagiti mannalon a maurnong tapno mapagbalinda a makipagtagikua iti planta.
Idi Pebrero 27, personal a nagpatulong dagiti agmulmula iti kamatis manipud iti Sinait, Ilocos Sur iti sangguniang panlalawigan tapno mabayadan ti apitda idi pay la 2006-2007 a panagkakamatis.
Segun ken ni Fiesta, 30 porsiente pay laeng ti nabayadan a kamatisda a ginatang ti Tomato Paste Plant ket nasurok a P259,000.00 pay ti singirenda a taga-Nagbalioartian, Sinait, Ilocos Sur iti nasao a planta.
Kinuna ti dadaulo dagiti mannalon iti Sinait nga adda pay dagiti saan a nabayadan ti kamatisda a mannalon kadagiti kabangibangda a barangay.
Idi koma Marso 5 ti panagpapatang dagiti mannalon ken ti mangimatmaton iti Tomato Paste Plant babaen ti initiatibo ti sangguniang panlalawigan tapno masolbar daytoy a problema ngem iti daytoy nga aldaw, awan ti nagparang a pannakabagi ti planta idinto a nasurok a 50 dagiti mannalon ti dimmar-ay iti dialogo.
Nupay kasta, sinango ida ni Vice Governor Jeremias “Jerry” Singson ket ditoy a naammuanna a sumurok-kumurang a P8 milion ti utang ti planta kadagiti mannalon, saan laeng a ditoy probinsia no di pay iti Ilocos Norte.
Inlawlawag ni Daniel Yadao, duty supervisor ti Tomato Paste Plant iti Paoay ken Batac, Ilocos Norte nga iggemna ti 18 a kooperatiba a nagkamengan ti 1,000 nga agmulmula iti kamatis ket P5 milion ti utang ti planta kadagiti mannalon iti Ilocos Norte.
Sumurok-kumurang met a P3 milion ti utang ti planta kadagiti agmulmula iti kamatis iti Ilocos Sur.
Naammuan pay ti bise gobernador a di naited ti tallo bulan a sueldo dagiti empleado ti nasao a planta, kasta met a saanda pay a naawat ti bonusda.
Segun pay dagiti empleado, naduktalanda a saan a nabaybayadan ti premiumda iti Philhealth Insurance, SSS ken Pag-ibig idinto a binulan met a maik-ikkatanda tunggal agsueldoda.
Kinuna ni Bokala Chuchi Purisima, chairman ti committee on finance, a kasapulan a kitaenda a nalaing ti nasao a parikut tapno saan a maibabain ti gobierno probinsial no ibaklayna amin a bayadan dagiti utang ti planta idinto a pribado daytoy.
Napagtitinongan a maidatag amin dagitoy iti sumaruno a dialogo iti nagbaetan dagiti mannalon ken ti mangimatmaton iti Tomato Paste Plant. Nagboluntario ni Bokal Robert Tudayan kas chairman iti committee on agriculture a mangkontak ken Madeline Arce, manager ti planta, tapno addanto a presente iti dialogo tapno maminpinsan a masolbar daytoy a problema dagiti mannalon. (Nemia Icari )