SIDEBAR: Bumasbassit ti produksion ti tabako iti Ilocos Sur

VIGAN CITY – Break-even laeng dagiti agmulmula iti tabako iti maapitda gapu iti dakkel a magasto iti produksion idinto a nababa ti panaggatang dagiti traders.

Maigapu iti daytoy, adun dagiti naupay nga agmula iti tabako a nakaigapuan iti  ibabassit ti produksion. Idi 2000, 19 milion kilos ti produksion ti tabako iti probinsia ngem nagpababa iti napalabas a lima a tawen agingga iti 12 milion kilos laengen.

Agdagup iti 6,000 ektaria ti namulaan idi 2000 ngem iti daytoy a tawen, nakurangen a 2,000 ektaria ti namulaan iti tabako.

Iti umuna a distrito, lima laengen nga ili ti regular nga agmulmula:  ti Sinait, Cabugao, San Juan, Magsingal ken Sto. Domingo. 

Iti maikadua a distrito aggapu ti produksion ti tabako iti Galimuyod, Salcedo, Sigay, Del Pilar, Candon City, Tagudin, Sta Cruz, Sta.Lucia, Banayoyo, San Emilio, Sta.Maria, Burgos, San Esteban, Santiago, Narvacan, Nagbukel, Lidlidda ken Suyo.

Segun iti data manipud iti National Tobacco Administration, bumasbassit dagiti mamulaan iti segundo distrito manipud 2001:

2000-2001-10,315.03 hectares; 2002 – 8,927.99 ha.; 2003 – 7,927.69 ha.; 2004 – 6,306.57 ha.; 2005 –  5,241.47 ha;  ngimmato iti tawen 2006- 6,540.27 ha.; ken iti 2007- 6,996.64 ha.

Napagnunumuan iti tobacco summit a maingato iti 25% manipud iti ceiling price ti tabacco.

    Class             Present  Floor Price        Projected Floor Price

    AA                     51                                    73.50

    A                       49.50                               72

    B                       47.50                               70

    C                       45.50                               68

    D                       40.50                               63

    E                        32.50                               62

    F1                      35.50                               56

    F2                      32.50                               55

    Reject                 13.50                               34

 Dagiti nadakamat a presio ti ipresentarto dagiti umatendar iti tripartite meeting. Uppat a farmer leaders ken representative ti napili iti kada ili nga agmulmula iti tabako. Bayabayento  ida ti gobernador ken dagiti dua a diputado tapno mailaban dagitoy a presio kadagiti tobacco buyers.

 Idi 1992, pinirmaan ni nag-Presidente Corazon Aquino ti R.A. 7171 wenno ti Tobacco Excise Tax  a pinutar ni Diputado (idi) Luis “Chavit” Singson. Sagudayen ti linteg ti pannakaited ti 15% manipud iti excise tax dagiti mapartuat a sigarilio a pagbibingayan  dagiti tobacco producing provinces a pakairamanan ti Ilocos Norte, Ilocos Sur, La Union ken Pangasinan.

Pitopulo porsiente iti produksion ti tabako iti Rehion I ti agtataud iti Ilocos Sur. No bumassit ti produksion ti tabako, bumassit met ti bingay dagiti uppat a probinsia iti R.A.7171.#