SIDEBAR: Kalib-in ni naglibas a balud, adda amakna pannakaisublina iti provincial jail

VIGAN CITY – Adda amak ti kalib-in ti naglibas a balud iti pannakaisubli daytoy iti provincial jail kalpasan ti isusukona idi malem ti Hulio 31 iti baet ti pammatalged ti gobernador iti seguridadna.

Naipresenta ken ni Gov. Ryan Singson ken kamkameng ti media iti daytoy nga aldaw ni Rodrigo Abiang, 40, mapapati a lider ti gun for hire group nga agdakdakiwas iti Ilocos Sur, Ilocos Norte, Abra, ken La Union, babaen kada Provincial Director Senior Supt. Nestor Eswagen Felix, OIC; operatiba ti Provincial Intelligence Branch (PIB) nga indauluan ni Supt. Edwin Col-long Balles, ken PAIDSOTG nga indauluan ni Chief Inspector Sosimo Raquepo Racho, action officer.

Kalpasan ti presentasion iti provincial capitol, nainget ti pannakaguardia ni Abiang ken nakaposas nga impanda iti kabarbaro a provincial jail sadiay Barangay Taleb, Bantay, Ilocos Sur.

Ngem kinuna ni Sheryl Marquez, live-in partner ni Abiang, a pagamkanna ti mabalin a dakes a mapasamak iti kalib-inna iti pannakaisublina iti provincial jail.

Kinuna ni Marquez nga amkenna ti mabalin nga aramiden dagiti guardia a tinalawan ni Abiang idi ineskortan dagitoy a napan iti korte ti Narvacan para iti pannakabista ti kasona nga illegal a panagikut iti paltog.

Maipalagip nga ineskortan dagiti dua a provincial guard ni Abiang tapno agatendar iti bista ti kasona a panagikut iti illegal a paltog iti korte ti Narvacan, ngem tinakiasan ida ni Abiang.

Iti interbio ti media ken ni Senior Supt. Nestor Felix sakbay a naipaima ni Abiang iti provincial jail, kinunana nga agtuloy ti kaso dagiti dua a guardia a nakapatalaw kenkuana.

Kasta met a kinuna ni Singson nga agtuloy ti kaso dagiti dua a guardia agraman ti warden tapno maammuan no asino ti nagkurang iti trabahoda ken tapno saanen a maulit dagiti panagliway (lapses) no adda eskortanda a balud.

Kinuna ni Marquez a sangkadamag ni Abiang no agbayag pay ti kasona agsipud ta adda amakna a dakes a mapasamak kenkuana iti kaaddana iti provincial jail.

Mapapati a maysa a balud ti nangdanog ken ni Abiang iti uneg ti pagbaludan.

Makabulan a naglemmeng ni Abiang sakbay a simmuko idi Hulio 31 babaen ti negosasion ni Konsehal Teresito Valera ken ti PIB ken PAIDSOTG ti Provincial Police Office.

Segun ken ni Valera, nagpaing ni Abiang iti Solano, Nueva Ecija kalpasan a linibasanna dagiti guardiana ket simmuko kadagiti operatiba a nangsukon kenkuana iti San Fernando City, La Union.

Naipan ni Abiang iti maysa a safehouse a binantayan dagiti polis sa naipan ken ni Singson para iti isusukona.

Ngem iti interbio ti media ken ni Felix, imbaga daytoy a saan a rimmuar ni Abiang iti Ilocos Sur bayat ti panaglemmengna.

Kasta met nga imbagana nga awan naawatda a report nga adda tao a nangilemmeng iti naglibas a balud.#