VIGAN CITY – Matuloy ti draw lot iti nagbaetan dagiti dua a nagtabla a nangabak a kapitan iti Barangay Tabucolan, Santa, Ilocos Sur, segun iti provincial election supervisor.
Kinuna ni Comelec provincial election supervisor Atty. Joel Gines a kasapulan a maammuan no siasino ti rumbeng nga agtugaw kas kapitan iti nasao a barangay uray natayen ni DaniloVernido, maysa iti nakitabla a kandidato.
Iti eleksion iti para kapitan ti nasao a barangay itay Oktubre 29, agpada da Elvie Bagoyo, asawa ni incumbent Barangay Captain Armando Bagoyo, ken ni Vernido a nakagun-od iti 84 a butos.
Nakaiskediul a maaramid ti draw lot idi Nobiembre 5 ngem saan a naituloy gapu iti pannakapapatay ni Vernido itay Nobiembre 2.
Naammuan iti inisial nga inbestigasion ti polis ditoy a madama a makipatpatang ti biktima iti asawana, ni Catalina, iti igid ti kalsada iti pasado alas 10 iti bigat ti Nobiembre 2 idi immasideg dagiti suspek sada pinaltogan ti biktima.
Dagus nga impatay ti biktima ti sugatna iti ulo, barukong ken brasona a mapapati a gapuanan ti kalibre .38.
Maysa nga anggulo a kitkitaen dagiti inbestigador no adda pannakainaig ti pammapatay iti kalkalpas a barangay elections.
Sakbayna, iti interbiona iti maysa a lokal a radio, kinuna ni Gines nga alaenna pay ti opinion ti Comelec Manila para iti pannakaresolbar ti parikut a pinarnuay ti pannakapapatay ti biktima sakbay a maaramid ti draw lot iti kinatablana a nangabak a kandidato.
Sagudayen ti paglintegan ti eleksion a maangay ti draw lot, wenno toss coin tapno maresolbar ti panagtabla ti butos dagiti nangabak a kandidato para kapitan ti barangay.
Kinuna ni Gines a no ni Vermido ti mabunot a mangabak iti draw lot, automatiko a ti nangabak a number one kagawad ti agtugaw kas kapitan.
Mapapati a daytoy ti kaunaan a gundaway nga adda mapasamak a kastoy a matay ti nakitabla a kapitan sakbay a maangay ti draw lot a pakaammuan no asino ti mapagasatan a mangidaulo iti barangayda.#
