Footer

SIDEBAR: Misis ti sentensiador: makonsensia koma ti nangpatay iti asawak

VIGAN CITY – Ipaima laengen ti pamilia ti biktima ti pammapatay iti Namarsua ti pannakaited ti hustisia kenkuana agsipud ta awan ti lumtuad a saksi iti krimen ken awan ti kabaelanda.

Kinuna ni Esperanza Farpali, misis ni Joseph Farpali y Soberano, 47, naasawaan, ken residente iti Barangay VI ditoy siudad, nga awan met ti saksi iti pammapatay ken awan ti kuartada isu nga itedda laengen iti Namarsua a matuntonanda ti hustisia iti pannakapapatay ti asawana.

Pinaltogan dagiti di nabigbig a tattao a nagkasakay iti motorsiklo ni Farpali iti nagsulian ti Liberation Boulevard ken Crisologo Street, Barangay VI, ditoy siudad idi agarup 1:00 ti malem ti Oktubre 11.

Aggawiden ni Farpali a nakilugan iti motorsiklo a Honda Wave R a minaneho ni Faustino Fuller y Frando, 48, naasawaan, ken residente iti Barangay Cabaroan, Vigan City idi inobertekan ida dagiti di nabigbig a suspek a nagkasakay iti nalabaga nga XRM a di ammo ti plakana sa pinaltogan ti maysa kadagiti suspek ti ulo ti biktima iti namindua.

Gapu iti kinapardas ti pasamak, naikras ti lugan iti kalsada.

Naglibas dagiti suspek iti daya a direksion kalpasan ti pammaltog.

Indeklara ni Dr. Loida Afroilan Ranches, Vigan City Health Officer, a dead on the spot ni Farpali.

Nakarekobre dagiti inbestigador iti dua a kapsula a mapapati a nagtaud iti cal. 45 iti nakapasamakan ti krimen.

Nangiwayat dagiti polis iti hot pursuit operation kasta met a pinakdaaranda dagiti police stations para iti panangipasdekda iti dragnet kadagiti posible a rummuaran dagiti suspek ngem nakalusot dagitoy.

Segun iti polis, nagaruat dagiti suspek iti helmet idinto a puraw ti t-shirt ken nakapantalon iti maong ti gun man.

Segun ken ni Esperanza, naibalud ti asawana gapu iti kaso a homicide a nangpaltoganna iti kabsatna ket karuruarna idi Marso daytoy a tawen.

Ngem kinuna ni Esperanza a nasayaat metten ti panaglangen ti asawana ken ti kabsatna, kasta met nga awan ti ammona a manggurgura wenno nakariri ti asawana a maysa a sentensiador iti pallotan.

Innayonna nga insardeng metten ni lakayna ti agaramat iti shabu ket sangkaballakadna dagiti annakna ti saanda a panagusar iti maiparparit a droga.

Nupay kasta, nadakamat ni Esperanza nga adda dagiti tiempo a seknan ti “memory gap” ti asawana a mapapati a naalana iti panagusarna iti droga iti napalabas.

Mapapati a kagapgapu da Farpali ken ti kaduana iti galiera a nagsentensiaanna iti manok idi mapaltogan.

“Ni Apo Dios laengen ti makaammo… awan met ti saksi, awan met kuartami… ni Apo Diosto laengen….,” kinuna ni Esperanza idinto nga innayonna a “makonsensia koma” ti pimmatay iti inaramidna.#