Sidecar ti natakaw a traysikel, naabandona iti Badoc, Ilocos Norte

BANTAY, Ilocos Sur – Nasarakan ti sidecar ti traysikel a naireport a natakaw iti Quirino Stadium a naabandona sadiay Barangay Turod, Badoc, Ilocos Norte idi bigat ti Pebrero 11.

Maysa a Reynaldo Villa y Duran, 48, naasawaan, mannalon ken residente iti nadakamat a barangay ti nangireport iti barangay captain a nakalabas iti nabaliktad a side car iti provincial road.

Inreport da Dexter Palapala y Paza, 38, naasawaan, tricycle driver ken residente iti Barangay Guimod, ditoy nga ili ken ti ulitegna a ni Willy Lopez, 52, ken residente met laeng iti nadakamat a barangay, a natakaw ti nangisit a traysikel a Honda TMX 125F a kukua ni Marwin Briones y Bellon, 46, residente iti Barangay Callaguip, Caoayan, nga imparkingda iti daya a paset ti Quirino Stadium idi parbangon ti Pebrero 11, 2015.

Segun dagiti biktima, saanda nga in-locked ti traysikel kalpasan nga imparkingda sa napanda nagpusta iti periaan iti Quirino Stadium a nakaangayan ti Kannawidan Festival.

Idi aggawid dagiti dua, awanen ti traysikel iti nakaiparkinganna.

Saan pay nga ammo no asino dagiti nangitaray iti traysikel.#