Siglat Awards, manayonan inton 2012

VIGAN CITY – Manayonan dagiti kategoria a pagpilian dagiti mapadayawan iti Siglat Awards iti sumaruno a tawen, daytoy ti impakaammo ni Vice Gov. Deogracias Victor Savellano.

Kinuna ti bise gobernador a mainayon a mapadayawan iti sumuno a Kannawidan Festival ti Best Barangay Secretary, Best Barangay Treasurer, Best in Dengue Prevention Program ken Best in Blood Typing Program.

Kabayatanna, kaadduan ti Candon City iti inyalat a pammadayaw iti Siglat Awards iti programa a naangay iti CAP Building idi Pebrero 3 ditoy siudad.

Inyawid ti Cabugao ti maikadua a puesto idinto a maikatlo ti Sta. Cruz ken maikapat ti Del Pilar.#