Signages dagiti tourist destinations, maipasdek

VIGAN CITY – Saanton a maiyaw-awan dagiti turista nga agpallailang iti Ilocos Sur ta addanton dagiti signages a maipasdek kadagiti dalan nga agturong kadagiti nadumaduma a tourist spots iti probinsia.

Itay nabiit, nakiddaw ti pannakailatang ti pondo para iti pannakaipasdek dagiti direction signs ken signages kadagiti igid ti kalsada a pakailanadan ti direksion dagiti tourists spots iti probinsia.

Segun ken ni Bokal Edgar Yabes, nangidatag iti committee report iti resolusion a pinutar ni Vice Gov. Deogracias Victor Savellano, napateg dagiti direction signs ken signages a maipatakder kadagiti igid ti kalsada tapno adda mangidalan kadagiti turista a kayatna ti agpasiar kadagiti sabsabali pay a tourist spots iti probinsia.

Kinuna met ni Savellano a kasapulan nga adda maipatakder a direction signs kadagiti ili agsipud ta malaksid nga agbalin dagitoy a guide, adda latta importante a lugar a mabalin a maipatuldo iti turista ken pakagatanganna kadagiti produkto a dita laeng a lugar ti pakailakuanda.#