SIIM

Imbiit ni Dexter Marin Fabito

 

 

“DAYTA lattan luganmo ti usarenta,” inyisem nga intung-ed ni Manong Anton ken ni Sabas. Nakatugaw ni Sabas iti traysikelna idinto a nakatakder  ni Manong Anton iti sangona. “Imbag kenka ta singgolka pay la’ng.”

“Ala, wen.” Nagayad ti isem ni Sabas ta mailiwen a mapaayusan ti karabukobna iti nalabaga a kabalio. Magagaran payen bareng adda manen masiimanda a kalugaranda a mangitsek-in idiay FC’s Lodge. Iti sango daytoy ti pagtamtambayanda a paginuman. Idi naminsan nga aldaw, nasiimanda ni Kapitan Indung a simrek nga adda kaduana a babai nga agtawen sa iti uppat a pulo ket lima. Idi Sabado, nasiimanda ni Maestro Ferdie a rimmuar nga adda kaduana nga aglanglanga nga estudiante nupay di nakauniporme. Idi met naminsan a lawas, nasiimanda ni Manang Ronina a simrek nga adda kaduana a lalaki. Nagdakkelan idi ti mulagat da Manong Anton ken Sabas a nagkinnita. Adda ngamin iti abrod ti asawa ni Manang Ronina. Adda pay daydi pannakasiimda iti balasang ken baro nga agtawen ngata iti 18 a simrek sa rimmuarda kalpasan ti tallo nga oras. “Iyad-adayom, Apo,” nakuna ni Sabas a ni Jonalyn ti kayatna a sawen. “Ayna, ta sabali a talagan ti panawen!”

Ket pinagandarnan ti traysikelna nga istilo-Laoag. Inunorda ti agpalaud a haywey sa insikkona iti kanawan idi magtengda ti kanto ti Cortez St.

Agpada da Manong Anton  Naregta, 41, naasawaan, addaan maysa nga anak – ni Margie, ken Sabas Mierkoles, 34, baro, nga agpaspasada iti traysikel. Sa laeng maipasnek ni Manong Anton ti agpasada no kastan a maiwakasna ti agparaep iti dua ektaria a talonna ta agbisbisita laeng no kuan ti obrana. Kaykayat met ni Sabas ti agpasada ta nanamnam-ay ngem iti agraep wenno agkuliglig wenno hand tractor.

“Agatpitakka la ngaruden ngumisit pay ti kudilmo,” insungbat idi ni Sabas idi damagen ni Manong Anton no apay a kaykayatna ti agpasada. “Sa maysa, ad-adu ti nasasayaat a mabuya no agpasadaka, manong. Kanayonka a makaabay iti balasang.”

Iti bigat a panagitulodda iti estudiante ditoy ilida a San Tiago, ilistadan ti numero ti traysikelda iti improbays a blakbord iti terminalda wenno turnuan a kas awagda— pilaan kuna pay dagiti dadduma. Mabalinda ti agawid iti balayda ngem ibatida ti traysikelda. No ngamin iyawid ti asinoman kadakuada ti traysikelna ket mapugas no kuan ti numerona iti blakbord. Maisuratto latta manen inton sumangpet iti turnuanda. Mabalinda latta met nga italaw ti luganda basta saanda la ketdi a lumabes iti SFSAT wenno San Fabian School of Arts and Trades iti daya ken idiay DMAX gasoline station idiay laud. No salungasingenda dayta nga adda makakita kadakuada ket mapugas met laeng ti numeroda sa maisuratto met laeng inton sumangpetda iti terminalda.

Nagsayaat dayta a pagannurotanda ngem addada latta met kakaduada a lallakay a nasukir. Adda agkarga iti pasahero nga agawid a saanen a makiturno wenno makipila. Ayna, ta lumaklakayda a dumulduldog! Dida la mabain!

Addadan iti sango ti FC’s Lodge kalpasan ti tallo a pakanawan ken uppat  a pakannigid. Nagkinnitada apaman a nakababada iti traysikel. Kasla maymaysa ti taray ti panunotda: Asino man ngatan a kalugaran wenno am-ammoda ti masiimanda?

Immunegda iti bugbugtong a kubo iti sango ti pangibiitan. Saan unay a madlaw ti asinoman nga adda iti uneg ti kubo ta napalawlawan daytoy kadagiti panayagen a  nagduduma a masetas. Alisto met a nagorder ni Sabas iti dua a kabalio ken maysa a Nova iti kantina. Tallo a kuarto ti maupaan iti sango ti Lodge. Maysa dita ti kantina. Nakarikep met ti dua a kuarto.

“Nagsam-iten!” kinuna ni Sabas kalpasan ti panangitangadna a limmidok iti namitlo.

“Lamiisnan, jalu!” inyisem met ni Manong Anton.

Ditoy ti masansan nga ayuyangda aglalo iti malem ta napudot iti turnuanda.

Nadiskubre daytoy ni Manong Anton idi nakapasahero iti estudiante a nagkasapulan iti pagbayadna iti matrikula. Ket ditoyen ti pangibibiitanda no makalagipda. Agingga a nagbalin a mamindua iti makabulan a mangiserrek ditoy ni Manong Anton. Ad-adda met a simminged ti panagkaduada. Saan pay nga inserrek ni Sabas ni Jonalyn a gelprenna nga estudiante ta iresrespeto ken ipatpategna unay. Kinapudnona, isun ti kayatna a maidatag iti altar – kasta met ni Jonalyn.

Namin-adun a binagbagaan ni Sabas ni Manong Anton ta agipakilo payen daytoy iti irik no kasta a panaggagapas. Imbes nga ited koma daytoy iti balasangna nga adda iti maikadua a tawen iti kurso nga Edukasion ken urnongenna koma a pangituloy iti di pay napalitada a balayda, usarenna ketdi a pagsellepet – wenno pannakikaidda iti kama. Ammo ni Sabas a dakkel ti magastos ni Margie ta sangkakuna no kua ni Jonalyn nga ipasnekna ti agadal tapno saan a masayang ti adu a magastosna nga agbasa.

Saan pulos a dimngeg ni Manong Anton.

Indisso ni Sabas ti intangadna a bote. Itangadna koma manen idi mataldiapanna ti asmang ti agtutubo a rummuar iti pangibiitan. Inkiremkiremna dagiti matana sa immulagatna kadagiti rimmuar. Lalo a dimmakkel dagiti matana iti naimatanganna! Kinitana ni Manong Anton sa pinatiradna ti subsobna nga imbaw-ing iti ayan ti asmang.

”Margieee!” inbirakak ni Manong Anton sa dinanogna ti lamisaan a kayo.

“Hel!” kinuna met ni Sabas. Ngem ammona a saanen a nangngeg ni Manong Anton. Sinul-oy ni Sabas ti nauneg nga angin iti barukongna. No mabalin, dina kayat a kastoyto ti mapasaran dagiti agbalinto nga annakda ken Jonalyn. Ket nagkari iti bagina.#