Simbaan, padayawan ti gobierno probinsial ti La Union gapu iti kampaniana kontra droga

SAN FERNANDO CITY – Nangipasa ti hunta probinsial ditoy iti maysa a resolusion a mangited iti pammadayaw iti Simbaan gapu iti panangbantayna agingga iti nagbanag ti kaso ti  police official a  naitudo a protektor ti laboratorio ti shabu a rinaut dagiti polis iti maysa a barangay iti Naguillan idi 2008.

Iti resolusion nga impasa ti sangguniang panlalawigan ditoy, binigbigna ti Simbaan, nangruna daydi dati a Bishop Artemio Rillera gapu iti nainget a panangbantayna iti kaso ni Police Supt. Dionisio Borromeo a naisaklang iti korte gapu iti pannakaitudona a protektor iti shabu laboratory sadiay Barangay Upper Bimmotobot, Naguillan.

Pimmusay ni Rillera gapu iti nakaro nga atake ti angkitna kalpasan iti panagmisana  iti Seminary of the Sacred Heart ditoy siudad idi Nobiembre 13, 2011.

Aktibo iti kampania maikontra iti illegal a droga, ni Rillera ti nangidaulo idi iti maysa a demonstrasion iti kalsada kas panagprotestada iti panangipalubos ti korte a makapagpiansa ti maysa kadagiti suspek iti nasao a kaso ti droga.

Kas panangbigbigna ken ni Rillera iti kinaturedna a nakirupak iti illegal a droga, idi Marso 2, 2009, impaay ti gobierno probinsial kenkuana ti Saranay Award, ti kangatuan a pammadayaw a maited ti provincial government iti maysa a residente ti La Union.

Ni Borromeo ti intudo ni Dante Palaganas, caretaker, a protektor ti naraut a shabu lab idi 2008 a nakakumpiskaanda kadagiti ramramit ken kemikal iti panagaramid iti droga a mapattapatta nga agbalor iti P27 milion.

Nupay kasta, pinaglibakan ni Borromeo ti akusasion maikontra kenkuana.

Bayat ti pannakabista ti kaso, binantayan ni Rillera ti panagdur-as ti kaso. Idi  impalubos ti korte a makapagpiansa ti maysa kadagiti suspek iti kaso ti droga, indauluan ni Rillera ti maysa a demonstrasion iti kalsada kas panangipakitada iti protestada.

Kalpasan ti ipapatay ni Rillera, intuloy ni Fr. Nolan Nabua ti nangbantay iti pannakabista ni Borromeo agingga iti nasentensiaan daytoy.

Itay napan a bulan, sinentensiaan ni Judge Ferdinand Fe ti RTC Branch 67 ni Borromeo iti tungpal biag a pannakaibalud. Imbilin pay ti korte ti panagmulta ni Borromeo, agdama a deputy provincial director ti Cavite Police Provincial Office,  iti P10 milion.

Nasentensiaan met a mabalud ni SPO1 Joey Abang,  co-acused ni Borromeo, iti minimum a 12 a tawen ken maysa nga aldaw agingga iti 20 a tawen ken panagmultana iti P500,000.00.

Idi Hulio 9, 2008, rinaut dagiti nagtitipon a bunggoy dagiti polis ti shabu lab a naipasdek iti nasulinek a lugar ti Barangay Upper Bimmotobot, Naguilian, La Union a nakakumpiskaanda kadagiti ramramit ken kemikal para iti panagaramid iti droga.

Nasukalan ti nasao a shabu lab gapu iti nakaro nga angot dagiti kemikal nga agtaud ditoy.

Mapattapatta a makapartuat dagiti nakumpiska a ramramit ken kemikal iti saan a nakurkurang ngem 180,000 kilos a shabu.

Imbilang ti kapolisan ti rinautda a shabu lab a kadakkelan iti intero a pagilian.

Idi damo, agdagup amin  iti 52 a polis ken opisial ti naikalam-it iti kaso ket nareliboda amin.

Nupay kasta, nawaswas ti kaso maikontra kadakuada gapu iti kaawan iti umdas nga ebidensia ket da laeng Borromeo ken ni Abang ti nabati a naakusaran.#