Simmuko a drug user, ginudas armado a lallaki riding in tandem

CABUGAO, Ilocos Sur – Saan a karaman daytoy a biktima iti drug watch list ditoy nga ili ngem simmuko kas drug user nupay mapapati a nabayagen a saan a nagus-usar iti droga.

Daytoy ti naammuan iti inisial nga inbestigasion nga insayangkat dagiti polis ditoy nga ili mainaig iti pannakapaltogĀ  ni Antonio Serrano, Jr. y Sapla, 36, naasawaan, ken residente iti Barangay Salomague ditoy nga ili, iti Barangay Namruangan idi malem ti Agosto 26 a puon ti nakatayanna.

Nupay kasta, kitkitaen dagiti inbestigador no adda pakainaigan iti droga ti pannakapaltog ni Serrano a nagtungpal iti pannakatayna.

Segun iti polis, idi agarup 3:10 ti malem ti nadakamat a petsa, agturong ni Serrano iti Barangay Turod a nakalugan iti Mitsubishi Lancer a kotsena ket idi makadanon iti kongkreto a boundary marker iti Barangay Namruangan, kellaat a pinaltogan iti sumagmamano a beses dagiti suspek a nakalugan iti motorsiklo a nakatiruan ti makannigid a barukongna.

Naglibas dagiti di nabigbig a suspek kalpasan ti pammaltog.

Naitaray ni Serrano iti Pira Clinic and Hospital ditoy met laeng nga ili ngem indeklara ti doktor a nangtaming kenkuana nga awanen ti biagna.

Iti panangproseso ti SOCO Ilocos Sur nga indauluan ni Chief Inspector Leonardo Q. Arce iti crime scene, nakasarakda iti tallo a kapsula manipud iti cal. 45. Addan iti ikut ti Ilocos Sur PNP Crime Laboratory dagiti kapsula para iti ballistics examination.#