Simngaw a Palimed

    Kolum: Iti Duyog ti Singasing

Ni Jaime M. Agpalo, Jr.

 

Gapu iti nalabes nga essem nga agiposte iti social networking site, simngaw ti palimed ni mannurat—agdadamo a mannurat, Robert Galbraith, maysa nga ex-military. Adu ti nangdayaw iti kinalaingna, ta iti laksid ti kinaagdadamona a mannurat, kasla aramid ti betereno ti gapuananna. Adu iti nakadlaw itoy ket subject iti adu a panangamiris. Lalo pay a naglatak dayta a nobela a “The Cuckoo’s Calling”, nobela maipapan iti krimen. Adda pay iti nangamiris babaen ti software a nangikomperaranna iti aramid ni nalatak unay a mannurat ti Harry Potter, ket natakuatanna nga adda pagkaarngian iti pannakaiyibbet dagiti balikas ken pannakalaga dagiti pasamak iti gapuanan ni J.K. Rowling.

Ngem saan a naannad ti law firm partner ni J.K. Rowling. Maysa kadagiti partner iti law firm ti nangistoria iti asawana iti kinaasino ni Galbraith—siempre agtalek iti asawana a saanna nga ibagbaga iti sabali. Iti imasna, naibaga ti asawana iti gayyemna ti naammuanna, ket dayta a gayyem, impostena met iti twitter page ti naammuanna. Nakalap met dayta a tweet ti maysa a nalatak a pagiwarnak, simngawen ti kalkaluban a palimed. Pseudonym gayam ni J.K. Rowling, ti autor ti Harry Potter, ti Robert Galbraith.

Ngem saan ngata a maysa a promotional technique daytoy, kuna dagiti dadduma? Ngamin agbaliw iti forte wenno linia iti suraten ni Rowling, manipud iti fantasy-adventure a mapan iti crime story. Ngem dakdakkel ti pammati a saan met ngata a lumtuad dayta nga intension ta saanen a kasapulan ni Rowling iti promo ta adu iti agraem kenkuana.

Ta kunana iti napasamak: “To say that I am disappointed is an understatement,” she added. “I had assumed that I could expect total confidentiality from Russells, a reputable professional firm, and I feel very angry that my trust turned out to be misplaced.”

Iti sabali a punto, apay a nagaramat ni Rowling iti pseudonym? Kunana: “I hoped to keep this secret a little longer because being Robert Galbraith has been such a liberating experience. It has been wonderful to publish without hype or expectation, and pure pleasure to get feedback from publishers and readers under a different name.”

Liberating experience. Dayta ti kangrunaan ti amin—ti pannakaisina ti ekspektasion dagiti agraem iti sigud wenno dati a kinaasino. Dayta ekspektasion no dadduma ket saklawenna no maminsan ti privacy—ket asinoman nga agessem iti kinaulimek ti karayan ket gamdenna a batoken ti lansad ti nawaywaya a panunot nga adayo iti ekspektasion dagiti agraem, publiko ken makaam-ammo iti kinaasino wenno iti agdama a kasaaad.

No maminsan, dayta ti rason dagiti agar-aramat iti pseudonym, a pakaibilangan toy numo, nga adu metten ti inusartayo nga AKA a panangisina ti kinaasinotayo iti karakter a pinarnuay ti lapis. Adu nga eksperiensatayo itoy, agpapan ita ad-adu pay laeng ti makaam-ammo iti “nagantayo a papolar” ngem ti kinaasinotayo a kas mannurat, ket essemantayo dayta ta nawaywayatayo nga agtignay ken umaliwaksay nga awan ti pakainaigan iti intay panagsursurat wenno kas mannurat.

Dayta hype ket dakkel met ti kaipapananna, lalo no sika ket saan a “capital I” no di ket bay-an a ti panawen ken sirkumstansia ti mangibaga ti kinaasino wenno liklikan iti mata ti tao ti pannakaikonektar   iti karakter a pinarnuay, maliklikan iti nalabes a publisidad a mangkunnot ti kinaulimek. No adu ti managayat iti publisidad, kasta met iti kabalikidna.

Iti bukodko a biang, saantayo a kukua ti parnuayen no di ket instrumento laeng tapno adda maparnuay. Awan ti sabali a magun-od ti tao iti rabaw ti daga malaksid ti natarnaw a nagan nga isu ti makunkuna a tugot—ket makaammonton ti panawen a mangibaga ti kinapudno—ta ti AKA ket adda met ti mangik-ikut dayta ket dumtengto latta met ti panawen a pannakaammo ti kinaasino dayta; adda panawen ti amin, ngem no awan pay laeng ti panawen sa ket naisiwalat, adda ti panuayenna a saan a nasayaat a dalluyon wenno lilibeg.

Kasta ti napasamak iti eksperiensa ni Rowling.#