Sinalang bridge, pormal a naluktan

BANGUED, Abra – Kalpasan ti sumagmamano a bulan a pannakaitantan ti panaglukatna, nainaguraran itay Hulio 15 ti Sinalang Bridge ditoy.

Kinuna da Diputado Eric Singson iti maikadua a distrito ti Ilocos Sur ken dati a Diputado Salacnib Baterina, agpaay ti nasao a rangtay a pakalaglagipan iti daydi Congressman Luis “Chito” Bersamin a maysa kadagiti matalek idi a kaduada iti Northern Alliance, grupo dagiti Ilokano nga agilinlinteg iti House of Representatives.
Nataktak ti pannakalpas ti nasao a rangtay gapu iti pannakapapatay ni Bersamin iti Quezon City idi Disiembre 16, 2006.
Prioridad a proyekto ni Bersamin ti Sinalang bridge a mamagkamang iti ili a Pidigan ken Bangued.
Malaksid kada Singson ken Baterina, nagatendar iti inagurasion da kabarbaro a Governor ti Abra Eustaquio Bersamin, kaiprokproklamar a diputado iti kakaisuna a distrito ti probinsia Cecilia Luna ken dagiti dadduma pay nga opisial ti probinsia.

Da Singson ken Baterina ti timmulong iti pannakakumpleto ti konstruksion ti nadakamat a rangtay.