Sintia, ti managkallong a pusa

ADDA nangisit a pusa a managan iti Sintia. No kasano kangisit ti dutdotna, kasta met dagiti bimmulagaw a matana.

Ngem dakkel a pusa ni Sintia. Nalukmeg pay.

Kadawyan kadagiti pusa, managanup met ni Sintia. Nupay kabayan, adu ti atiwenna a kalakian. Nasiglat nga aganup iti bao a taraonna.

Am-ammo ni Sintia iti Dingolandia, ti lugarda nga ayup. Agal-alikeskes dagiti bao no maangotda ti kaaddana iti asideg. Agiinnunada nga agsapul iti paglemmenganda.

Taraken ti baket ken lakay ni Sintia. Agnaedda iti purok iti adayo bassit iti dayaen ti Dingolandia. Gapu ta nataenganen dagiti amona, maliplipatanda a pakanen no dadduma.

Gapuna nga agdiretso ni Sintia iti Dingolandia. Permi ti panaganupna dita. Marabutit ti paggugustona. Ngem no maminsan, anupenna pati dagiti alibut.

Isu a kabutbuteng la unay dagiti babassit nga ayup ni Sintia.

NAMINSAN manen, napan naganup ni Sintia iti Dingolandia. Mabisin la unayen. Saan manen a pinakan dagiti amona. Awanda pay ketdi. Segun iti nangngegna, mapan kano dagitoy iti anakda iti kabangibang nga ili.

Malabsan ni Sintia ti maysa a kalapaw. Napasardeng iti pannagnana idi makaangotna iti makaay-ayo.

Kattuno a lames! Ken daing a lagdaw! Pamiliar kenkuana dagita nga angot.

Immampir iti kalapaw. Ad-addan ti panagsayamusom ti makaay-ayo nga angot.

Nagpaliiw. Awan ti nadlawna a tao iti uneg. Uray pay iti aglawlaw.

Maymaysa ti simrek iti panunot ni Sintia. Masapul a mapedpeden ti bisinna. Nawatiwat pay ti Dingolandia a papananna.

Nakalukat ti tawa. Simrek dita ni Sintia. Nagtarus iti kosina.

Pinatadem ni Sintia ti panagangotna. Nagsawar. Awan iti dalikan ti sapsapulenna.

Nagpanunot. Tinangadna ti bubong iti batog ti lamisaan a panganan. Nakitana dita ti nakabitin a basket. Napaisem iti bangbangir

Nagpuesto iti tawa iti daya. Sa linagtona ti basket.

Bingo! Adda dita ti katuntuno a dalag!

Awan ti sinayang a kanito ni Sintia. Apagbiit nga inibusna ti lames. Napaamil iti bussogna kalpasanna.

Ammo lattan ni Sintia a naala dagiti bumalay ti lames iti alog iti asideg. Naliwliwanda idi rabii. Wenno nalawinan ket ngata. Intunoda a nasapa. Sa isagpawda iti lutuenda ‘ton aldaw. Wenno inton malem ketdi a sangpetda.

Saan pay a napalpalpaan ni Sintia. Ngem nagkurri manen ti panunotna. Aglalo ket naipasabat manen iti agongna ti angot ti daing. Siguradona la unay dayta nga angot. Agdadaing met dagiti kabbalayna. Adu ngamin ti matanggaran a lagdaw iti waig iti abagatan ti purok.

Sinapul ni Sintia ti daing a lagdaw. Awan la ketdi iti uneg. Napigsa ngamin ti angot. Nagtarus iti likud ti kosina. Timmangadtangad.

Napaisem iti nakitana. Adda dakkel a karadikad iti tuktok ti palapala ti tabungaw. Dita la ketdi di nakaibilagan ti lagdaw, nakunana.

Daras a simmarpaw iti palapala. Bingo, adda nga agpayso dita ti maang-angotna!

Iti apagkirem, naikisapna dagiti madadaing a lagdaw!

Permi a namutittit ni Sintia. Gapuna a saan unayen a makataray. Nagnagna ngarud a nagawid.

Inyiddana iti dapogan idi makasangpet. Apagbiit a nakaturog.

Iti pannakariingna, ti manen lames ken daing ti adda iti panunotna. Saan gayamen a nasken nga agbannog nga aganup.

Napa-miaaawww iti ragsakna.

Ngem no ammo la koma ni Sintia, permi a makapungtot dagiti kinallonganna. Agbasbassawang ni Manong Pinong iti pungtotna. Nabambannogda nga agassawa a napan nagmula idiay bangkag. Namnamaenda nga agassawa a ti lames ti ilaokda iti alukon a naarnasda.

“Pusa la ketdi ti nangala, baket,” kinuna ni Manong Pinong ken ni Manang Onor nga asawana. “Adda tidtiddana, ney…”

“Ket ania ngarud pay, lakay,” masaysayangan ni Manang Onor a nagkuna. “Sagpawantan, a, iti daing ‘ta ninatengta.”

“Kapilitan, a, baket,” insennaay ni Manong Pinong. Tinurongna ti palapala iti likudan ti kosinada. Tapno maklaat laeng. “Baket, inakasmon ‘tay daing?” impukkawna.

“Saan pay!” naisungbat. “Apay, ‘ya?”

“Awan metten!”

“Dimo kuna a pinusa pay?” permi a bullad ni Manang Onor nga immasideg ken ni Manong Pinong.

“Mapan a kasta, baket! Adda maregmeg a tidda a nakaparabaw kadagiti bulong ti tabungaw.”

“Anian!”

“Ayna, makitak la dayta a pusa, mapangpang-orko! Siniguradonan ‘ta pagbiag!”

NASAPA a rimmuar ni Sintia iti kabigatanna. Awan pay dagiti kabbalayna. Maibayagda pay siguro iti napananda. Segun iti nangngegna, nagpasngay kano ti anakda. Ket isuda ti mapan mangbantay iti daytoy. Ta agtrabtrabaho ti lakayna iti maysa a kaunasan.

Ipakatna manen ti mulmulmolan ti panunotna. Saanen a mapan pay idiay Dingolandia. Kadagiti laengen balbalay iti asideg.

Nangsisiim iti balay nga awan manen ti matatao. Ta kadawyan kadagiti bumalay ti nasapa a rummuar. Mapanda agsukay kadagiti bukodda a bukat a daga.

Saan a narigatan ni Sintia a nagsapul iti pagkallonganna. Naparsik a netib a manok ti nagum-umaanna a sinda. In-inuten la ketdi koma dagiti bumalay nga isagpasagpaw.

Nagawid a dagus idi mabsog. Inturogna manen iti dapogan.

Kasta manen ti inaramid ni Sintia idi makariing iti malmalem. Nalingta a bukto ti nasapulanna a taraon. Nagnanam man iti panagramanna.

Pagdaksanna, adda nakakita kenkuana.

“Allaka,” kinuna kenkuana ni Panilo a pato. “Ipulongkanto.”

“Maawatandaka ngarud dagiti tao?” immusiigna laeng.

“Dika la maasian…”

“Kayatmo ta sidaenka met?” inngarawna ken ni Panilo Pato.

Nagkayabkab nga immadayo ni Panilo Pato iti butengna.

URAY idi addan dagiti kabbalay ni Sintia, saan latta a nagsardeng a nagkallong. Kaykayatna payen ti agkallong ta sigurado a mabsog. Ania met la ngaminen ti ipakpakanda kenkuana? No di awan ramramanna a digo ti inabraw, kilabban a nadanuman ken napatedtedan bassit iti bugguong.

Ti di ammo ni Sintia, makapungtot unayen dagiti lumugar a kalkallonganna.

Sardam. Inkeddengna manen ti mapan agkallong. Pinalladawan laeng dagiti amona iti nalingta a balanghoy itay. Saanna nga inibus ta dina maraman.

Naragsakan ta di narigatan a nagsapul iti kallongenna. Adda dua bukel a naprito a karpa a natakkaban iti sinerrekna a kosina.

Inin-inayadna ti nangan. Ngem natipawna ti garapon ti kape iti asideg.

“Agbayadka ita!” nayikkis. “Agawem pay laeng ti para kadakami!”

Timmapuak iti tawa. Taray dayta. Awan sarday a taray ti inaramid ni Sintia. Kasla ngamin adda latta kadagiti lapayagna ti mangipangpangta a timek. Dina napuotan, adda gayamen iti Dingolandia. Agpaypayegpeg pay laeng ti butengna. Simpeng iti panunotna a no di agardeng nga agkallong dakes ti mapasamakna. Napakintayeg.

Ket impetteng ti panunotna: Ay, diakon agkallong, narigaten…!