Kolum ni Jobert M. Pacnis
(Umuna iti dua a paset)
ITI panagtulid ti aldaw, mapasamak ti panagbalbaliw. Panagbalbaliw ti bagi. Panagbalbaliw ti nakaparsuaan. Panagbalbaliw ti aglawlaw. Panagbalbaliw ti panawen.
Tunggal panagbalbaliw, nagimet iti baro a paset ti biagtayo. Nasayaat laeng no daytoy a panagbalbaliw dina itunda ti biagtayo iti rigat wenno pakarigatan. Nasayaat laeng no daytoy a panagbalbaliw ket mangidur-as kadatayo.
Ngem kasanon no daytoy a panagbalbaliw ket kasungani ti arapaaptayo?
Sigurado, ditayo la ket kayat. Sigurado, makariknatayo la ketdi iti pannakalpay dagiti abaga.
Malaksid iti itataeng a pagdalanantayo amin kas paset ti panagbalbaliw ti bagitayo, kabuyogna met daytoy ti panagbalbaliw ti ugali wenno kababalin. Adda dagiti sigud a nasingpet, manakman nga inton agbaybayag, aglalo no makaramandan iti nam-ay, agbalbaliwen ti aminda. Dida metten mangipirpirit. Kunam no asinodan a nakagteng iti tuktok ti balligi.
Ngem adda met dagiti rusanger ita, baribar ti kararuana, nga inton agtanoy— kalpasan nga agdalanda kadagiti pannubok—isudan ti kananakman a kameng ti gimong. Idauluanda payen dagiti kailianda para iti panagbalbaliw nga arapaap ti tunggal maysa. Dayta nalidem a paset ti biagda ti maaramatda a pangibagnos kadagiti kailianda.
Malagipko ita ti maysa nga am-ammok. Idi baro pay laeng, maysa nga ari-ari iti kalsada. Pagbabartekanda nga agbabarkada dagiti aglabas a lugan. Dawatanda dagitoy iti yinumda. No saan, bansagenda. Awan kabutengda ta kabagianna met ti ama-ti-ili ken pudno man met nga adda mabalin ti pamilia a nagtaudanna.
Ngem idi nagasawan, nagbalin metten a manakman. Nagaget payen. Ammonan a sukayen dagiti daga a naikumit kenkuana a kas buridek iti pamiliada. Sa laengen sumimsim no kasta nga agluto iti pangrabiida. Mannakimisa payen.
Idi agangay, nadutokan a hermano mayor iti simbaan. Nagbalin pay a modelo nga asawa ken ama.
Adu ti masmasdaaw iti kellaat a panagbalbaliwna. Ngem maymaysa ti kunana: No pastreken ti Dios iti biag, awan ti imposible!
Nga agpayso met!
Malagipko pay ita. Adda ‘tay baket (nga iti laengen panagkawkawesna, madlawen nga adda mabalbalinna iti biag) a kanayonko idi a makita iti simbaan nupay manmanoak met a makimisa. Iti maysa a Domingo a panagruruar dagiti nakimisa, letlet ti ruangan ti simbaan ta maymaysa ti ruaran/sumrekan dagiti tao ken lugan.
Iti di ninamnama, ‘tay sarsarunnuek a nakamotor, naideppelna ti akinsango a pilidna iti gurong ti baket. Wen, apagdeppel laeng ta diay met sakana ti iseksekkadna tapno makaabante ti luganna.
“Kitaem, a, ti pagnaam!” inkusilap a dagus ti baket.
Nagpadispensar met a dagus ti nakamotor.
Ngem saan nga inataatan ti baket. Inaributantan ketdi daytoy iti sao.
“Kasla metten kayam a bayadan ti biagko? Sikanto pay ti papilidak a bayadak ti biagna!” ti diak malipatan a sao ti baket.
Agasem dayta? Mannakimisa ngem…
Ala, adu pay dagiti maob-obserbartayo a kababalin dagiti padatayo a tao a kasungani iti rumbeng koma nga ipakitada. Kas koma ti mannursuro a naidarum ta nangmolestia iti adalanna. Ngem idawdawattayo laengen a dumteng koma ti panagbalbaliw iti biagda para iti pagimbaganda ken iti gimong a paggargarawanda.
(Adda tuloyna)
