sinursuran-banner-sqSinursuranNi Jobert M. Pacnis

SINURSURAN: Ania, Aya ti Makuna a Piesta?

Kolum ni Jobert M. Pacnis

(Umuna a paset)

PANAGBENGA. Masskara. Ati-atihan…

No mangngegtayo dagita, ammotayon ti kayatna a sawen. Festival wenno piesta. Parambak, ramrambak a pagraragsakan dagiti umili. Gapu iti kinasikat dagitoy, saan laengen nga iti pagilian ti makaam-ammo. Umay payen buybuyaen dagiti ganggannaet.

Dinengdeng festival.

Nalabit saan pay a kas kadagiti naagapad iti ngato ti kinapopularna. Ngem awan ti papananna no di a kastanto met iti masanguanan no matarabay la ketdi daytoy a piesta.

Wen, tunggal ili, siudad wenno uray payen iti mismo a barangaytayo, addada dagiti tinawen a piesta a maramrambakan.

Mabalin a piesta maipuon iti patron ti ili wenno barangay. Kadawyan nga ar-aramiden daytoy ti tunggal parokia. Panangipakita no kasano ti kadebototayo iti santo wenno santa a patientayo a mangbambantay kadatayo wenno dagiti produktotayo.

No met piesta maipuon ti ili, adda itampokna a maysa a banag tapno daytoy ti maikkan ti importansia iti piesta a mabalin a makatulong kadagiti amin nga agindeg.

Kas koma kadayta Panagbenga ti siudad ti Baguio. Piesta Dagiti Sabong ti kayatna a sawen. Saan laeng a gapu ta adu ti sabong iti nasao a lugar isu a napaltuad daytoy. Dakkel ti pakainaigan ti sabong iti pannakakissay, pannakaleplep ti tarumpingay a nangarakup kadagiti agindeg idi napasamak ti napigsa a ginggined idi Hulio 16, 1990.

Ket manipud idin, nagbalinen a popular ti Panagbenga festival iti pagilian ken uray iti sabali a pagilian. Adu a turista ti umul-uli iti Baguio tapno laeng saksianda daytoy a nakaragragsak, nagarbo ken pudno man met a makabang-ar ti rikna a Piesta Dagiti Sabong.

Ket saan a mailaksid ti kinapudno a no am-ammo ti maysa a piesta, umadu ti turista a bisita iti dayta a lugar a mangingato iti ekonomia daytoy. Adu dagiti matulongan nga ordinario nga umili. Maikkanda iti panggedan. Rumang-ay ti ili— no la ketdi umno ti pannakatimon dagiti mapastrek a kuarta.

Tunggal piesta, no simpuonen, adda dakkel a pakainaiganna iti kultura, pagbibiagan, tradision, ken pakasaritaan ti maysa a lugar. Iladawanna no ania ken kasano dayta a lugar ken no asino dagiti lumugar. Masirarat ti nabaknang a paskasaritaan ti lugar iti piesta nga an-annongenna iti tinawen. Rupa ti maysa a lugar ti piesta.

Iti piesta, saan laeng a dagiti produkto ti mabalin a maitampok. Makita ditoy ti panagug-ugali dagiti agindeg. No naurnos, saan a dinto pagdidinnamagan nga ad-adanto pay a makaawis iti imatang dagiti turista. Ta uray pay kasano kagarbo ti maysa a piesta no awan ti linak ken kappia kadayta a lugar, saanto a pagtatakkonan a pagibusan iti kuarta dagiti turista.

Saan ngarud a basta lattan mabukel ti maysa a piesta gapu ta isu ti kayat dagiti adda iti turay. Masapul a kitaenda, ikonsiderada dagiti adu nga aspeto tapno saan nga agbalin a nakakatkatawa iti imatang dagiti umili aglalo dagiti ganggannaet. Maawis dagiti nadumaduma a sektor tapno maipresenta ti nadumaduma nga ideya ket nasansantak ti pannakabukel ti isayangkat a piesta.

(Adda tuloyna)