sinursuran-banner-sqSinursuranNi Jobert M. Pacnis

SINURSURAN: Annad laeng…

KLEMMM…BANGGG!!! Klemmm… bang! Klemmm… bang!

Umaw-aweng nga umaw-aweng ti panagdengngeg kadagiti kalembang ti kampana iti lugartayo. Ipasimudaagna nga asidegen ti pannakarambak ti pannakayanak ti Mannubbot iti nanumo a kulluong.

Apagserrek dagiti makuna a bulan ti “ber’, rugiantayon ti agdekorasion kadagiti pagtaengantayo. Wenno addadan naimatangantayo a nangirugi a nangbisti kadagiti balbalayda. Saanen a karkardayo dayta. Am-ammo ti pagilian a kaatiddogan ti selebrasionna iti Paskua. Manipud Septiembre agingga iti Piesta Dagiti Tallo nga Ari (Enero 6 iti sumuno a tawen). Mano a bulan dayta?

Paskuanto man gayamen, ket ditayo mapupuotan nga ibaga.

Wen, kasla kaano laeng daydi panangrambaktayo iti napalabas a tawen. No palausen ti manarita, kasla idi kalman laeng. Napatak pay laeng iti isip dagiti ragragsak a napasamak.

Ket ti panunot, mangrugin nga agampayag no anianto ti maaramid/aramiden kadayta nga aldaw. A maymaysa laeng ti turongna: rumbeng a narambak ken naragsak.

Awan ti lugar ti liday ken nanumo a panagrambak!

Ibuntok ditan ti pannakaam-ammotayo a naragsak/kararagsakan a puli. Uray pay iti panawen ti didigra, maalatay’ latta ti umisem, agyaman ken naregta latta a bumangon iti nakadaleban. Nupay nasakit ti pagteng, saan a rason tapno paidalit iti saem.

Dayta la unay ti daydayawen dagiti ganggannaet kadatayo!

Ania man nga aramiden, masapul ti badyet. Saan nga agbalin nga aglabas lattan daytoy nga aldaw a kasla awan aniamanna. Mapalpaliiw ngarud a naruar ti kuarta iti kastoy a tiempo. Kasla agubbog ti kuarta iti petaka wenno bolsa.

Maawatan no apay a kasta. Panawen ti bonus kadagiti adda regular a panggedanna. Tapno maramanan dayta a bunga dagiti nagbambannogan iti makatawen, mailatang, singkaduanna, a pangparagsak, pangrambak iti Paskua.

Uray pay dagiti di a regular ti trabahona, mapalpaliiw a naruar latta ti kuarta a pagrambak. Mapaadda nga awan rigrigatna dagiti banag a pangpangayed iti panagraragsak. Banag a pagsidsiddaawan ti dadduma. Ta no saan a panawen ti Paskua, kasla nagrigat a paruaren ti kuarta.

Maysa kadi pay daytoy kadagiti misterio ti Paskua?

Ngarud, saanen a nakakaskasdaaw a kanigid-kanawan dagiti maidasar a taraon– agkakaimas a taraon. Taraon a sa laeng maramanan, maidasar no kasta nga aldaw.

Ket ditoy a mapaliiw ti pannakapalulok ti rikna ti tunggal maysa. Madadael a maminpinsan dagiti karkari para iti salun-at. Dayta, awanen ti serreg ti ngiwat kadagiti maiserrek kenkuana. Bay-am man no sobra ti kinasam-it, ti kinaapgad, wenno kinataba dagitoy. Ti napateg, saan a mapabainan dagiti nagawis iti pannangan.

Maminsan laeng met, mairason. Saan a bale ta ag-cleansing-ak kalpasanna.

Nasayaat laeng no kasta. Ngem kasanon no saan a magabenan ti bagi dagiti naipauneg kenkuana sakbay pay dayta a cleansing wenno panagdalus kadagiti naipauneg a toxins?

Husto ngarud ‘tay kunada nga in moderation koma amin a banag. Ania man a sobra, dakes wenno makadakes. Aglalo la ngaruden no maipanggep iti salun-at ti pagsasaritaan.

Ngem no kadagiti lider, saan a dakes kadakuada ti sobra a panagkaud iti pagbagasan ti pagilian. Ad-adda a dakes no bassit laeng ti kaudenda.

Saan, ka-Sinursuran?

Kuna ngarud ni Kayong Sabas, isuda a lider dagiti dina ammo ti agkaroling ngem kasta unay ti panagalada iti aginaldo a di met a para kadakuada!

Di kad’ maregmeg laeng ti mabati kadatayo nga umili. Naannadda isu a nabangloda latta iti imatangtayo no kasta a panagpapadlawda. Wenno ad-adda a husto a kunaen a nalakatayo laeng a makalipat kadagiti dakes a naar-aramid kadatayo.

No kasano koma ti kaannad dagitoy a lider nga agkunniber, kasta koma ketdi ti kinaannadtayo ita a panawen ti Paskua. Iti kinaannad, mayadayotayo ti ania man a pakadangran wenno pakadaksan. Ad-adda a naragsak ti mangpasangbay, mangrambak iti naisangsangayan nga aldaw.

Agannadtayo iti sobra nga ipapaunegtayo. Iti udina, datayo met laeng ti agsagaba iti mabalin nga ipaay dagitoy a taraon. Umanayen ‘tay pangpagusto laeng iti panagraman iti ania man a maipasango kadatayo a taraon. Wen, mabalin a narigat daytoy ngem adda laeng iti panangdisiplina iti bagi.

Awan narigat nga aramiden no disiplinado ti bagi.

Rumbeng pay nga agannadtayo kadagiti ania man a makaulaw a lidokentayo. Ta, wen, saan a maawan daytoy a mapagsasanguan kadagiti kakabagian, gagayyem ken barkada. Ammuen ti limitasion ti bagi kadagiti nasanger. No masapul a pammagusto laeng iti grupo, dayta koma ti aramiden.

Saan a pagturayen ‘tay rikna a kasla maibusan iti nasanger. A kasla awanen ti sabali pay nga aldaw a sumangbay.

Dayta damag itay nabiit, addada nayospital ken natay gapu iti panaginumda iti nasanger. Awan sabali a tuduen dagiti biktima a puon ti napasamakda no di ti nagsasaguanda a lambanog.

Nupay di pay pinasingkedan dayta dagiti maseknan nga indibidual, kas iti doktor a nangtaming kadagiti biktima. Iti pannakasursurat daytoy, agtultuloy ti imbestigasion iti nasao a pagteng.

Maitutop pay ti panagannad kadagiti ania man a pangpangayed iti pagtaengan. Kas koma kadagita Christmas lights. Agkaraiwara dagiti sub-standard a produkto. Pudno a nalaka dagitoy ngem no karadkad ken sanikua ti nakapusta, idiantayo pay laeng koma a gatangen dagitoy.

Iti iruruar iti balay tapno sumuknal wenno dumar-ay iti siam a parbangon a Simbang Gabi, rumbeng latta ti panagannad. Siguraduen ti seguridad ti panawan a pagtaengan. Kasta metten ti karadkad kabayatan ti kaadda iti dalan. Adu latta ngamin ti mabalin a mapagteng aglalo ta saan latta a maib-ibus dagiti agus-usar iti maiparit nga agas. Ken umad-adu latta dagiti manigsigurado laeng kadagiti kailianda. Maysa pay, ti ubra dagiti dadduma. Manarimaan ti biahe, pagam-ammuan lattan ta puruakandaka iti palpalibong. Ket namak payen no mapakigtotantayo ket naawid ti manibela iti pakaisagmakan? Wenno simrek iti lugan ti impuruakda?

Maysa pay a puon ti disgrasia iti kada Paskua ti panagpanglaing nga agpalibang. Iggamanna ti rebentador uray kalkalpas ti pannanganna iti kankanen a nakapigpigket dagiti ramayna. Tapno mailiklik iti kastoy a disgrasia, no di kabalinan ti di agpaputok, agannad koma laeng. Bugguan pay laeng dagiti ramay sakbay nga agsegged iti paputok.

Saan a gapu ta kayattayo a paragsaken dagiti ubbing, sige, gatangen amin a kayatda. Maigunagunam koma latta ti panagannad. Binsiren a naimbag dagiti ipagatangda, aglalo kadagiti ay-ayam, no adda paset dagitoy a makadisgrasia kadagiti patpatgen nga annak. Kas koma kadagiti babasit a pasetna a mabalin a matilmon dagiti ubbing no kasta a maregkasda dagitoy.

Saan met a paiggaman iti baria dagiti ubbing. No adda nangted iti baria nga aginaldoda, alaen daytoy tapno idulin. Di ipalubos nga ay-ayamen dagiti ubbing. Saan nga umanay ti panangibaga a dida isubsubo daytoy. Apagbiit laeng a malipatanda.

Itay nabiit, maysa nga ubing ti nakatilmon iti baria. Naimbag laeng ti nasigudan ket naitaray iti kaasitgan nga ospital. Pagyamyamanan dagiti nagannak ti ubing, saan a kinasapulan ti operasion tapno mairuar ti natilmon ti anakda. Naimbag ta nalaing ti doktor a naibatang kadakuada. Impakatna ti tradisional a wagas, awan ti operasion, a naadalna tapno mairuarna ti baria.

Wen, itoy a Paskua, maitutop a nakasentro ti imatangtayo iti pudpudno a mensahe daytoy nga aldaw. Awan iti namaterialan a banag ti anag ti Paskua. Adda iti panagkakabsat.

Ket tapno naragsak a pasangbayen ken rambakantayo, annad koma laeng kadagiti ania man nga aramidentayo. #