sinursuran-banner-sqSinursuranNi Jobert M. Pacnis

SINURSURAN: “Awan dayta iti patangantayo idi kalman, Sir!”

MASAPUL ti uppat a COT iti las-ud ti makatawen!

Dayta ti naibaga iti rugrugi ti agdama nga school year. Classroom Observation Tool ti kayatna a sawen ti COT. Form daytoy nga iggaman ti prinsipal a sumrek iti klase ti maysa a mannursuro tapno paliiwenna no kasano ti panagisuro daytoy. Agduduma nga aspeto iti panagisuro ti mapaliiw.

A pakagraduan ti mannursuro!

Ti magupgop a grado iti uppat (maysa iti tunggal grading period) a COT, agbalinto a pakaibasaran no ania ti gradona kadagiti paset ti IPCRF (Individual Performance Commitment and Review Form). Daytoy nga IPCRF, ipakitananto ti rating ti mannursuro iti sibubukel a tawen a panagisurona. Singko (5) ti kangatuan.

Kas nasao iti maysa a LAC (Learning Action Cell) session, no tallo nga agsasaruno a tawen a nababa ti magupgop a grado, mabalin a mairekomenda ti pannakaikkat ti maysa a mannursuro.

Gapu iti dayta, talaga man met nga iti uray ania nga aspeto ti IPCRF, ikagumaan ni mannursuro a nangato ti gradona. Ta uray adda nababa a pasetna, masupusopan dagiti nangato a pasetna.

Nasayaat daytoy a pammilin manipud iti Departamento. Ipamaysa, saan a basta mapilitan laeng, ti mannursuro ti agagawa tapno ngumato ti gradona. Gumaget nga agisuro. Agsaldet a mangtulong kadagiti ubbing. Makikammayet kadagiti kaduana a mannursuro tapno maital-o ti pagadalan kadagiti resulta ti nailian nga eksamen para kadagiti ubbing (a maysa pay a pakagraduan ti tunggal mannursuro).

Sakbay a sumrek ti prinsipal tapno agobserbar iti klase, masapul nga agtaud iti mannursuro ti go signal. Pakaammuan ti mannursuro ti prinsipal no agpaobserbar daytoy.

Gapu iti dayta, makuna a sinaganaan ti mannursuro dayta nga aldaw. Amin a nasursurona idi agbasbasa pay iti Edukasion, ipakatna tapno magustuan ti prinsipal ti panagisurona ket makaukkon iti nangato a grado.

Kalpasan ti pannaobserbar, mapasamak ti post conference iti nagbaetan ti prinsipal ken mannursuro. Ditoy nga ipalgak ti prinsipal dagiti napaliiwna— negatibo man wenno positibo. Iti kasta, ad-adda pay a mapatan-ay ti panagisuro ti mannursuro.

Ken ni mannursuro, ania man a negatibo a mangngegna, agserbi koma dagitoy a karit tapno ipakatna iti inaldaw a panagisurona (saan koma laeng iti aldaw a maobserbar).

Ngem kadagiti dadduma, stressor laeng dayta pannakaobserbar. Nayon a trabaho iti nagadun nga akem ti maysa a mannursuro. Aglalo ket nagadu pay a pappapel wenno report nga asikasuenna uneg ti makatawen a panagklase.

Isu a di nakakaskasdaaw a no dadduma, awanen ti panawenna iti pamiliana. Addan ti sibubukel a kinataona iti pagadalan, kadagiti ubbing, kadagiti pagrebbengan a sinapataanna.

Kadagiti met dadduma, saanen a rumbeng a maobserbarda koma. Mannursurodan. Inaldawen ti panagisuroda sipud nakapasada iti eksamen. Ken sakbay a nakastrekda nga agisuro, kasta unayen ti panagisaganada para iti demonstration teaching.

Uray idi agbasbasada pay laeng.

Apay pay la ngarud dagita nga obserbasion ita ta addadan nga agisursuro?

Ken dayta a pammilin, sipupuso ngata a maipatpatungpal kadagiti amin a pagadalan? Wenno adda lattan dadaulo ti pagadalan ti manggrado iti COT ti tunggal mannursurona. Agsasaritada lattan ta di pay nga isu a panawen a masayang.

Napia la unay dayta ken ni mannursuro no naanus ti prinsipalna. Ngem kasanon dagitay prinsipal a ti la agkitkita iti pakadillawan ti mannursurona? Nupay nalaing dayta a mannursuro, no dina kasunguan ti prinsipalna, saan ngata a mairurumen iti pannakaobserbarna?

Saan a panangibaba daytoy kadagiti prinsipal. Ngem saan ngata a mapaspasamak ti kastoy?

Agtamedak iti natarnaw a panggep daytoy a gannuat ti Departamento. Ngem iti pannakaipakatna, ditan a sumrek ti nagduduma a pagsikapan. Wenno paglaingan tapno maidur-as ti bukod a bagi— mannursuro man wenno ti prinsipal (ta aganninaw met kenkuana no nababa ti grado dagiti iturayanna).

Ta pudno man met a narigat ti mabatbati iti udi wenno ti nababa ti gradona a kanayon.

Ket maysa a pamay-an ti mannursuro ti mangpili iti year level ken seksion a pakaobserbaranna. Sigurado a yunana dagiti adda iti Umuna a Seksion, dagitay yan dagiti nalalaing nga ubbing aglalo la ngaruden no homogenous ti pannakaurnos ti seksion ti pagadalan a yanna. Saanto a paobserbar iti seksion a narigat a makasursurot wenno iti yan dagiti arigna di pay makabasa (wen, addada pay laeng aghayskul a di makabasa a nalinteg ngem limmusotda iti elementaria ta adda met dayta mass promotion a pagtangtangsit itan dagiti nagannak).

Nalawag ti rason no apay a kasta ti aramiden ti mannursuro. Nangato a grado!

Ngem kasanon dagiti mannursuro a kadagiti maud-udi a seksion ti amin a klasena? Kadagiti ‘yan dagiti di pay makabasa iti nalinteg? Wenno dagiti dina ammo ti ag-add, -subtract, -multiply, ken -divide iti uray simple laeng.

Kunaenda nga adda kenka daytan a mangisursuro no kasano a mapagbalinmo nga aktibo, dagiti adalam. Wen, husto dayta. Ngem duma laeng no ania a klase dagiti ubbing ti adda nga iwanwan. Narigatda la ngaruden a makabasa, narigatda pay a makakuenta, ken sigurado a nabaybayag manen a makasurotda iti klase. Kunaento ti prinsipal iti mannursuro a nabuntog unay, saanna a naileppas ti target-na. Ken awan ti learners’ participation.

Ditan a manabtuog ti mannursuro.

Ket tapno saan unay a maibaba ti mannursuro, dita manen a sumrek ti maysa a paglaingan daytoy. Kadagiti aldaw sakbay nga agpaobserbar, bagaan wenno kasaritanan ti sibubukel a klase. I-dry run-nan ti iklasena inton maobserbar. Mapraktis a nalaing.

No acting koma, scriptedto aminen a mapasamak inton aktual a maobserbar.  Kas met laeng kadagiti scripted a rason dagiti lider ti pagilian no kasta a maipasulida iti maysa nga isyu.

Ti mannursuro, bagaannan ni Juan no anianto ti isungbat daytoy ‘ton mapagdamagan iti kaaldawan ti obserbasion. Pammarangto payen ti panagitayag dagiti adalan tapno laeng agparang a kasla aktiboda. Ngem ammonan no asino ti awaganna. Ammo metten ti maawagan ti isungbatna uray dina ammo ti kayat a sawen ti sasawenna.

Tung-edto metten a tung-ed ti prinsipal bayat ti panagobserbarna. No di makadlaw, namaysaan ti mannursurona iti katengngaan ti aldaw!

Ngem no Math ngata ti suheto nga isuro, kasano nga scripted ti mapasamak? Aglalo ket kaaduanna ti masapul ti solution tapno maala ti sungbat.

“Juan, what is x in 2x – 5 = -1?”

“Four, sir!”

“Very good! Kindly show your solution?”

“Awan dayta iti patangantayo idi kalman, sir! Imbagam a ni Pedro ti ag-solve-to!”

Naspak ti rayaraya!

Ngarud, agbalin koma a natudio amin a maseknan iti pannakaipatungpal dagiti pammilin a naadal, nasukisok nga agbalin koma a dakkel a tulong kadagiti agad-adal. Ngem no addanto latta maitibnok a panagkusit, panagsikap iti pannakaipagna dagitoy, uray mano ken uray kasano kaimbag ti panggep ti pammilin, pulos a dinto agballigi daytoy. #