sinursuran-banner-sqSinursuranNi Jobert M. Pacnis

SINURSURAN: Baro a Kinatao

Kolum ni Jobert M. Pacnis

(Maikadua a paset)

SINURSURAN. Ket makitatayo kadagiti rupada, kasla saanda a pakarikutan ti panagbiag– nupay nagrigat (segun iti barometrotayo iti panagbiag) ti panagbiagda. Nakaragragsakda latta a makitkitatayo iti inaldaw.

No apay a ditayo maakaran iti kinaragsakda!

Kasano ngamin, adda dayta panagimbubukod iti pusotayo. Kas koma laengen kadayta panagsusuontayo ti labba nga agdaldaliasat iti kabakiran. Kayattayo a punnuen, ‘tay awan ibatitayo iti makita a pagnumaran iti madalanan. Sa inton madagsenantayon a mangyawid, agreklamotayon.

Nagsimple la koma ti solusionna: ibati dagiti dadduma. Wenno i-share (kas iti facebook) dagiti pagimbagan.

Ngem ti rigatna kadatayo no maminsan, saantayo nga ammo nga iwaras ti grasia nga adda kadatayo. Nakapokustayo iti bukodtayo a bagi.

Kadaytoy a panagpokustayo iti bagi, in-inut a rumusing dagiti di maikanatad nga ugali. Inton agtanoy, ad-adda a mangpakomplikado ti panagbiag. Awanen ‘tay ragsak nga itden koma ti nasimple laeng a panagbiag.

Dagitoy di maikanatad nga ugali, aw-awid, isuda dagiti makunkuna a Pito a Makapatay a Basol: (na)pangas, na(sadut), (na)pungtot, (na)agum, (na)rawet, (na)gartem, ken (na)apal.

Iti aglawlatayo, aduda dagiti napangato ti isbona. Pangas, kunatayo. Nangato unay ti panagkitada iti bagbagida, dida ipirpirit ti ideya, pammagbaga, wenno opinion ti sabali. No makidinniskusionda, saanda a kayat ti maabak. Isudat’ kalaingan! Agpammarangda pay nga ammoda ti amin.

No ammoda la koma ti nasao ni John Ruskin: Ti kinapangas ti ramut dagiti dadakkel a panagbiddut.

Kasta met nga adu ti sadut kadatayo. No asino pay dagiti marigrigat, isuda dagiti makitkitam a nakauldag latta iti sirsirok ti kaykayo iti paraanganda. Isuda dagiti kanayon nga agsasarita iti biag ti akimbiag. Isuda dagiti mangnamnama latta iti sugal. Dinadaras ti ania man a trabahoda isu a kanayon a palpak. Nalaingda pay nga agkikil.

Iti kadarapatmi nga ili, adda aw-awagan dagiti drayber ti dyipni iti Mr. Beinte. Kasano, idi damona ti ag-traffic enforcer, palugodanna dagiti dyip nga aglikaw iti sentro (nupay maiparit) sakbay nga agbiaheda manipud iti terminal ta isu pay a maalada a pasahero. Dayta ket kasukat ti beinte a pisos nga ipapetpet dagiti drayber kenkuana.

Saan metten a karkardayo ti kasta a pasamak. Kadagiti damag iti telebision laengen, nagadu ti mairekreklamo a traffic enforcer idiay Manila gapu iti panagkikil a trabahoda.

Saanda ngata nga ammo a babantot laeng daytoy iti biagda?

Kinamanagpupungtot, adu latta met ti kasta a masagsagangtayo. Adda la bassit a biddut, agpungtotda. Awan serreg dagiti ngiwatda nga agsao iti uray di malamlamut ti aso. Kadawyan pay nga awan ti panagtalekda iti padada a tao, daytay la agsapsapul ti biddut ti sabali ti pakakumikomanda, ken saanda nga ammo ti mamakawan kadagiti nakabasol kadakuada.

Kinaagum. Adu dagiti di agkakatunosan nga agkakabagian gapu itoy. Mapugsat ti kinnayammet gapu kadaytoy. Ta di latta maawan, kangrunaan dagiti impluensiado a tattao, dagiti mayat nga agagum, agsamsam iti sanikua ti sabali. Pannakadiosda ti kuarta, dagiti material a banag. Didan ikankano ti rikna dagiti mapasakitanda.

Kinarawet. Iti punsionan, adu dagiti madmadlawtayo a kastoy. Sublida a subli iti lamisaan. Didanto pay agpatingga dita. Mangibagadanto pay laeng iti yawidda. Kasla dida mabmabsog, alaenda pay no dadduma ti taraon a para iti sabali. Kasla kurang ti panagbiagda no awan ti maipaunegda iti oras a kayatda.

Kinagartem. Saan laeng a maipanggep iti seks daytoy. Mabalin pay a panaggartem iti bileg ken pannakaam-ammo iti gimong. Aramidenda amin a kayatda, magun-odda la ketdi ti paggartemanda.

Kamaudiananna, kinaapal. Normal laeng daytoy iti maysa a tao. Ngem ti saan a normal, isu ti dakes nga apal. No koma umapaltayo, pagbalinentayo a karit daytoy tapno iti nasayaat a wagas, maaddaantayo met iti/kadagiti banag nga ap-apalantayo.

No addaantayo kadagiti naagapad a panagug-ugali, panawenen nga uyosentayo dagitoy iti kinataotayo tapno agbalin a nalag-an ti panagbiag. Panagbiag a naragsak nupay simple laeng a makuna.

Daytoy koma a panangabaruanan, pananguyostayo iti daan a kinataotayo, ti ipangpangruna nga isaguttayo iti bagbagitayo ita a Baro a Tawen.

Ta awan ti kas iti panagbiag a naragsak, awan ti pakadanaganna gapu kadagiti di maikanatad nga aramid ken ugali. Panagbiag a kain-innisem ti amin a masabat ken am-ammo.

Nasalun-at ken Naparabur a Baro a Tawentayo amin!#