Footer

SINURSURAN: Comply before you complain…

MATH 7 ken AP 7 dagiti isurom, sir, kasla nakangngeg a tuleng kadayta a kinuna ti kaduada iti dayta a lawas a manarimaan ti Brigada Eskwela. Ti nasao a kaduada ti naynay nga agar-aramid iti schedule-da iti pannarabay ti dati ken ti kabarbaro a prinsipalda.

Limed a napayaman. Iti udina, ibisikna manen ti ammona iti Matematika a makuna a major-na. Saan met la nga agngudel ti utekna.

Iti kalkalpas a tawen, naikkat ti Math nga isurona iti dina ammo a rason. Riniknana daydi a pasamak ta sakbayna, naidanonna pay dagiti ubbingna iti MTAP Finals a kas karasay ti tudo iti kalgaw a mapaspasamak iti pagadalanda.

Ngem asino koma nga agreklamo? Comply before you complain, kunada ngarud. Narigat no ibagada a kasla kalaingan nga agpili iti isurona.

Naikkan ketdi kadagiti sabali a suheto kas iti Aralin Panlipunan (AP) 9 ken TLE-Agriculture ken Horticulture.

Nupay agdadamo nga agisuro iti TLE, inawatna a sipupuso. Inkakaubinganna ti agmulamula. Managbasa pay iti magasin ken libro nga adda pasetna nga agrikultura.

Ken di latta nagreklamo kadayta AP 9 a naited idi kenkuana. Makalawas la idin sakbay ti panaglukat ti klase. Mangnamnama nga iggemna latta, iti maikatlo a gundaway, ti Math 7. Kellaat a naawagan a mapan maki-regional training iti AP 10. Damo a tawen a maipakat ti linaon daytoy: Mga Kontemporaryong Isyu.

Nupay adda panagkitakit ti riknana, ta adda met AP major a nakatoka a mapan ken agisursuro iti dayta a suheto, saan lattan a nagtimtimek. Comply before you complain… Ninamnamana lattan nga isurona apaman a malpas ti training nga apagisu a lukat ti klase.

Ngem naklaat laengen idi agsubli. AP 9 (Ekonomiks) ti naited kenkuana. Naammuanna a di kinayat ti AP major a kaduada nga isuro ti AP 9 gapu iti kaadda kano ti Math a pasetna. Kiniddawna iti prinsipal nga AP 10 lattan ti maited kenkuana. Napatgan a dagus a di man la naikalbit kenkuana idinto nga isu ti napan nag-training.

Nagpanaas ti riknana. Ania ngarud ti serserbi ti dinar-ayanna a training?

Ti pay nangdegdeg iti panaas a nariknana, ti pannakaikkat payen ti Math 7 nga isurona! Maysa a kaduada ti dua a grade level a Math ti isurona—Math 7 ken Math 9!

Sagdudua laeng a seksion ti tunggal year level iti pagadalanda. Uppatda a Math major. Koma, kas iti kallabes, saggagaysada a year level ti iggem a Math. Sinanudan koma ti maysa kadakuada dayta maikadua a Math. Ta awan ngaruden ti mapan kenkuana! Maysa pay, por delicadeza, adda kabsatna iti Grade 7 nga isurona. Tapno maliklikan koma ti sasao iti ruar, saanna a rebbeng nga awaten.

Nagsao. Imbagana a kukuana la koman ti Math 7. Ngem saan a napatgan ta kurang no kua kanon ti oras a panagisuro ti kaduada.

Math 9 ngarud ti impatangna nga isurona yantangay isu met a talaga ti load-na idi damdamona ti makastrek iti pagadalan. Ngem di latta napatgan ta Grade 9 ti pagadbayseran ti nasao a kaduada ket awan no kuan ti isurona iti bukodna a siled.

Ania pay, kasla nalapsutan a tukak iti dayta a tawen!

Inay-ayna la unay ti bagina iti nakapay-anna. Ngem ania ngarud, comply before you complain lattan. Saanen a nagtimtimek.

Nabagaan nga ipamaysana lattan ti TLE-Agriculture ken Horticulture a maysa kadagiti major dagiti adda iti Grade 9 ken Grade 10.

Iti pagadalanda, maymaysa ti TLE ti Grade 7 ken Grade 8. Ngem inton dumap-awda iti Grade 9, nawayadan nga agpili iti major-da: Horticulture/Agriculture, Foods, Beauty Care ken Computer. Ti mapili dagiti ubbing, isunto ti ituloyda iti Grade 10. Saanen a mabalin nga ag-shift-da.

Aklonenna, nagbalin nga aglaladut kadagiti immuna a lawasna nga agisuro. Awan la ngaruden ti Math-na, dina pay isuro ti in-training-na.

Ngem idi agtanoy, in-inut nga impategna dagiti baro a suhetona. Iti amin a kabaelanna, imbisikna dagiti ammona a pamuspusan tapno maawatan dagiti ubbing dagiti isurona nupay saanna a linia dagitoy.

Nupay kasta, addada latta dagiti gundaway nga ay-ayenna ti bagina. Pangliwliwana lattan ti “comply before you complain.” No kasta a madlawna nga agpulkok, pamrayanna ti agsuratsurat kadagiti daniw, sarita ken salaysay.

Nalpas ti tawen a dina napupuotan. Sabali payen ti mangidaulo kadakuada. Nakarambola dagiti prinsipal.

KET kasta la unay ti ragsakna iti dayta a kaadda manen ti Math nga isurona kas inkissiim ti kaduada.

Nagmimitingda sakbay a nagngudo ti lawas ti Brigada Eskwela. Ingunamgunam ti kabarbaro a prinsipalda a masapul a nakasaganada iti panaglukat ti klase. Namnamaenda kano nga adda kellaat nga aggapu iti ngato a mangbisita kadakuada.

Ngem idi saggaysaen nga ibasa ti prinsipalda dagiti load-da, anian a pannakalpay dagiti abagana. Awan manen ti Math-na! Adda AP ngem iti Grade 8. Sa English!

Pagkapsutanna ti English isu a medio nag-react. Ngem awan kanon ti sabali a suheto a mabalin a maited kenkuana. Nasiputanna ti panagkikinnissiim dagiti kakaduana. Naimbag ta nagsao dagitoy. Maala kano met amin dagiti titser nga English major ti nasao a suheto.

Imbes ngarud nga English, naited kenkuana ti sibubukel a MAPEH 7. Napakiet pay ta ania ti ammona kadagita? Pumadaya-pumalaud ti timekna; agpada a kanigid dagiti sakana, uray simple nga step ti sala, awan ammona. Health, ania ti pamalpalatpatanna? Arts, di pay makabukel iti tao a nalimpio no agdrowing!

Napasanamtek laengen iti isipna! Agkarkarawanto la ketdi iti lengguahe dagita a suheto!

Gapu ta kaaduanna nga orientation iti umuna nga aldaw a serrek, saanda pay unay a nagklase.

Iti maikatlo nga aldaw, a medio nagsimpan dagiti naladaw a nagenrol, nagbaliw manen ti suheto nga iggemna. Nanayonan pay iti MAPEH 8. Ad-addan ti panagkiet ti riknana. Sa pay adda Values wenno ESP. Nauyos ketdi ti AP 8. Comply before you complain manen?

Nagbalin payen a dua laeng ti major ti TLE dagiti adda iti Grado 9 ken Grado 10. Naikkaten ti Agri/Horti ken Foods.

Ngem di pay nalpas ti umuna a lawas, naisubli ti Foods ta sayang kano met ti NCII dagiti kaduana no saanda nga isuro ti nagrigrigatanda a sinerkan iti TESDA kadagiti aldaw ti Sabado ken Domingo a bakasionda koma.

Rugianna koman ti agklase iti sumuno a lawas ngem, manen, nasuktan dagiti isurona. Awan manen ti MAPEH 8. Gapu ta saan pay a nalpas ti papel dagiti dadduma a titser a makaduada, naited nga adbayseranna pay laeng ti maysa a seksion ti Grade 7 ken alaenna ti Science (ta Science major ti sumrek a baro a kaduada) dagitoy. Kasta metten ti Science 8. Nauyos met laeng ti MAPEH 8 kenkuana.

Nariing manen daydi riknana iti napalabas a tawen. Isuna laeng, iti dagupda a duapulo, ti awan ti isurona a major-na. Dayta la unay ti paglaladutanna. Nupay kasano ti pananglinglingayna iti bagina, panagriknana, adda dayta pannakaikuskuspil kenkuana.

Inton sumrek, apaman a malpas daytoy ti papelna nga agpa-homebased, ti talaga nga adbayser ti ig-iggamanna ita, mauyos amin a Science kenkuana. Mano laengen nga oras ti nabati a panagisurona iti makalawas? MAPEH 7 (maysa laeng a seksion) ken Values (ESP), mapan laeng nga innem nga oras!

Agparparang nga awanton ti papelna iti pagadalan! No masiimandanto idiay ngato, mabalinda nga ikkaten wenno ipuruak kadagiti dadduma a pagadalan. Ti dakes no ag-mobile-to metten. Saan laengen a maymaysa a pagadalan ti pagisuruanna tapno laeng masupusopan dagiti orasna.

Excess teacher. Sobsobra. Kastanto ti status-na iti masungad nga aldaw. Dayta ita ti pagdandanaganna la unay.

Iti kitkitaenna nga oras dagiti kaduana, kasla adayo a maikkatan dagitoy tapno laeng maitedto kenkuana. Ngangani amin dagitoy ti adda laeng iti minimum a bilang ti oras nga agisuro. No maikkatanda, agparangto metten nga underload-da!

Comply before you complain. Mautobna ita, narigat no isu lattan ti pagtaktakderanna a kanayon tapno laeng saan a makuna a natangsit wenno managpili.

Wen, ammonan… #