Sinursuran: SINURSURAN: Dagiti siit iti biag | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

SINURSURAN: Dagiti siit iti biag

SIIT. Natarumamis a siit. Nasakit, naapges ti mapurisan, ti matudok iti siit. No agnunog, maimpeksion ti sugat, mabalin nga iddepenna ti iggem a silaw no di malapdan.

No met siit ti ikan ti rason, ammotayon nga adda kabulonna a pannuron.

Dimonto la ngaminen ngalngalen ‘ta kanem…

Kaska la maag-agawan… Sadanto ilibasan nga ikkan met laeng iti siit ti ulo iti pammati a makatulong daytoy a mangpababa iti nagsagud a siit iti karabukob.

Dagitoy a siit, pisikal laeng a sakit ti itdenda. Aglunit ken agimbag no agasan/ipaagas. Malipatan iti panaglabas ti panawen. Maugasan a kasla tapok.

Ngem iti biagtayo, adda dagiti siit a narigat a malipatan. Tugottugot ida iti inaldaw a panagbiag. Paset ti biag/panagbiag.

Siit a mabalin a naipalaytayo iti padatayo a tao. Wenno siit a naibalangat ti biagtayo.

Dagitoy a kita ti siit, saan laeng a pisikal a sakit ti ipaayda. Naun-uneg a sakit— mental ken emosional.

Sakit a suotenna ti adda a kinatao ti tunggal maysa. Natibker ngata met laeng ti pundasion ti kinataotayo? Nakasadag met laeng Kenkuana?

Saantayo a mautob no kua nga addada gayam maipalpalaytayo a siit kadagiti makapulpulapoltayo. Ngamin, iti panangingipapantayo, normal pay laeng dagiti maar-aramidtayo.

Ngem iti panangutob kadagitoy, naglabesda gayamen iti uged. Naipaloken dagiti siit iti kinatao dagiti nadalapustayo.

Ti yanna nga adat, ditayo aklonen a datayo ti nagtaudan dagita a siit. Ma-pride pay laeng ti tunggal maysa.

No koma laeng ngamin ammotayo nga utoben ti bagbagitayo. Ikkaten dayta nakangatngato a panagkita iti bagbagi. Ikonsidera ti rikna dagiti kakabsat.

Ket no iti panagkuna, mayayon pay laeng iti nabalitokan nga aw-awid dagiti naaramid, awan ngarud ti pagdanagan a makaipalay dagitoy iti siit.

Ngem no maamiris a saan gayamen a maikanatad dagiti naaramid, rumbeng laeng nga agpakumbaba, aklonen dagitoy a nagkamtudan wenno nagbiddutan. Agasan dagiti naparnuay a sugat.

Saan koman a pagturayen ti kinangato ti purua!

Iti sabali a bangir, no datayo met ti nakaipalayan dagiti siit, ammotayo koma ti mamakawan. Saan a pagarien ti gura iti puso ken isip.

Ta asinotayo koma a di mamakawan? Adda dita ti Anak ti Dios, ti Anak ti Tao, a nagsakripisio, nagtuok, natay, naitanem gapu kadagiti siit a naipalaytayo iti padatayo a tao. Mapakawan laeng dagiti naaramidantayo a babak!

Itoy a pannakaammo, maitutop laeng a lipatentayo dagiti siit a nasagraptayo. Pakawanen dagiti nakaigapuan dagitoy. Ikagumaan ti umaddang.

Ngem addada siit a sagsagabaentayo a ditayo ammo ti tuduen a nagtaudan dagitoy. Siit a di maitarayan. Mabalin payen a bukod a bagi ti pabasolen.

Iti pannakaipalay, pannakaibalangat ti siit, umagibas ti pannakaburibor. Maawanan iti namnama. Ket no di maaluadan ti bagi, mabalin a makapanunot iti di rumbeng tapno laeng malibasanna ti sakit, liday, apges nga itden dagiti siit.

Aglalo no iti panangipapan, awanen ti kabadang a manglaban kadagiti sakit a malak-aman. Daytay iti panagriknam, siksika laengen ti lumablaban. Awan man laeng ti mariknam a suporta nga agtaud koma kadagiti ipatpateg iti biag.

Dagitoy ti rumbeng koma a maliklikan. Wenno di maitutop a mapasamak. Saan a solusion ti isusuko. Wenno panangtallikud kadagiti siit.

Kunada ngarud, saan a naited dagitoy a siit a balangattayo no di namnamaen ti nangipaay a ditayo kabaelan. Wagasna daytoy a mangsuot iti pammatitayo Kenkuana. Pagpatinggaan ti relasiontayo Kenkuana?

No nakaramut iti nasayaat a kababalin ti kinataotayo, nalakatayo laeng a mautob dagiti nagbiddutantayo, dagiti banag a nakaparnuayantayo iti siit a naipalok kadagiti kakabsat.

Ket saantayo a makaidna. Makonsensia. Daytoy a karirikna ti namunganayan ti naputartayo idi a daniw, innem a tawenen ti napalabas.

Mailansaak Met Koma

Pagnaek ita ‘toy nawatiwat a dana
Nga agtunged iti Bantay Kalbario
A nausatan iti bukodko nga aramid.

Dapandapanak a magna iti kangitingitan
Ti agtindek nga init; diak samiren
Ti kuddotna a tumulang ti ut-otna.

Kas Kenka, baklayek ti bukodko a krus
A siuuksob, sibabalangat iti siit
Dagiti impalakayko a panagem.

Pakawanennak, saan a panangtulad daytoy
Iti kasasaadmo wenno kinataom–
Kayatko laeng a maugasanak.

Wen, kayatko met ti mailansa
A mabugbugkawan, mapagsasawan, malalais,
Maduyok iti pika dagiti inay-ayatko a kakabsat.

Diakto ipukkaw ti panangngaasim
Wenno panangakkalmo kaniak iti krus
Ngem itanamitimkonto ti pammendisionmo.

Umanayen, O Jesus
Ti apagapaman a panangtaliawmo kaniak
Sakbay nga igupennak ti sipnget.

No saantayo a naruam a makasair iti rikna, saannatayo a pagtalnaen ti konsensiatayo. Aramiden amin a kabaelan, amin a pamuspusan tapno makakiddaw iti pammakawan kadagiti nasaktantayo.

Banag a tagiuray ti Nailansa a Kristo!

Iti panangaklon kadagiti siit a naaramidan, lumag-an ti krus, rumabaw dagiti siit a maipalpalay Kenkuana.

Yur-urayna a kanayon ti pannakautobtayo kadagiti naaramid ken ar-aramidentayo. Saan a maum-uma nga agur-uray iti panagsublitayo.

No ditayo kabaelan dagiti siit iti biagtayo, sisasagana pay a mangibalangat dagitoy tapno laeng saantayo a masaktan.

Anian a kita ti panagayat! A rumbeng laeng met a supapakan babaen ti panangipaay laeng iti ayat, saan a siit wenno sugat, kadagiti kakabsat.

Itoy a wagas, awan papananna no di agwaras ti ayat, mapno ti lubong iti kappia ken ragsak.

Ania ket ngatan a nagragsak ti agbiag, ken panagbiag! Nagragsak ket ngatan ti Lubong!

Intayo ngarud laglagipen a saan a pannakaibaba ti kinatao ti panangaklon iti naparnuaytayo a siit. Nabalitokan ketdi daytoy nga ugali a rumbeng a mataginayon.

Ken saan met a pannakaidasay ti kayat a sawen dagiti siit iti biagtayo. Ramenda laeng ti biag a rumbeng a paglasatan para iti nasamsam-it a biag.

Umaddangtayo a sibabalangat dagiti siit. Saantayo nga agsarimadeng. Adda ti nakadeppa iti Krus a mangbayabay kadatayo.

Sam-itentayo ngarud dagiti siit. Iti yuunegda iti bagitayo, umun-uneg met ti relasiontayo Kenkuana nga adda ita a mangsubbot kadagiti siit iti biagtayo.