sinursuran-banner-sqSinursuranNi Jobert M. Pacnis

Sinursuran: Intay Sarabuen iti Sitatarnaw a Puso

Kolum ni Jobert M. Pacnis
(Maikadua a Paset)
NUPAY modernon ti panawen, saan latta a maaw-awan dayta resolusion no kastoy a panawen. Baduy, kuna payen dagiti dadduma no maamuanda nga adda met ilislistam a New Year’s Resolution-mo.

Ta kaaduanna a di matungtungpal!

Tapno saan nga agparparang nga arkos laeng iti panangsarabo iti Baro a Tawen ti resolusion, masapul nga igunamgunam dagiti sumaganad tapno di mairaman kadagiti 88 a porsiento a di makatungtungpal kadagiti kayatda nga aramiden iti biagda:

Dimo unay kaaduen ti agilista iti resolusion. Dua agingga iti uppat, mabalinen. Nalaklaka a magun-od ti kayat.

Mangpadas iti baro a banag a di lattan iti gagangay nga ar-aramidem. Rummuarka iti lubongmo. Kas pangarigan, sursuruem ti agsurat iti daniw wenno sarita; wenno agsursuroka nga aggitara; wenno agmulamulaka.

Mangipasdekka iti targetmo. Kas pangarigan, masapul a makasuratka iti uneg ti makabulan. Paipablaakmo no isu. Wenno makapasabong, wenno makapabungakan iti mulam iti uneg ti dua a bulan. Karit dayta aglalo no maysaka kadagiti kunkunada a napudot dagiti imana nga agmula.

Gunggonaam ti bagim iti kanito a magun-odmo ti targetmo. Iti daytoy a wagas, agubbog ti ad-adu pay a determinasion a mangragpat iti insurat a rersolusion.

Awatem dagiti pakaitibkolam. Iti ania man a gay-at wenno addang, adda latta a pasalsali dagiti pakaupayan. Ngem saan koma a dagitoy ti mangdadael iti narugiam. Agserbida ketdi koma a karit. No imbasura ni Apo Editor ti sinuratmo, ay, ket,yad-addam pay nga adalen dagiti ey-bi-si ti panagsuratan. Agbasaka kadagiti adu a libro; agpabalakadka kadagiti am-ammom a mannurat; dumar-ayka kadagiti seminar. Apay no kabaelanda, saan ketdi kenkan? Adda laeng dayta iti panangikumit ti bagi iti ania man nga aramiden.
Iti ania man nga aramiden, masapul ti inspirasion. Ngarud mangsapulka iti inspirasion tapno makasuratka iti napintas wenno iti magustuan dagiti editor iti pagsuratam a pablaakan. Ti inspirasion, saan laeng nga agtaud iti tao. Mabalin ti aglawlaw, ti pamilia, ti arapaap nga agbalin a nabunga ti panagbiag. Ay, adu ti mabalin a pagtaudan ti inspirasion!

Kuna dagiti eksperto, saan laeng a matun-oy iti maymaysa nga aldaw wenno lawas ti bunga ti baro a banag nga insayangkat. Bulan wenno tawen kano. Ngarud, masapul a repasuem dagiti naaramidamon tapno matun-oy daytay resolusion nga insuratmo kalpasan ti dua wenno tallo a bulan. Kasanon kaadayo dagiti naaramidam? Ania dagiti ganuatmo a di gayam nakatulong iti panagdur-as ti resolusion? Isardeng dagitoyen. Mangirusuat iti baro.

Ken kas nasao itayen, no maragpat ti tunggal agpang iti pannakatungpal ti resolusion, ken nasaysayaat pay ketdi no natun-oyanen wenno naaramid dayta a resolusion, gunggonaan ti bagi. Dagitoy a gunggona, saan met a masapul ti material a bagay. Adu dagiti banag a mangparagsak, mangpatalinaay iti bagi, mangikkat iti stress. Apay a di agpasiar kadagiti aplaya ket imdengan ti samiweng a gubuayen dagiti agbangon ken agburak nga allon?

DITAYO met liplipatan ti ispiritual nga aspeto ti biag. Utobentayo ti bagitayo. Ti kadi dana pay laeng a kayat ti Dios a surotentayo ti adda a pagpagnaentayo?

Iti naglabas a tawen, mabalin nga adu dagiti pasamak a nangigawid iti panagdur-as ti ispiritual a kasasaad ti bagitayo. Ikkan ita iti pateg daytoy. Iprayoridad.

Bumisita ita ti lider ti Simbaan iti Sangalubongan, ni Papa Francis wenno Lolo Kiko, ditoy pagiliantayo kadaytoy nga Enero. Dakkel unay a banag daytoy iti panagbiagtayo. Manmano ti kastoy a gundaway (maikadua iti pakasaritaan ti pagilian) a bisitaen ti maysa a Santo Papa. Gundawayantayo ngarud daytoy.

Intayo sarabuen ti idadatengna nga addaan iti sitatarnaw a puso. Ikumittayo ti amintayo kadayta a gundaway a mangutob iti kinaasinotayo. Makuna kadi nga anaknatayo ti Dios?

Iti ibibisita ti Santo Papa, pabaknangentayo koma ngarud ti kinataotayo. No di maisapar ti makipagsabat kenkuana iti Kamaynilaan, mabalin latta met a makipasettayo babaen ti siuulimek a panangutob iti kinataotayo. Repleksion. Panawenen nga ipamaysa daytoy a banag. Banag a nagpintas a pangrugian ti “baro” iti biagtayo, ti “baro” a kinataotayo.#