Footer

SINURSURAN: Kalgaw… Kalgaw Manen

Kolum ni Jobert M. Pacnis

(Maudi a paset)

Ket saan a diak malagip a ditoy laeng ti nagtataudan ti pinangpabasada kadakami nga agkabsat. Kanayon idi a maigasatda ti panagmulamulada iti utong ken kamotit a para uggot. Nadam-eg ngamin a kanayon ti daga dagiti tambak isu a nasalun-at latta dagiti mulana. Saan met a kabalinanen dagiti maimula iti bangkag ti agbiag no di naynay a sibugan ta panaraten. Makset dagiti mula.

Isu nga apaman nga agapit idi da tatang, dakkel bassit ti mapaglakuanda. Awan ti kakompetensia. Bassit ti suplay. Awan ti agtaud uray kadagiti kabangibang nga ili ken uray pay kadagiti agbiahe nga aggapu idiay Ilokos, awan ti utong wenno uggot ti kamotit a yegda. Pangpakbet ken para chopsuey ti kaaduanna.

Agpapan ita, di pay laeng a nagsarday da tatang ken nanang iti panagmulamulada iti bangkag ken tambak dagiti piskeria. Adda latta maanninawak a ragsak iti rupada no kasta nga agapitda.

Ket adtoy manen ti kalgaw. Nakalaplapsat dagiti mulada nga utong kadagiti tambak. Awan ti idawdawatko a di koma dadaelen ti tiempo tapno adda latta pangalapkapanda ken ubbog ti ragsakda.

Panawen pay ita ti panagturpos. Nadumaduma manen a ladawan ti maimatangan kadagiti nagannak a nangyarado ti bagida tapno laeng mapagturposda dagiti annakda iti ayatda a dinto lak-amen dagitoy ti rigat.

Nagasat la unay dagiti nagannak nga addaan iti annak a nasingpet ket sagutan ita dagitoy iti diploma a tagiurayda. Saan la ketdi a mailadawan ti ragsakda. Kamaudiananna, addan igam dagiti annakda a makidangadang iti biag. Saanto idan a mailidlid-i iti gimong. Natibkerdan a dumuprak kadagiti rigat. Saanen nga asiasi ti panangbalballaibo kadakuada dagiti addaan wenno dagiti nakatugaw iti trono. Puero delos buenos met ngamin, no asino pay dagiti lider, isuda ti ad-adda a mangimammameg kadagiti iturayanda.

Saan a diak madakamat ita ti mapaspasamak iti pagilian. Makapadurmen dagiti damag a panagpipinniltak dagiti lidertayo. Kutitnan, ikalukagnan. Awan mayat a paatiw.

Kadagitoy a drama a mapaspasamak, saan a di datayo nga ordinario nga umili ti matda a kakaasi. Asino pay ita ti patientayo kadakuada? Asino ti napaypayso kadakuada. Pagdaksanna ta maapektaran ti trabahoda. Imbes nga asikasuenda ti sinapataanda a pagrebbengan, addada dita nga agbibinnansag iti pitak.

Biag nga agpayso ditoy pagiliantayo! Tsk-tsk!

Ti nakaay-ay-ay ita a kalgaw, dagiti nagannak a nangnamnama nga agturpos dagiti annakda. Yanna nga adat, sabali ti naturong dagitoy a dana. Rinippuogda ti arapaap dagiti nagannakda.

Ngem saanna met ketdi a kayat a sawen a ditan nga agpatingga ti biag. Baliwan ti tunggal maysa ti umaddang. Mangabaruanan. Baliwanna ti mangrugi. Dagiti nagannak, saan a didanto bayabayen dagiti annakda nga agkarkari nga agbalbaliwen. Ania pay ngamin, aya, ti nasamsam-it no di ti panagballigi a nagdalan iti adu a pannubok.

Agbalin koma nga inspirasion ti tunggal agad-adal dayta nagnumero uno iti board exam ti kinadoktor. Nagtaud iti nanumo laeng a pamilia. Traysikel drayber ti amana. Nagsardeng met iti mano a tawen a nagbasa ta nagtrabaho. Ngem napanunotna, maymayat met laeng no matun-oyna ti arapaapna. Ket intuloyna. Ket sinabat ti gasat. Indauluanna dagiti pimmasa iti medical board exam!

Dakamatek metten ditoy, yantangay ta mainaig met laeng iti kalgaw, ti pannakapno ita dagiti aplaya, karayan, dan-aw, burayok ken kaarngida. Agdudupudop dagiti mapan agpallailang ditoy tapno makarikna iti bang-ar.

Makiddaw koma laeng nga agbalin a manakem ti tunggal maysa. Ammuen dagiti pagrebbengan kas makipagili iti pannakatagiben dagitoy. Dagiti basura la unay. Saan a basta iwara lattan. Agbalin a responsible. Basuranan, idalimaneknan.

Kalgaw… wen, kalgawen. Pagbalinentayo koma daytoy a panawen a panangarisit iti kinataotayo yantangay lagipentayo pay dagiti rigrigat ni Kristo Hesus idi adda sadi-Bantay Kalbario a nagtutuok gapu kadagiti basbasoltayo. Saan a basta lang-ay latta manen ti obraentayo. Pagbalinentayo a produktibo ti biagtayo… saan laeng nga iti material a banag no di pay ket iti espiritual!#