sinursuran-banner-sqSinursuranNi Jobert M. Pacnis

Sinursuran: Kasano Metten ti Pagtaengantayo?

Kolum ni Jobert M. Pacnis
(Umuna a paset)

KASLA kaano laeng daydi iseserrek ti agdama a tawen. Ita, nganngani manen pumakada. Makatawen man laengen ti naglabas. Nagpardas ti panawen!

Ita, saludsodentayo man no ania a klase ti pagtaengan ti dinakkelan wenno immanehotayo. Naipatungpal kadi dagiti panggep nga aramiden? No saan, apay? Sadino ti nagkabsiwantayo?

Malagipko idi ubingak. Nasapa nga agriing da tatang ken nanang tapno aglutoda iti pammigatmi. Kaaduan nga alas tres iti parbangon ti ibabangonda a kumanaskanas iti kosina ti kalapawmi iti tengnga ti bangkag. Paglinglingayanda ti agdengngeg kadagiti damag iti radio kabayatan ti panaglutoda. Isu a di pulos maudi iti damag ni tatang. Nalaing pay a mangamiris kadagiti isyo. Kasta metten iti mangngeganna a kasasaad ti panawen—aglalo no adda dumteng nga allawig. Kinapudnona, isu pay ketdin ti pagdamagan dagiti kaarrubami no maapektarankami wenno saan iti dumteng a bagyo. Kasano, no ketdin nagrubuat ti bagyo iti Aurora, Quezon, wenno iti Catanduanes wenno iti dayaen ti siudad ti Tuguegarao, siguraduenen dagiti dadduma a madidigrakami. Saandan nga ammuen, anagen no kasano ti dalan ti bagyo—naamianan kadi wenno palaud-a-paamianan ti dalanna? Ngem ken ni tatang, dayta ti kitaenna a maysa agraman no kasano kangato ti bagyo a dumteng.

No dadduma, ala una iti parbangon, bumaringkuasen ni tatang. Kaduana dagiti tallo nga asona, manarukoyda idiay baybay nga agarup dua gasut a metro iti amianan ti purokmi. Magudua ti baldi a yero iti yawidna a tarukoy. Dagitoy ti ikamakamda a lutuen a pammigatmi. Nupay no adda, nungka a pailakona ken ni nanang. Pangaldawmi dagiti mabati.

“Alangan nga ilakotayo satayto met laeng gumatang iti masida?” kunana man.

Kaaduan a pasado alas kuatro pay laeng, mamigatkamin. Ditoy a nairuammi ken ni ading ti nasapa nga agriing– a puon ti dimi pakaladawan a sumrek iti pagadalan idi addakamin iti elementaria ken sekundaria. Madalusanmi payen ti paraangan sakbay a sumrekkami.

Kabayatan ti pannanganmi, saan a maungpot ti istoria ni tatang kadagiti naglablabasanda aglalo idi panawen ti gubat; dagiti padasna idi baro pay laeng nga agtabtrabaho iti maysa nga establisimiento idiay ili; politika iti ilimi; dagiti pannakigapgapasda nga agkakabsat iti adayo a barangay ti ilimi (agtallo oras a magmagnada) ta nasapada a naulila iti ama; ken ti agdama a kasasaad ti pagilian.

Dina met malipatan ti mangbagbaga kadakami nga agkabsat. A sayaatenmi ti panagbasami ta daytoy laeng ti maipatawidda kadakami nga annakda (agpadada a di nakalpas ken ni nanang iti kursoda). Agbalinkami a mapagpiaran ken nasingpet nga indibidual.

Apaman nga aglawag, agkuyogen dagiti dadakkelmi a mapan agburas iti nateng a mulada iti bangkag wenno kadagiti tambak dagiti piskeria iti batogmi. Saan a pakumpra ni nanang dagiti tagilakona. An-anusanna a mapan ilako idiay plasa. Malagipko la unay idi elementariaak pay laeng. No awan pay ti bunga dagiti utong wenno uggot ti kamotit nga ilakona, sangaarakupan a rineppet a balangeg ti ilakona idiay ili. Saan pay nga uso idi ti feeds a pagpakan iti baboy. Agarup duapulo a reppet a para bugbog a balangeg ti ipailina iti inaldaw. Mapmapno ti kargadera iti likud ken tuktok ti traysikel a paglugananna.

Gapu kadagitoy a tagilakona, nakalak-am iti sao dagiti adda nabatayanna idiay ili. Misis Balangeg ti imbirngasda kenkuana. Inkugtakugtar pay dagiti para arkabala dagiti tagilakona iti naminsan. Indissaag ngamin daytoy ti drayber iti abaga ti kalsada ket dina pay naiplasplastar idi makita dagiti taga-munisipio. Ayna, ta dida man laeng inikkan iti gundaway a maipaigidna amin. Pinagikugtarda lattan dagiti tagilakona.

“Sir, ipapaigidko man met,” kinuna ni nanang. “Saanko la ngamin a maguantaan. Saanyo koma metten, a, a pagikugpay!”

Aglakokayto met iti ruot ditoy plasa. Wara laeng dagita!”

Uray la sinangsangitan ni nanang dayta a padasna.

Nupay kasta, saan a nagbalin a tubeng daytoy ken ni nanang. Nagtuloy latta a naglakolako iti rineppet a balangeg a para bugbog tapno laeng adda maurnongmi a pagbasami nga agkabsat. Naisardengna laeng ti naglakolako iti balangeg idi agruaren dagiti feeds.

Nateng ken lames ti impamaysa ni nanang nga inlako. Nupay bassit laeng ti ganansiana, dinakami maliwayan a yawidan iti saramsammi. No awan, aglingta iti kamotit wenno kumali iti sago-ti-Baguio a lingtaenna a pagsasanguanmi no sarsardam kalpasan a maisuronakami nga agkabsat kadagiti leksionmi.

(Adda tuloyna)