sinursuran-banner-sqSinursuranNi Jobert M. Pacnis

SINURSURAN: Kasano ngamin aya a Disiplinaen dagiti Ubbing

Kolum ni Jobert M.Pacnis

(Maudi a paset)

Tapno maammuan ti pudno a rason, kapatang daytoy. Ngem saan a piliten. Di a pagungtan no kasta a pagdamagan. Ketdi, bay-an nga isu ti agistoria, bay-an nga ipeksana ti adda iti barukongna—ta iti kastoy a wagas, sigurado nga awan ilimedna. Ukradenna a kasla libro ti biagna.

Iti daytoy a punto, ammo metten no kasano a binuren iti kayat a pagbalinan.

Ti mabalin nga aramiden kenkuana, pagbalinen a lider iti grupo kadagiti aktibidad. Babaen itoy, maiparikna kenkuana nga adda pay laeng tao/tattao nga agtalek iti kabaelanna.

Ngem saan nga agpatingga dita. Tarabayen iti inaldaw, kayatna a sawen, kitaen dagiti ar-aramidenna. Aturen a dagus no sabali ti maturongna.

Di met liplipatan nga ikkan iti gunggona no makaaramid iti nasayaat. Ngem di ipalubos a daytoy a gunggona ti agserbi laeng a paratignay ti ubing. Kasayaatan pay laeng ti panangdayaw kenkuana. Ipalgak ti kayat a pagbanaganna iti masanguanan—a mamatika a kabaelanna daytoy basta ipamaysana ti agbasa.]

Kuna ni Sergio Pinheiro ti UN Study on Violence Against Children: “Dinto pulos nainkalintegan ti ania man a kinasabrak kadagiti ubbing; ngem amin a kinasabrak mabalin a maliklikan.”

Pagsarmingan daytoy a kinuna ni Pinheiro. Pagpampanunotan sakbay nga iwayat, makaaramid iti mabalin a pagbabawyan.

Iti panangmuli, panangdisiplina kadagiti ubbing iti agdama, saanen a kumna ti kinauyong ken kinaistrikto.

Segun iti kapadasan ti maysa a maestro nga am-ammotayo, nagbalin kano a terror idi damona ti agisuro. Nauyong kadagiti pupil-na (ta iti elementaria nga immuna a nagisuro sakbay nga immalis iti sekundaria) idi. No makaaramid iti maikaniwas dagitoy, ungtan, pagsasawanna ida. Agbaut pay ken aglapigos.

Isu nga idi agbayag, nagbalin a nasingpet dagiti ubbingna. Makitada pay laeng ti anniniwanna, mabutengen dagitoy. Natulnogda pay.

Ket idi umalis iti hayskul daytoy a maestro, anian a pannakaklaatna ta nakaragragsak dagiti panawanna nga ubbing.

Tagtagiurayda gayam ti ipapanawna tapno awanton ti manguyong kadakuada!

Iti iseserrekna iti hayskul, impakatna met laeng ti kinauyongna aglalo ket nadlawna ti kinasuer dagiti nadanonanna nga ubbing. Napayaman ta idi naipalak-amna ti kinauyong ken kinaestriktona, nagulimek metten dagiti “pasaway.”

Ti ammona, okey dayta nga istratehiana. Agingga a naduktalanna ti kinapudno. Nasingpet laeng dagiti ubbing kenkuana no makitkitana ida. Ngem inton agpakada nga agawid wenno makatallikud kalpasan ti klase, ikarkararag gayamen dagitoy a matay la koman…a maaksidente iti panagawidna, wenno mahayblad ta tumangaden iti barsanga.

Sipud idin, binaliwanna metten ti pamuspusanna nga agdisiplina. Sinurotna ti ikamkampaniana ita a positive discipline. Pagaayat itan dagiti ubbing— nga awan panaginkukuna.

Maigunamgunam pay kadagiti mannursuro a no adda makitada a babassit a banag a makapasakit kadagiti ubbing, ilintegda koman a dagus daytoy. Kas kuna dagiti eksperto, dagitoy a babassit a banag, mabalin a dumakkel a mangibunga iti panagrebelde.

Kadagiti met nagannak, dakkel ti pasetda iti pannakaipatungpal ti makunkuna a positibo a panangdisiplina. Ania man ti agbalin nga ugali dagiti annak, namunganay ket namunganay iti pagtaengan a dinakkelanda. Ditoy nga immuna a nagramut ti kinataoda.

Saan koma ngarud nga al-alaen dagiti nagannak dagiti annakda no kasta a makaaramidda iti maikaniwas iti pagadalan aglalo kadagiti titserda. Aglalo ket adda itan baro a probision a nangbaliw kadagiti nakalanad iti polisia ti Child Protection.

Saanen a basta mabalin nga ireklamo iti panagabuso dagiti mannursuro. Masimpuon no ania a talaga ti ramut ti nakaiburuangan ti riknada. Sa addanto metten (kalpasan a mapirmaanto ti Presidente) ti makunkuna a Teacher Protection.

Ngem ketdi, saan koman nga urayen nga agrinnupak ti Child ken Teacher Protection. Napatpateg nga amang ti nabara a relasion iti nagbaetan dagiti mannursuro ken dagiti nagannak tapno naan-annayas met laeng ti pannakaited ti adal, sursuro kadagiti annak a kasapulanda la unay iti pannakibalubalda itoy a biag.

Wen, saan a narigat a disiplinaen dagiti ubbing. Kinnayammet laeng ti kasapulan.

Pagwadan met ti kinuna ni Mahatma Gandhi:

Pagtalinaeden a positibo dagiti kapanunotan ta dagitoy ti agbalin a balikastayo; pagtalinaeden a positibo dagiti balikas ta dagitoy ti agbalin nga ugalitayo; pagtalinaeden a positibo dagiti ugali ta dagitoy ti agbalin nga aramidtayo; pagtalinaeden a positibo dagiti aramid ta dagitoy ti agbalin a tagipatgentayo; ken pagtalinaeden a positibo dagiti tagipatgen ta dagitoy ti agbalin a destinasiontayo.#