sinursuran-banner-sqSinursuranNi Jobert M. Pacnis

Sinursuran: Ket Inulimi ti Marag!

Kolum ni Jobert M. Pacnis

(Maikadua a paset)

 

Iti isasangbaymi iti purok, simmabat kadakami dagiti naisem ken naamo a rupa dagiti agindeg. Kasla naunas nga asuk dagiti babassit a dandanag iti barukongmi ta amangan kunami no di pay laeng natalinaay ti lugar (ta awan met unay damag kadaytoy a disso).

Iti umuna nga aldawmi, naglektiur ti grupo iti pagsasao nga Ilokano. Nariknami ti suporta dagiti tallo a kapitan (Rolly D. Uddipa ti Marag, Francis M. Burgos ti Calabigan ken Edgar B. Pedronan ti Cagandungan) ken dagiti adda iti babaenda kadaytoy a gannuat. Naobserbar pay a nalalaing nga agilokano dagiti ubbing ngem kadagiti taga-Patad. Ket nabukel iti isipmi a gapu dayta ta ti drama iti radio ti masansan a paglinglingayanda (wen, awan pay ti signal ti internet sadiay ken agpakarigat pay ti selpon ta masapul ti mapan iti karayan tapno agbirok iti signal).

Adda ketdi kuriente iti lugar ngem sa laeng agandar iti rabii a para iti silaw ti tunggal pagtaengan. Limitado ta bassit laeng a hydro ti pagtataudan ti enerhia. Birgo pay laeng ti rabii, Mananammo ti kinaulimek (ta imiankami dita) ti aglawlaw. Awan ti aglalaaw, wenno naariwawa nga agbibideoke. Marnekka a maturog.

Kabigatanna, dua a buya ti nakaparsuaan ti panggep a pasiaren ti grupo. Ti Dupag Rock Formation iti bantay iti likudan ti gymnasium ken ti kueba iti masungad a rangtay.

Sinapami ti nagtaneb iti karayan iti likudan ti nagturoganmi. Manipud ditoy, tinalantanmi ti desdes iti karayan a nangitunda kadakami iti Rock formation. Iti sungaban pay laeng, iti sakaanan ti bantay, dimmakkelen dagiti matami iti kinangayed dagiti bato. Nadumaduma nga uha!

Di maungpot a panagala kadagiti ladawan ti simmaruno. Saanmi a kayat a panawan ti maysa a buya a dimi maalaan iti pakalaglagipan (isu a maibalakad kadagiti umuli sadiay a masapul a full charge ti baterya ti kamerada ket adu ti malaon ti memory/SDHC card-da).
Umilet nga umilet, rumikut a rumikut dagiti dalanen. Ngem puminpintas, dumadaeg met dagiti buya. Annad laeng a napalaus iti panagkalipkip kadagiti bato ta natatadem dagitoy.

Dika immuli no dika nagarumiadan, kunada met ketdi.

Saan gayamen a masapul a mapantayo iti sabsabali a probinsia tapno laeng mapadasantayo ti kastoy, kinuna ti maysa iti grupomi.

Ti yan ti dakkel a karit, isu ti peak dagiti bato. Narisgo ken nakadadanag ditoy. Masapul nga awan kenka daytay kunkunada a fear of heights. Makapaaliaw ti kumita iti baba; ti laeng nagtakderan ti mabalin a paggianan. Kalipkipan manen a sakayan dagiti bato iti panagpababa tapno saan a matnag. Iti panangdanon kadaytoy a pasetna, kalipkipan met laeng ti ag-80 degrees a nakipet a pagulian a masapul pay a pasikig ti ikakarab-as.

Dagiti bannog, garumiad ken rigat iti itatallapaw, maawanda amin ‘ton magtengen ti kangatuan a pasetna. Nalawag a makita ditoy ti ngayed ti tanap, dagiti dua a nagsabat a karayan (a no surongen ti maysa, itundanaka iti ili ti Pamplona), ken dagiti natatayag a bambantay iti agsumbangir a sikigan, iti likudan ken iti adayo a masanguanan a yan ti Bantay Siamsiambiri a yan ti nakangatngato a dissoor (daytoy ti pangpanggepen ti grupo nga ulien ‘ton kalgaw). Dagitoy a kabambantayan, ilemlemmengda pay dagiti nagkaadu a kueba a pakaibilanganen ti nalatak idi a Blue Haven a yan kano ti training ground dagiti ‘kakadua’, nagkamangan dagiti agindeg, nagbalin a pagadalan dagiti ubbing, ken ti kalatakan nga estoria, pagpukpukawan dagiti eroplano a maibatog sadiay.

Iti panagbaba iti Rock Formation, adu pay a napipintas a pannakabukel dagiti bato ti malabsan, mabuya ken maimatangan. Naindaniwan amin a makita—aglalo la unay dagiti mula nga agbibiag iti babaet dagiti bato nga awan met ti makita a daga a nagkaptanda. Namsek iti simbolo a buya!

Malabsan ti kasla swimming pool (ta naglukong ditoy a paset) iti panagpababa. Kuna dagiti tour guide-mi a pakaibilangan ni Kapitan Uddipa (ken ti asawana) a no matutudo, mapmapno daytoy iti danum. Iti panangmira iti aglawlaw, mapan a tallo katao ngarud ti kaunegna no mapno iti danum! Main-inut kano daytoy a maawan ta bassit laeng ti lumsotan ti danum. Baby Rock ti awag kadaytoy.

No adda Baby, adda ngarud met Mother (nga adda laeng iti liklikud a paset). Ngem daytan ti saan a napasiar ti grupo ta napudot unayen ti aglawlaw ken dua oras gayamen a kumalkalipkipkami kadagiti batbato. Nariknamin ti bannog ken pannakapaksuy. Ngem napnapnekkam’ ketdi iti di magatadan a padas!

Saan laeng a dayta. Adda pay ti makunkuna a hanging bridge a nasurok a 200 a metro ti kaatiddogna a nangbeltak iti karayan nga agtunged iti barangay ti Cagandungan. Tao laeng ti mabalin a magna, awanen ti sabali. Iti kaaddam iti tengnga ti rangtay, mabuyam ti ngayed ti aglawlaw; ti nalitnaw a danum-karayan nga agtaud ti danumna iti puon dagiti bantay– kangrunaan ti Bantay Siamsiambiri; Ket kasla saanmon a kayat a panawan pay dayta a lugar.

Saanen a napanan ti grupo ti Botanical Garden ken ti Marag shrine ta awanen ti oras.

Uray ta adda met pay sumaruno a yuuli, kinunami.

Isu a ditoy a nabukel ti panggep a yuuli inton kalgaw tapno makita pay dagiti dadduma a pagtangtangsit ti lugar.

Iti panagawidmi, maymaysa ti nakunami: Marag, agsublikam manen ‘ton kalgaw!

Ngem naisapa met ti panagsublimi ken ni Sir Johmar Alvarez a pada a naglektiur ta idi nakita ti prinsipalmi dagiti ladawanmi nga immuli, inkalikagumna a mapankami met kas pangselebrarmi iti Aldaw Dagiti Mannursuro. Ania pay, kadayta sumuno met laeng a lawas (Oktubre 4), inulimi manen ti Marag! Di kad naminduan a daras a naulimi ti Marag Rock Formation!

Ngem isu latta nga isu ti nakunami: Marag, agsublikam manen ‘ton kalgaw!

Sika, kailian, kayatmo ti sumurot?#