Footer

SINURSURAN: Lagipentayo Ida

KANDILA, sabong, atang, kararag… sumagmamano a bambanag a mangipasimudaag latta iti di mabubos a pammategtayo kadagiti immun-unan ngem kadatayo.

Itoy a panawen nga ilagip/lagipentayo manen ida, adda latta maukrit a liday, panaas iti kaunggan. Saan a matallikudan ti kinapudno a dakkel ti paset ti kinataotayo ti binukelda.

Isu a kasla ditayo latta maaklon nga awandan a kapulpulapoltayo. Nasaem latta ti maukrit a rikna iti pannakayadayoda kadatayo.

Degdegan payen dayta dagiti lagip iti kinaindaklan ti panagbiagda. Intedda amin a kasapulantayo. Impariknada ti pudpudno nga ayat. Nagsakripisioda para kadagiti arapaaptayo. Awan, no palausen ti manarita, ti imbatida para iti bagida para laeng iti pagimbagantayo.

Dagita a lagip, maulit-ulitda nga agpatak iti isip. A kasla man idi kalman laeng ti kaadda dagiti ipatpategtayo a kalanglangentayo iti rigat ken nam-ay.

Isu nga agingga itoy, uray pay manon a tawen a simminada, kasla ditayo pay laeng patien nga awandan iti sidongtayo. Imbatidatayon. Adda dagiti pettat ti isisinada— banag a nasakit la unay iti kaunggantayo. Idinto nga adda met dagiti dadduma a naikondisiontayon ti bagitayo nga iti mabiit, pumanawdan iti sidongtayo.

Ket masapul nga aklonentayo dayta a di matallikudan a kinapudno!

Nupay kasta, nasakit latta no mapanen ti kinaagpaysuanan ti ipapanawda.

Agsisimparat a saludsod ti umarakaup kadatayo: kasanotay’ laengen no awanda? Pagtaklinan? Kabaelak ngata ti liday nga umukuok iti ipapanawdan? Pagbanagak?

A no maminsan, pabasolentay’ pay ti Namarsua. Apay nga innalana a nasapa dagiti ipatpategtayo? Aglalo la ngaruden no annak dagiti nasapa nga innala ni Patay. Wenno kabsat, wenno asino man a kabagian.

Ngem kunada ngarud a tunggal tao, adda naikari a rukodna. Saantayo a pulos a matukod ti plano ti Dios iti tumunggal maysa kadatayo. No ania man dagitoy, ti sigurado, nasaysayaat ngem iti adda a panggeptayo.

Aklonentayo ngarud a sipupuso dagiti pagteng iti biagtayo. Wen, agpayso a naladingit ti pumasina iti ipatpategtayo. Ngem pagdalanantayo amin dayta. Awan bumungil ditoy rabaw ti daga a kunada.

Iti panangaklon kadaytoy a banag, malag-anan ti rikna. Kasano a makapantayo iti patientayo a nagkaysa a biag no saantayo nga umuna a lumasat ken ni Patay?

Wen, iti ipapataytayo, adda dita ti panagungar. Panagungar iti biag nga agnanayon.

Ita ngarud nga Aldaw Dagiti Minatay, lagipentayo ida a napnuan ayat. Saan a marukod iti kinagarbo dagiti sagana dayta a banag. Kinasimple, dayta pay laeng ti kaskenan.

Kas maob-obserbatayo, adu a kaamaan ti kasla agpiesta no dumteng daytoy a panawen. Agsaganada iti dida magabgabenan a sanguen/pagsasanguan nga agkakabagian.

Balonenda daytoy iti isasarungkarda iti sementerio a pagpatpatnaganda pay no dadduma. Agkatkatay, piman, dagiti nanumo a makakita iti yaplagda a pagsasanguan.

Mabain la ket ngarud dagiti dadduma a mangiruar kadagiti binalonda met taraon. Umanayen ti itugkelda a kandila ken nanumo a sabong iti rabaw ti nakaidulinan ti ipatpategda. Pumanawdan kalpasan ti ababa a kararag para kadagitoy. Saanda payen a malagip no dadduma a pakararagan/pawarisan kadagiti papadi. Naaladan ti nakantiawan.

Ken no met ngamin maminsan, mapaspasamak pay laeng ti diskriminasion uray iti pannakaikararag koma dagiti nagawan. Iti kaadu ti tao, ken maymaysa wenno dua laeng ti padi nga agserbisio kadagiti minatay, naynay a maipapaigid dagiti nanumo. Madlaw latta nga ipakat dagiti nangangato a tao iti gimong ti impluwensiada. Kayatda a mayuna a maserbisioan dagiti minatayda. Ken adu a ritual ti maipakat.

Pagangayanna, bassitto laengen ti panawen a pagbibingayan dagiti babassit a kailian. Gapu ta tao laeng met ti padi, saanna a kabaelan nga ileppas amin. Adda met pagpatinggaan ti bagina.

Ngarud, dagiti dadduma, ikararaganda lattan a mismo ti minatayda. Pumanawdan kalpasanna. Saandan a gamden ti makilinnetlet, makiinnagaw iti atension, a pakiap-apaan no di makalawlaw kelleb dagiti naranaanda.

Itoy met a panawen, panawen ti panagbabakasion ti kaaduan. Isu a maal-ala a gundaway a reunion dagiti agkakabagian. Planuenda a nasayaat ti ragragsak a mapasamak iti isasarungkarda kadagiti ipatpategda iti sementerio.

Wen, pudno a maipawil dagiti makaulaw iti uneg ti sementerio. Ngem adu latta dagiti pasaway a kailian. Aramidenda ti amin tapno laeng makaiserrekda iti pagsasanguanda. Kasta metten dagiti banag a makadangran. Proteksion, kuna dagiti dadduma. Wenno pagdalus. Ngem kas kuna ngarud dagiti otoridad, aramiden koma ti panagdalus sakbay ti Nobiembre dos tapno saanen nga alaen dagitoy iti panawen a reprep dagiti tao a bumisita iti sementerio.

Tapno maliklikan ti disgrasia!

Ngem nasulpeng latta ti kaaduan. Ipamuspusanda, kas nasaon.

Itoy pay a panawen, mapasamak dagiti nadumaduma a party. Halloween party a makuna. Dagiti nalatak nga establisimiento/pasdek, agpa-trick and treat-da kadagiti ubbing. Saan a mailadawan a ragsak ti maanninagan kadagiti ubbing kadagiti kakastoy nga aramid.

Ngem kuna dagiti dadduma a maipawil koma daytoy nga aramid. Sabali kano ngamin ti maitukit iti panunot dagiti ubbing iti no ania dayta nga aldaw. Maawan ti pudpudno nga anagna. Saan a maiparikna kadakuada ti kinapateg dayta a gundaway a panglagip kadagiti nagawan.

Maimula pay iti panunot dagiti ubbing a panawen dayta ti panagbutbuteng, pammutpbuteng ken nakabutbuteng a pagteng. Pagangayanna, kabutengdanton dagiti minatayda. A nakabutbuteng dagitoy!

Ngem nagbalinen a paset ti tradision ti trick and treat. Narigaten a maunas. Maipaima latta ngaruden kadagiti nagannak ti akem a mangilawlawag iti kinaania ti Nobiembre Dos iti biag ti tunggal maysa. Isuda ti mangted iti bayabay kadagiti annakda tapno saan a biddut ti idakdakkelda a pammati.

Sabali latta met dagiti kaamaan a mangala itoy a gundaway tapno makapagliwliwada. Agpasiarda kadagiti resort wenno aplaya. Agraragsakda. Bonding time. Saanen nga iti sementerio a kas kadagiti dadduma.

Panawen a panag-recharge, kunada.

Ikkan ti bagi a mangnanam kadagiti bunga dagiti bambannog nga agtrabtrabaho. Dagiti simmina, kunada, saanen a rumbeng nga isuda ti manglapped kadatayo nga agrang-ay, agnam-ay ken mangaramid kadagiti kayattayo. Tumutop a palubosantay’ idan. Bay-antayo a mapandan iti kaikarianda. Mataktakda laeng no isuda lattan ti ilaglagiptayo.

Saantayo a mapabasol dagitoy a kakabsat. Addaantayo iti bukod a pammati.

Ti napateg met ketdi ditoy, ammotayo nga ilagip/lagipen ida.

Uray iti panunottayo laeng! Saantayo a basta punasen ida iti lagiptayo.

Iti pammatitayo a Kristiano, no ammotayo nga ilagip, ikararagan dagiti minataytayo, ikararagan wenno tulongandatayo met nga umasideg iti Namarsua. Uray awandan, addada latta a mangidawdawat iti naannayas a panagbiagtayo.

Ken biag a nakakonekta iti Dios!

Sika, ania man ti nanumo nga aramidem itoy nga aldaw, nakatalimudok koma laeng iti pannakaitag-ay ti kararua dagiti nagawan.

Lagipentayo ida a sipupuso.#