Sinursuran: SINURSURAN: Makadapigak sa… | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

SINURSURAN: Makadapigak sa…

IMMULIMEKEN ti aglawlaw. Awanen dagiti agsasallupang a jingle dagiti kandidato. Saan itan a mariribuk dagiti umili iti ariwawa nga iririaw dagiti managkari. Makaturog met laengen a naimbag ti tunggal maysa.

Ta nalpasen ti basingkawel. Nagtimeken dagiti umili. Ammon no asino dagiti nangabak.

Ngem no apay a kasla di pay laeng nagmawmaw ti kinabara ti eleksion. Nakaad-adu a sasao ti agkikinnawil iti nagbaetan ti tunggal maysa aglalo kadagiti supporters dagiti nadumaduma a kandidato.

Uray pay agkakabagian, agiinnala iti sao. Maisaksakripisio ti langenlangen. Kasla saanda nga agkakadaraan.

Nagalas nga aramid. Gapu iti politika, mapugsat ti panagkakabagian? Isu a diak malapdan ti bagik nga agpungtot. Ket kasla kayatko ti dumapig no kua.

Kiddawek laengen a di umas-asideg kaniak dagitoy nga indibidual. Saanda la a mapanunot a napalpalet pay laeng ti dara ngem iti danum.

Maysa pay a pakasikorak ita, wenno ibagatay’ lattan a pakasiudotan, dagiti posters a naibitin, naipigket iti no sadino la ditan. Awan sa uray maysa a kandidato, nangabak wenno naabak, nga agdisnudo a mangikkat kadagiti warana. Modeloda koma iti aramid.

Pagsayaatanna laeng ta awan ti naibanteng, naipigket iti masakupan ti solarmi. Idi pay laeng koma a nagisgisko aglalo no dida impakpakada ti panagipanda.

Malabsak laeng dagita a tarpaulin, agbureken ti riknak. Plastik nga isem ti nakabuddak. Nagsayaat a gisgisen. Wenno rabsuten. Narigat la ngamin amangan no bueltaandaka aglalo no naabakda.

Maalay-ayan la ‘toy riknak no makaimatangak iti uray maysa la a kandidato a mangdalus kadagiti warana. No saanda a maaramid ti agdalus, saandak la koma nga as-asitgan. Ta makadapigak no kunak, makadapigak. Amaya!

Nagdalusan a kalsada, poste, parke, uneg ken ruar ti pagadalan, nagiwaraanda ketdin!

Awan babainda, saan kadi?

Ti pay pakasikorak, pasensiaandakon, dagiti sumanao a kandidato a saanda kano a naabak. Nasaurda laeng!

Iti ngamin pagiliantayo, dua laeng ti pagbanagan ti kandidato: nangabak wenno nasaur. Nasaur kano ta nanguarta ti kalabanna.

Sanabagans! Ammona nga uso ti kinnuartaan ngem timmaray pay laeng. Sa ita naabak, ibagana a nasaur?

No inkeddeng ti asino man ti agkandidato, rumbeng a naisagananan ti bagina iti kinarugit ti politika. Saan a dayta agindadalus ta nasin-aw kano ti panggepna. Saan a manguarta. Lumaban a patas.

Nga iti kaano man, awan ti patas a laban iti politika! Adda dita ti pinniltak, dinnadael iti kinatao, ken kinnuartaan!

Ngarud, no agtaray a kandidato, nasaganaannan dagitoy. Saan a maitutop nga ibagana a nasaur inton maammuan ti resulta. Aglalo no rummuarto met laeng ti kinapudno a nanguarta, laeng saanda nga imbotos ta dakdakkel met nga amang ti inted ti kalabanna.

No naabak, aklonen! Saan nga agbalin a kasla tsismoso wenno tsismosa. Amangan no siak ti mapatanganda a pagibagaanda iti rikriknaenda ket diak makapagteppel. Makadapigak pay! Aglalo ita ta sangkabarikesko ti buneng a nagatangko iti intedda a kuarta. Isagsaganak ngamin manen ti pagmulaak iti bangkag ket naynay a masapulko ti buneng.

Maibalud uray dagiti immawat? Nabayagen dayta a linteg. Ngem linteg a di maipatpatungpal. Pagipananda koma a pagbaludan iti riniwriw nga umili a nangilako iti botosna?

Ken asino pay ti agbalin a lider iti pagilian no mairamandaa makasuan ken mabalud? Adda ngata pay nabati?

Ania ketdin, aya, ti ibalballaagda kadagiti umili. Atoy a kinarigat ti panagbiag, alaen ket alaento latta ti mataktakadan a pamilia ti ania man a mayawat kenkuana a gatad a nagtaud iti kandidato.

Isu pay a nayon ti pagbiag, kunada, a! Saanda kano met a dawdawaten. Intunton met ida dagiti coordinator dagiti maseknan a kandidato.

Sa maysa, alaen man wenno saan, nalpasen a nailista dagiti coordinator ti naganda. Nga impasada met kadagiti kandidato a makin-iggem kadakuada. Kayatna a sawen, awatem wenno saan, iti mata ti kandidato, nabayadannakan!

A no kuentaen dayta, kasla naipusta ti masakbayan ti pagilian, ti ili, wenno bukod a bagi iti sentimos laeng tunggal aldaw. Naglaka a kinatao!

Isu nga ibagbagakon kadagiti nag-coordinator kadagiti politiko a saandak nga as-asitgan. Madapigko met ida no kunak, madapigko. Agilistada lattan iti nagan nga uray di am-ammo. Mangiramramanda kadagiti saan koma a mayat nga umawat. Ngem kasano pay a dida awaten ita no addaytan ti tallo ti ulona a mayawat? Nakalistada la ngaruden…

Tunggal eleksion, lokal ken nasional, saan a rumbeng a makisagpaw dagiti opisial ti barangay. Kasta metten dagiti adda iti Departamento ti Edukasion. Non-partisan-da a makuna.

Ngem, ayna, impadlaw latta met dagitoy nga opisial ti barangay no asino dagiti kayatda a mangabak. Iti laengen pannakausar ti auditorium wenno gymnasium ti barangay, masmasnop ti kayatda a grupo a mapan agmiting de abanse dita. Siempre, ti kandidato a kumkumpetanda!

Kakaasi, piman, dagiti dadduma no agpamiting de abanseda. Iti sirsirok ti kayo, wenno kadagiti kankanto lattan a nakapudpudot.

Sabali laeng met dagiti opisial ti barangay nga isuda payen ti manumnumbalay nga agiwaras iti kuarta. Ngem no maammuanda a nawarasannakan ti bangir a partido, sumanaodan. Saandan nga ituloy nga ited ti para kenka (nga addan a nailista). Kukuadan!

Ket rumkuas ti riknak a makadapdapigen iti opisial ti barangay!

Sumangkamaysa met dagiti dadduma a mannursuro. Agiyendorsoda met. Makitam iti Facebook wenno social media no asino dagiti kayatda nga ibotos. Ti pagdaksanna, isakemda metten ti mangampania.

Mannursuroda ngem isuda ti rumbeng a maisuro. Ket rumkuas ta rumkuas latta ti rikna a makadapdapigen kadagiti kakadua iti Sistema.

Eleksion laeng daytoy. Maysa a kalintegan a mangpili iti kayat nga agtakem. Saan a padikdiktaran. Agtimek segun iti linaon ti konsensia.

No ania dagiti ammotayo a maikaniwas, saanen nga aramiden. Agbalin a modelo, saan laeng a kadagiti kandidato daytoy. Kangrunaanna kadatayo nga umili/botante.

Ket agingga a ditayo maikkat iti kulturatayo ti agpabayad iti botos, saanto a mapungtil daytoy dakes nga aramid. Agtultuloyto latta ti panagtugaw dagiti rinuker iti tronoda.

Nakaladladingit ti report ti Philippine National Police. Saan kanon nga uso ti panagipatli iti kalaban (wenno ‘tay pannakausar ti guns and goons). Kuarta kano ti labananen iti politika. Awanen dayta nasin-aw a panggep iti pagilian.

Ita ta nalpasen ti eleksion, agulimektayo metten. Siputantayo ketdi dagiti napili no aramidenda met laeng ti obligasionda kadatayo nga umili.

Saantayo nga agimbubulsek. Dayta laeng ta kasla awan kalintegantayo nga agreklamo no addanto madi nga aramidda. Ta nagpabayadtayo met!

No kastanto ti mapasamak, ay, ket dapigentay’ laengen ti bagbagitayo!

Ngem sakbay dayta, unaentay’ ida a dapigen! Rumbeng a mariingda a naibotosda nga agserbi, saan ketdi a paserbian!