sinursuran-banner-sqSinursuranNi Jobert M. Pacnis

SINURSURAN: Masapulan Koma Ti Kulluong Kadagiti Pusotayo

Kolum ni Jobert M.Pacnis

Ang Pasko’y sumapit,/ Tayo ay mangagsiawit/ Ng magagandang himig/ Dahil sa Diyos ay pag-ibig…

Wen, adtoy manen ti panawen ti naindaklan nga ayat. Nupay adda makuna a climate change, marikna latta ti salemsem ti angin-Siberia a mangipasimudaag kadaytoy a panawen. Kasla di kabaelan a parmeken ti panagbaliw ti panawen ti salemsem a mangiyar-arakup iti ayat a namunganay iti maysa laeng a nanumo a kulluong.

Paskua manen, wen. Ket ammotayo aminen no ania daytoy nga aldaw.

Ngem iti puso ken isip dagiti ubbing, kayatna a sawen— kinaragsak, ragragsak, pannakaawat iti nadumaduma a sagut, ken pannakaidasar dagiti nadumaduma nga agkakaimas a taraon.

Iti pannakasiray a naragsak dagiti ubbing, maisurot ti rikna ti tunggal makaimatang nga ad-adda a mangabbukay iti kaipapanan ti Paskua.

Iti biagtayo a Kristiano, daytoyen ti kagarboan a pasken/pasamak a masapul a selebraran iti kasta unay. Ditoy a maibus dagiti bonus, ken maikalukag ti pannakaadda latta ti naimas a taraon a pagsasanguan.

A kalpasanna, agmulagat ta nakidkid aminen a pagbagasan.

Ngem saan a bale, kunaen ti kaaduan, ta nagragsak ti sibubukel a pamilia.

Iti sabali a banda, aklonentay’ man wenno saan, kasla maysa laengen a ritual daytoy nga aldaw. Agingga a dumteng iti punto a mauma kadagiti isu la nga isu a mapaspasamak.

Marugian ti isusuknal iti simbaan iti parbangon ti Disiembre 16 para iti makunkuna a Simbang Gabi. Nakakadkadlaw kadagiti simbaan ti pannakapekpek dagitoy. Awan itiitan iti uneg; adu pay iti ruar. Kasla maakas amin nga indibidual nga agturong iti simbaan. Saan a masamir ti lam-ek, salemsem a pasaren a rummuar a nasapa iti pagtaengan. Ti napateg, makadar-ay iti umuna a rabii ti Simbang Gabi. Kasla basol ti di pannakapan.

Ngem nakakadkadlaw met nga iti panaglabas dagiti rabii, bumassit a bumassit dagiti makimisa. Manmanonton ti makakumpleto, ti seknanto ti suerte. Pammatitayo ngamin a nasuerte dagiti makakumpleto iti Simbang Gabi. Matungpal dagiti kiddawna.

Daytoy nga ibabassit ti bilang dagiti tumabuno, ipakitana laeng ti kinamanagsulsulit ken ti narukop a relasiontayo iti Dios. Saantayo a makapagsakripisio uray siam laeng a parbangon.

Nalabit, irasontayo ti kinaadayo ti simbaan, narigat ti lugan, ken nasalemsem unay ti panawen. Ngem apay ngarud a kinabaelantayo iti umuna a parbangon?

Ket malagipko ti maysa a sermon ni Father Elpidio Vea Pastor ti parokia ti San Guillermo ditoy ilimi:

Idi ubbingkami, maymaysa laeng ti adda telebisionna idiay yanmi (i-Bacarra ni Father). No aginnagawen ti sipnget ken lawag, agiinnunakami a mapan agbuya tapno laeng adda pagtugawanmi iti salas wenno makapuesto man laeng iti tawa a pagsiripanmi.

An-anusanmi idi a lasaten dagiti bangkag ken talon ayatmi laeng a makabuyakami iti pelikula. Uray pay agbayadkami!

Kasta man met laengen no agpiesta ti ilimi. Nupay addakami iti aw-away, mapankam la a mapan idiay poblasion tapno makabuya iti sine. Nga agbayadkami!

Kasta met no adda libre nga ipabuya no kua ti munisipio. Kakaasikami a makilinnetlet iti parke ayatmi laeng ti makabuya…

Kasta idi, kakabsat. Nupay adda bayad, adayo ti lugar ken narigat ti mapan, ikagkagumaan latta ti mapan. Mapmapno ti pagbuyaan.

Ti nakaladladingit ita, adtoy ti Apo a mangyaw-awag iti naimbag a damag ngem manmano man laeng dagiti dumngeg Kenkuana. Manmano man laeng dagiti makapagsakripisio nupay libre daytoy, awan bayadna, ken nakananama ti gunggona a maawat…”

Malaksid itoy nga idadar-ay iti Simbang Gabi, panawen daytoy a makiinniliw kadagiti kameng ti pamilia, gagayyem ken kaadalan idi.

Ket saan a maliklikan dayta reunion—a pakasualitan manen dagiti marka-demonio a malidok. Ta kasla kurang ngamin ti panagsasangoda no awan dayta.

(Adda tuloyna)