Sinursuran: SINURSURAN: Nadumaduma a karirikna itoy a panagrikep ti klase | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

SINURSURAN: Nadumaduma a karirikna itoy a panagrikep ti klase

TAN-TA-RA-RAN!!! Tan-ta-ra-ran!!!

Panagmamartsa manen dagiti ubbing, naisipna dayta. Kadagiti napagasatan a nakagun-od iti pammadayaw, di mailadawan a ragsak kadagiti nagannak kadakuada dayta. Uray pay awan pammadayaw, kadagiti dadduma, ti napateg, nalpas manen dagiti annakda ti maysa pay nga addang ti edukasion iti biagda. A mabalin a naipaidam kadagitoy a nagannak idi panawenda.

Ngem adda pait, liday, ken panagtukiad iti barukongna. Ken, siempre, rag-o.

Pait. Liday. Adtoyda, palubosanda manen dagiti ubbing a naitalek kadakuada iti unos ti sangapulo a bulan. Uray kaskasano, adda latta maukrit a panaas/apges iti kaungganna. Kastan sa a talaga no imbilangdan nga annak dagiti adalanda.

Kas mannursuro, ammona a paseten ti biagna daytoy a panangpalubosda kadagiti ubbing. Masapul a sanguen ti kinapudno, kas met laeng idi panawenda a pinanawanda met dagiti mannursuroda para iti panangragpatda iti arapaapda.

Ti laeng dina maaklon no dadduma, ti kasla kaawan naadal dagiti ubbing a palubosanda. Uray koma laeng bukod a disiplina ti naitukit iti kinataoda.

A mabalinda a kunaen nga agkakabaddungalan a dida nagkurang!

Malagipna la unay dagiti dadduma nga ubbingda. Damo pay laeng ti klase, binagbagaannan dagitoy. Ania dagiti rumbeng nga aramidenda iti klase, iti pagadalan, kadagiti mannursuroda, kadagiti kaklaseda ken iti gimong.

Ti dakes, kasla awan dengdenggen dagitoy nga adalan. No palausenna ti manarita, kada segundo nga agbalbalin a padi iti uneg ti klaseda. Sermon a sumaretset. A dina koma kayat a kasta. Ammona la unay a makasusungeg dayta kadagiti manakem nga ubbingda.

Nawaywayen iti panagkunana ti pasensia nga imetna. Nasuroken a sangapulo a tawen nga adipen ti tisa. Ammonan a tipden ti riknana. Ngem duma itan dagiti ubbing. Nakapsut ti pundasion ti kinataoda. Awan ti maymaysa a sao kadakuada.

Lamina no kasano a natubayda iti pagtaenganda?

Bastosda, mabalinna koma a kunaen. Ngem anian, aya, ta nagrigat ti agsao. Madaksan, uray ania pay ti rasonna, dayta ti sigurado. Pagsasaritaanda a dina oras.

Ket kas mannursuro, akemna a binoren dagitoy nga ubbing. Ipateg. Awaten kadagiti p(n)agbiddutanda. Ken ipaayan iti umisu nga atension iti agmalem a kaaddada iti pagadalan.

Ngem iti baet dagitoy, saanna latta a maawatan nga adu dagiti di a mangipangpangag kenkuana. Adu latta ti mangaramid iti kaykayatda. Daytay isuda pay ti adda ganasna a sumanao no mabagbagaanda. Wenno madillaw ti dakes nga aramidda.

Kas pangarigan no kasta a panagpapirmaan iti clearance wenno permit. Maitugotan ti kaawan ti panagdaydayaw dagiti ubbing. Adda dita ‘tay idungsona lattan ti permit-na iti sanguananna— uray pay kasano kaadu ti ub-ubraenna. Ala, wen, maawatanna no dida ammo nga adu ti trabahona. Ngem ti la koma met kayatna, ‘tay ipakitada ti sangkapirit a panagdayawda— a naynay met nga ibagbagana kadakuada.

Excuse man, sir… agpapirmaak koma, dida pay maibaga. Wenno uray simple laeng a panag-Good Morning wenno Good Afternoon.

Kalpasan ti panagpapirmada, ni-ay, ni-oy, awan man laeng nga agaon kadagiti bibigda.

Iti dayta a maudi a grading period, pinadasna a testingen dagiti nagpapirma kenkuana. Apagtallikud dagitoy, inawaganna ida. Dinamagna no ania ‘diay imbagada (a siempre, awan) ta dina naawatan.

Awan, sir, insungbatda. Impagarupko no Thank You, kunayo, kinunana met.

Ngem, pordios, nagkakatawada ketdin. Awan imbagbagami, sir… sa kasla awan aniamanna a pinanawanda lattan.

Napangilangil laengen. Am-amang pay a sangkadagullitda nga agkakadua ti umno a panagdayaw wenno aramiden kadagiti kakasta a kanito. Ngem no apay nga awan latta ti kasla pagnaanna. Manmano laeng dagiti adda sintido komonna. .

Adda pay dagitay nakaam-amo a mangisabat iti permit-da. Ngem kasano a mapirmaanna dagitoy no adda igpilna a pappapel, laptop, eraser, ken dadduma pay a ramitna nga agturong iti iti kuarto dagiti sumaruno nga ubbing nga iggamanna? Dida pay yopresar ti itutulongda.

Ti makadakes, no ibagana a dina masango ti agpirma, ket kitaendanto laengen iti office kalpasanna, tumanabutob dagitoyen nga umadayo.

Agunget, ngem bangbangir laeng nga isem ti malak-amna. Sa kusilapanda pay. Kakaasi, piman, a manglepleplep iti riknana tapno di makaisawang iti madi. Ta sigurado nga ireklamoda.

Makunkunana pay ketdin no maminsan nga iranranta dagiti adalan ti mangpapungtot, mangsuron kadagiti titserda tapno adda pamkuatanda nga ireklamo daytoy.

Sabagay, addan dagiti nadamdamagna a kasta. Nagtaud met laeng ti istoria kadagiti padana nga adipen ti tisa.

Ti kaso, iranta dagiti ubbing ti agpakasulpeng. Dida mangikaskaso. Agpakpakatuleng. Gapu ta mabaddekan met unayen ti dayaw ti mannursuro, siempre, makaisawang iti di maikanatad. Wenno makadisso no nalabes unayen ti pannakabastosna.

Ngem kuidaw, ditan ti pakaalaanna iti dugol ti ulo. Ireklamoda. Ket kuartaan dagiti kunsintidor a nagannak.

Isu a kasta la unayen a panagteppelna. No maireklamo, ket maikkat, asinonto ti agbanag a kakaasi? Isu, ken ti pamiliana. Banag a dina kayat a mapasamak.

Nagbileg a kalasag dagiti nagannak ken annak dayta Child Protection Policy. A kunkunana iti nakemna, linteg a mangipayatpayat iti dayawda a mannursuro. Kaano ngata met a maikkanda iti proteksion? Iti ngamin agdama, kasla dagiti laeng ubbing ti adda karbenganna a maprotektaran iti pannakaabuso. Kasano ngay dagiti kas kadakuada a maipayatpayat la unayen?

Panagtukiad iti barukong. Wen, saanna koma kayat a palubosan dagiti dadduma nga adalanda no mabalin. Malaksid a di makasursurot dagitoy iti klase, ta saanda pay a makabasa ken makasurat, kasla karasay ti tudo iti kalgaw ti kaaddada iti pagadalan. No addada met, buong-ti-ulo ti parparnuayenda. Agkara-cutting classes-da. Saanda pay nga ammo dagiti obligasionda iti klaseda. Ken adu a gamigam ti pagadalan ti paglalaglaganda a dadaelen.

Saanen a masdaaw no apay nga adda pay laeng di makabasa ken makasurat a makadandanon iti hayskul a yanna. Awan sabali a pabasolenna no di dayta mass promotion a programa ti Sistema.

Isu a saan latta payen a masdaaw a kasla aleng-aleng ti panagbasa dagiti ubbing. Pumasadanto lattan, piman.

Mapilitanda a mangipasa kadagitoy nga ubbing ta mass promotion ngarud. Pakaibabaan met ti pagadalan no adu ti ag-dropped. Wenno ma-retained.

Ti pay tuduenna a rason no apay a kasla di ikaskaso dagiti dadduma nga adalan ti panagbasada ket dayta pannaka-rate-da a mannursuro. Adu nga aspeto o kasano a makagun-odda iti nangato a rating kalpasan ti school year.

Maysa ditan ti resulta dagiti eksam. Ken gradoda iti kada grading period. Ti makadakes, addada sirib a maipakat tapno agparang a nangato ti maal-ala dagiti ubbing iti subject ti maysa a titser. A kayatna a sawen, epektibo a titser. Naawatanda ti insurona.

Napaliiwnan dayta a pagsiriban ti dadduma a kabaddungalanna. Iti ayat dagitoy a nangato ti resulta ti paeksamda, irebiuda kadagiti ubbing ti eksakto nga ipaeksamda. Agraman sungbat. Pagangayanna, dayta laengen agikabesa iti A, A, C, D, B… wenno True, True, False… ti ubraen dagiti adalan.

Saanen a kas idi panawen nga agbasbasa a sawen laeng ti titserda ti coverage ti eksam. Makaammodan nga agbasa ken agrebiu. Awan ti pamalpalatpatanda no ania dagiti rummuar a saludsod. Pagangayanna, naragsakda iti ania man a resulta ti eksamda.

Ta nagbannoganda! Ngem ita, mapangpangilangil, maisubon kadagiti ubbing ti eksamenda!

A mabalinna met ketdi nga ipannakkel nga iti kaaddana iti serbisio, dina pay insubo kadagiti nagbalin nga ubbingna dagiti impaeksamenna.

Sangkakunana kadagiti nagbalinen nga adalanna a didanto mauray nga iparebiuna ti eksamenna. Kayatna a pagbannoganda ti grado dagitoy. Uray kaipapanan ti nababa a resulta dagiti paeksamenna—ta ania ngarud ket saan metten nga ikankano ti kaaduan ti panagrepasoda.

Isu a di payen masmasdaaw no mangmangngegna a naestrikto la unay!

Prinsipio, kunkunana laeng iti panunotna.

Rag-o. Wen, uray kaskasano, makarikna met iti rag-o no kasta nga agleppas manen ti klase. Maragsakan la unay no makitana dagiti natudio nga adalan a tumapog iti sabali pay nga agpang ti edukasionda.

Dayta la unay pannakaragpat ti arapaap dagiti adalanda ti ragsakenda la unay. Uray kaskasano, pasetda kadayta a balligi. Saan a matukadan iti pirak ti ragsak nga umappayaw iti kas kenkuana no makitana a nagballiginton ti nagbalin nga ubingna iti naminsan.

Gapu itoy, uray ania dagiti masagsagangna a parikut, ituloyna latta a sipupudno ti kinaadipenna iti tisa. Adda maysa wenno dua a mapagbalinna nga ubing, umanayen kenkuana.

Itoy a panagturpos manen dagiti adalan, awan sabali a tarigagayna no di ti panagtuloydanto latta a mangragpat iti kalikagumda iti biag. Main-inutto koma metten a malinteg dagiti banag nga iti panagkunana, mangpapasuek iti kalidad ti edukasion.