sinursuran-banner-sqSinursuranNi Jobert M. Pacnis

SINURSURAN: Nakapilikan, kailian?

AGPAKATUROGKAYO!!!

Bugas ti post iti social media ti maysa nga am-ammotayo.

No saan nga utoben a nalaing, mabalin a kunaen a nalabit dagiti agbibideoke a di mangsursurot iti ordinansa ti kayatna a sawen. Limbesda man ngatan iti naituyang nga oras a panagkakantada. Awanen ti nakalagip nga agpatinggada laeng iti alas dies ti rabii.

Banag a mangmangted iti pannakariribuk kadagiti adda iti asideg!

Ngem no imutektekan a naimbag ti post, mautobtayo a saan gayam nga ordinario laeng ti rason ti adda iti likudan daytoy. Masimpuon gayam a maipanggep daytoy kadagiti agsasallupang a jingle dagiti kandidato.

Saan ngaminen nga ik-ikkan ti pateg ti dadduma a politiko ti kinaulimek koma ti aglawlaw kadagiti oras ti panaginana. Nagpipigsa dagiti jingle-da gapu iti kinasopistikado ti sound system nga us-usarenda. Nagdadakkelan nga ispiker ken trumpa ti nakamuntar kadagiti lugan a pagkampaniada.

Asino ngarud ita ti di mariribuk no kasayaat koma ti panagsiesta?

Mapalpaliiw ngarud a kadagiti kaaduan ti tao, kas koma iti plasa aglalo no dapon, awanen ti arindenggan. Agaabay dagiti agpatpatokar iti jingle kadagiti nadumaduma a mabalin a pagparkingan (a no maminsan, alaenda payen ti dalan) iti asideg.

Kasla kanayon nga adda konsierto kadagiti kalkalsada!

Saan payen a maaw-awatan ti lawlawaten dagiti jingle-da. Nakuriro kadagiti lapayag. Dakkel pay a perwisio iti panagsasarita dagiti aglaklako ken aggatgatang. Pamrayanda lattan ti agiinisem ken agkakatawa no kua. A mapabulonan iti libbi.

Malaksid itoy a kita ti polusion (noise pollution), saan met a mailaksid ti kinapudno a kasla manen krismas tri amin nga alad, kayo ken poste a madalanan iti kinaadu dagiti naibitin a campaign posters dagiti agngayangay a kandidato. Agdadata a kinapudno ti kaadda ti pagannurotan ti eleksion a mabalbalusingsing. Ngem no apay nga agtultuloy latta idinto nga ammo met dagiti kandidato dagitoy a pagalagadan.

Iti kanigid-kanawan a makitkita a panaglabsing, nga awan met ti maam-ammuantayo a madusdusa a kandidato, agparparang no ania ti pudpudno a ladawan iti likudan dagiti pangta ti maseknan nga ahensia. Agpatinggada laeng iti sao, awan ti makita a pannakaipakat ti ngipen ti linteg!

Kankanayon met ngarud ti panagballaag ti maseknan nga ahensia a kasuanda dagiti aglabsing. Masapulda kano ti tulong dagiti umili nga agreport kadagitoy a kita ti panaglabsing. Masapul kadi koma pay dayta? Aglikawda laeng uray apagbiit, makitadan ti kinapudno. Uray ket iti simple nga iseserrekda iti trabahoda wenno iti panagawidda, maimuttalen iti imatangda ti kinaadu dagiti kandidato nga aglablabsing iti panagkampaniada.

Ngem manon dagiti nasampolan a nadusa? Kuna ti COMELEC, masapul nga agdalan iti due process ti amin isu a saan a basta madusa lattan dagiti aglabsing. Gapuna a ditayo pay nakadamag kadagiti kandidato a nadusa a napaneknekan a nagbasol.

Daytoy ngata ti rason a dagiti maikaniwas nga aramid tunggal eleksion, kasla agus ti agpagugo a karayan ti kinasayudna a mapaspasamak?

Saan laeng a dagiti alad, kayo, ken poste dagitoy a pakaimatangan dagiti agsasanggala a campaign posters. Uray pay kadagiti pampubliko a lugar kas koma kadagiti kayo ken poste ti kuriente! Limbes pay iti naituyang a rukod dagiti tarpaulin-da.

Iti ili, saan payen a maitugotan a traysikel gayam ti masabat iti kaadu ti barenditas a naipalawlaw. Ti laengen sarming a batog ti mata ti drayber ti awan ti naipigket, naibitin a posters dagiti kandidato. Addada pay maikaykayab.

Makakatawaka payen a makasabat kadagitoy a lugan. A no kitaen a naimbag, mabalin a pagtaudan daytoy ti disgrasia iti dalan.

Sabagay, saanmo met a mapabasol dagitoy a drayber wenno akinkukua iti lugan. Siempre, iti rigat ti biag, nayon a pamastrekan met ti kaadda ti pakdaar dagiti kandidato iti luganda.

Ta agbayad met kadakuada dagitoy a kandidato!

Malaksid kadagiti miting de abanse a maang-angay tapno maibaskag dagitoy a politiko ti platapormada (no adda) a pangaremda dagiti botante, maysa pay nga istratehiada ti panamalaybalay. Madanonda uray kasulinekan a paset ti sakupda!

Madagdagullit a paliiw a no uray kasano kanumo ti pagtaengan, mairusokda ti sumrek ken makiinnabrasa. Kabulon daytoy ti nasam-it, nainkabsatan a panagis-isem ken pannakisarsaritada. Dumngegda kadagiti nadumaduma nga istoria dagiti umili. Ditanto metten nga ipanamnamada ti itutulongda inton maikkanda iti gundaway a mangituray.

Iti kinalatak ti social media, kinagat metten daytoy uray dagiti lokal a kandidato a kas istratehia a pangbanniitda kadagiti umili.

Pagdaksanna, nakaad-adu dagiti peke a maiposposte a mangpabpabanglo iti maysa nga agngayangay. Daytoy ti sipsiputan ti Facebook tapno di agramaram ti makunkuna a fake news. Kas umili, rebbengna laeng nga adalen, panunoten no agpaypayso met laeng dagiti lumablabas iti wall-na. Saan a basta patien lattan dagitoy. Kitaen ti namunganayan ti amin.

No saan nga agbalin a managarisit ti maysa a botante, dita a mabanniitan dagiti kandidato a sabali ti gagemna. Matdanto manen a mangkutkutim kadagiti ramayna nga agur-uray kadagiti kari a saan a pulos nga agmata!

Iti ibibisitak iti maysa a nasulinek a barangay iti kabangibangmi a probinsia, adda immay a kandidato iti kinakonsehal ti ili iti pagtaengan a nagdiretsuak. Makais-isemak man ta kalpasan a nayawatna kaniak ti apagkapat ti bondpaper a poster-na, inyawatannak a dagus iti sitsiria ti maysa (a naammuak nga estudiante idi agangay) kadagiti kabunggoyna.

Sitsiria? Sitsiria la itan ti katukad ti maysa a botos para kenkuana?

Napangilangilak laengen idi makalikud ti kandidato nga awan man laeng ti naibagana a platapormana. Nga uray pay gayam iti poster-na ket awan ti nadakamat. Nakalanad laeng ti naganna ken ti posision a pagtarayanna. Ipangrunak ti kalintegan dagiti agmulmula iti mais (a maysa kadagiti produktoda dita nga ili), uray kunana la koma.

Agraira latta met ti panaggatang iti botos. Apagtengnga pay laeng ti Abril, kastan ti aramid ti dadduma. Iparupada la unay a kasla kuarta laeng ti ammoda a napateg kadagiti botante. Iladawan daytoy ti kaawan ti respeto ti kandidato kadagiti umili.

Kadagitoy a mapaspasamak iti aglawlawtayo, agserbi koma iti tunggal maysa kadatayo a pagsarmingan no kasano a pilientayo manen dagiti mangituray kadatayo.

Arisiten a naimbag ti kinatao ti tunggal kandidato. Agsukisok no masapul. Saan a basta pilien ida gapu iti kuarta a naawat kadakuada, wenno iti kinasikatda iti gimong, wenno gapu ta inyendorso ida dagiti aydoltayo nga artista, wenno isuda ti kuna dagiti am-ammotayo.

Ti panagbotos, nakapatpateg nga akem ti maysa nga umili. Saan a magatadan daytoy iti uray kasano kadakkel a gatad. Aramaten ngarud daytoy a pribilehio ti tunggal maysa kadatayo a kas tulbek iti panagrang-ay ti lugar a paggargarawan.

Maysa laeng ti botostayo. Ngem nakapatpateg nga igam a mamagbaliw iti gimong a paggargarawantayo. Saan a rumbeng a pasisirap iti kuarta. Lagipen dagiti rigat a pasaren no saan a maikari dagiti nangitalkantayo iti botostayo.

Ta di ket matdatayo nga agbabbabawi iti udina!

No agpilika ngarud, agpili segun iti husto. No asino dagiti pudpudno nga adda iti nasin-aw a gagem nga agserbi kadatayo.

No nakapilika metten, repasuem manen ti listaam. Adda pay panawen a baliwan daytoy. Narigrigatton no nagsadutam ti nangrepaso ket rummuar dagiti rinuker a kandidato. Tallo manen a tawen a panagrigat ti bunga ti panagbiddut a nangpili kadagiti imbotostayo!

Isu nga agpanunotka, kailian! Saanmo a barengbarengen laeng ti botosmo. Nakapatpateg la unay daytoy uray maymaysa laeng ti katukadna!