sinursuran-banner-sqSinursuranNi Jobert M. Pacnis

SINURSURAN: Nakasaganaka kadin, Amboy?

HUNIO 3. Panagseserrekyo manen, Amboy. Saanmo koman a nayonan pay ti bakasionmo. Saanmon nga uliten ti inaramidmo itay napan a tawen. Maikatlon a lawas ti Hunio idi sumrekka. No apay a pinalugodandaka, a, a kasta dagiti dadakkelmo!

Awan met pay laeng ti regular a klase iti umuna a lawasna, dayta lattan ti nagsangsanggiranyo a rason. Ania pay, addada a dagus nalibtawam nga eksamen.

Masaludsodko ita, nakasaganaka kadi met laengen? Wenno adda pay laeng ti riknam iti panaglang-ay, iti panagpalpaliwa, ken iti ay-ayam wenno iti barkada?

Nagpardas ti dua a bulan a bakasion, saan kadi, Amboy? Kasla kaano laeng, kunada. Ita, adtoy manen ti kinapudno a masapul a sumrekkan iti pagadalan. Idiam manen ti panaglang-ay ken pannakiay-ayam. Sanguen ti biag ti maysa nga adalan. Rumbeng nga ad-adu ti panawenmo iti panagbasam ngem iti panaglang-ay.

Iti panagbakasionmo, adu la ketdi met ti natawingmo nga adal kadagiti nagbalin a padasmo. Padas iti nagpaspasiaram a disso. Sapay koma ta nagbalinka nga ahente ti kinamanagdaldalus kadagiti napnapanam.

Wenno kinatakneng.

Pagarigan, dagiti tourist spots a pinasiarmo. Sapay ta saanka a basta lattan nagiwara kadagiti basura. Wenno nagdadael kadagiti nadalanam. Ken panagbandalmo.

Ta idi pay nga insurodaka da nanang ken tatangmo iti naimbag nga aramid. A sinupusopan dagiti naanus ken mannakaawat a mannursurom.

Iti kada naglang-ayam, adal dagiti babassit nga aksidente a nalak-amam. Kas koma iti simple a pannakaitikleb. Iti ragsakmo siguro a nakakita iti kayaw ti lagoon, baybay, burayok wenno kueba a damom laeng a maimatangan, saanmon a napanunot dagiti mabalin a disgrasia a masagrapmo.

Adal met a di magatadan dayta rikna nga immapay kenka idi mingmingmingam ti nakangayngayed a nakaparsuaan a pinasiarmo. Simmangbay la ketdi dita puso ken panunotmo a masapul koma a mataginayon dagitoy a buya tapno addanto pay a makita ken pagnumaran ti sumarsaruno a henerasion.

Iti pannakiay-ayam kadagiti kabaddungalan, adu latta, ammok, Amboy, ti natawingmo nga adal. Panangawat iti pannakaabak iti ay-ayam, maysa a nabalitokan nga aramid. Ta saanka met a kanayon a mangabak iti ania man nga ay-ayam wenno salisal.

Ket idakdakkelmo koma dayta. Dimo tultuladen dagita makitkitam a nakiay-ayamda iti politika, ngem saanda a maaklon a naabakda. Nasaur wenno nasuitikda kano laeng. Masdaawak ngarud kadakuada no apay a linipatda metten ti nabalitokan nga aramidda idi kasda pay laeng kenka.

Igunamgunamko ngarud a dimto liplipatan, kadagiti masungad nga aldaw, ti mangaklon iti pannakaabak wenno pannakapaay kadagiti ania man a serken a banag wenno laban. Kasta laeng ti tayyek ti biag. Adda mangabak/agballigi. Adda met maabak/mapaay.

Ngem dina kayat a sawen nga iti pannakabaabak wenno pannakapaay, dita metten nga agngudo ti gagem nga agballigi. Rangtay ket koma daytoy nga ad-adda a mangitunda kenka iti naranga nga arapaapmo.

Saan kadi nga iti pay pannakigamulom kadagiti kabaddungalam, immirut ti panag-
lalangenyo. Imbilangyo la ngaruden nga agkakabsatkayo. Panagkakabsat a di rumbeng a maguped laeng iti awan kaes-eskanna a banag a masagang iti masanguanan.

Adal dayta a napateg iti panagbiag. Kunada ngarud a no man is an island. Nakapatpateg la unay ti panagkakabsat. Saanmo a magatadan ti ragsak nga ipaayna.

Ngem no apay nga iti agdama a panawen, mapugpugsat ti tali ti panaglalangen. Pinnadakes, apal ken politika. Dagita ti kangrunaan a rason no apay.

Iti aglawlawmo, kitaem, nagadu nga agkakabagian ti dinadael ti politika! Ken apal!

Ammok pay a medio simkad ti riknam idi maturtoranka a nangaywan iti/kadagiti addim. Ken no kasta pagdalusen ken paginnawennaka ni nanangmo.

Ammom kadi a dagitoy a babassit nga aramid/naipaaramid kenka ket dakkel met nga adal no usigen a naimbag?

Isagsaganadaka laeng iti biag a mabalin a masagangmo. Masapul ti anus ken kinagaget. Matay a simumulagat ti siaasino man a di agkuti wenno agsalukag.

Iti igagatangmo kadagiti kantina, naigunamgunam ti panagdaydayawmo. Gumatangak man, anti/angkel… kasta.

Kasta met no nataengan dagiti bisita iti balayyo. Naisuro kenka ti umno a panagdayaw.

Dagita a bambanag, adal a rumbeng nga itukitmo iti kinataom. Saan laeng nga iti pagadalan ti pakatawingam kadagiti adal a kayatmo. Kangrunaan ketdi a maannongam dagitoy kadagiti aginaldaw a padas ken aramidmo.

Kadagiti libro, wen, addada dita dagiti adal a serserkam iti inaldaw. Ngem saanda a magatadan dagiti adal a masursurom iti aglawlaw, padas ken aramidmo.

Ngem diak nga ibagbaga a saanmo gayam a masapul ti sumrek iti pagadalan tapno makaadalka.

Dakkel a biddut dayta. Masapul ti tunggal maysa kadatayo ti agadal. Aglalo ita ta sumnek ti rigat ti biag/panagbiag. Igammo daytoy a makibalubal iti biag.

No inayonmo ti masakdom iti aglawlaw, di kad nagsayaat a denggen no kunadanto kenka: dayta, a, adda adal ken sursurona!

Ammom ngamin, Amboy, adu ita ti nakaadal nga agpayso ngem awan ti sursurona. Nakangatngato pay, a, ti adalda. Ngem pulos nga awan ti sursuroda. Atiwda pay dagiti di nakastrek a pulos iti pagadalan.

Kayatmo ti kas kadakuada? Siempre, saan? Ngarud, masapul nga isaganam ti masakbayam.

Sumrekka iti pagadalan. Ipamaysam ti agbasa. Saanka nga agpatpatuleng.

Agsaganaka ngaruden. Adtoyen ti sabali pay nga agpang ti arapaapmo a pagbalinan a biag.

Iti panagsagana, saanna a kayat a sawen a masapul ti baro a kawes, bag, sapatos, ramit iti pagadalan ken gadget.

Namaterialan a banag dagita. Ad-adda laeng a dika makapokus iti panagbasam no adda dayta gadget a pampanunotem. Mabalin a makatulong kenka daytoy aglalo ita ta napegges metten ti taray ti edukasion. Ngem ad-adda a makaidagel kenka. Agawenna ti panawenmo nga agbasa koma.

Aglalo no saanmo nga ammo a lapdan ti bagim.

Ti panagsagana nga ibagbagak, isu dayta panangisaganam iti bagim, riknam ken panunotmo.

Masapul a nasalun-atka tapno awan sawsawir ti aginaldaw a panagbasam. Addaanka iti enerhia a mangagsep kadagiti amin a mayadal kenka. Isu nga ipategmo ti salun-atmo. Madagdagullit a di unay kadagiti tsitsiria, sopdrinks ken natataba. Ipangruna dagiti nateng ken prutas.

Ti riknam met, masapul nga addaanka iti puso a manangipateg. Ipategmo dagiti kaadalam, dagiti makapulapolmo iti pagadalan. Dagitoy ti makatulong kenka. No awan ti kaap-apam wenno karirim, nalag-an laeng ti taray ti panagadalmo.

A mangpalag-an met iti panunotmo ket ad-adda a maagsepmo ti ad-adalem!

O, ania, nakasaganaka ngaruden?

Sapay ta makitakanto, kaduam dagiti nagannak kenka, nga umuli iti entablado ‘ton aggibus ti klase.

Saan a makitaka kadagiti kalkalsada ta pinagsardengdakan a pinagbasa! Gapu iti kinalokom! Gudlak, Amboy!