sinursuran-banner-sqSinursuranNi Jobert M. Pacnis

Nangisit a Balitok (Maudi a paset)

Iti rimmuar nga isyu a libre dagiti darat a yawid ti kontraktor iti pagilianda, di manen patien dagiti umili. Dakkel la ketdi a kuarta ti naibayad kadagiti lider (manipud ngato agingga iti baba) tapno maiwayat daytoy.

Ang siste, ganyan na lang ba? kuna man dagiti umili. Saantayo a nayanak di kalman. Pera-pera ang usapan diyan!

Gapu itoy, adu ti nangbabalaw kadagiti agtugaw pay laeng nga opisial iti maseknan unay nga ili.

Ania pay, nabara a binnato ti napasamak ken mapaspasamak ita iti social media manipud kadagiti supporters ti agsumbangir (ti naabak ken nangabak) a partido.

Apay kano a nalipatanen ti kappili a lider ti inkarkarina idi sakbay ti panagpipili a labananna ti panagminas iti ilida. Ita ta agtugawen, addaytan dagiti mangdadael iti sibubukel nga ili.

Nga immingaran dagiti mangipatpateg kenkuana. Apay kano a pabasolenda idinto a saan pay a nakatugtugaw iti puestona?

Ti kano pudno nga adda iti likudan ti aktibidad, ti dati a mangtimtimon ti ili. Iti panawenna a naaprubaran ti papel ti kontraktor. Ngarud, isu ti mapabasol.

Ngem kuna manen dagiti dadduma, saan koman nga agpinnabasol pay. Ta no pudno man nga iti panawen ti dati a liderato ti pannakaaprobar ti panagminas/panagkurob iti daga, saan kadi a pasetda (ti baro a liderato) iti dayta a liderato?

Ken uray agsubsubli dagiti dadduma, idi panawen a katibok ti nasao manen nga aktibidad, pasetda idin ti mangririenda iti nasao nga ili.

Saan koman a rumbeng dayta a pinniltak. Nalpasen ti panagpipili. No pudno nga adda panangisakit iti ili ken kadagiti umili, aramiden ti umisu. Ipakita ti dia pananganamong iti nasao nga aramid.  

Dayta no saanda a mayanud iti agus!

Ta pagaammon nga adda bendision ti probinsia itoy ken dagiti lider iti dadduma pay nga ili a madalanan ti aktibidad.

No panunoten met ngamin, dakkel ti maitulongna kadagiti umili no maisubli iti dati a kinauneg ti karayan. Maliklikan ti naynay a pannakalayus. Saan a kanayon a madadael dagiti mula ken taraken a dingo dagiti umili.

Ngem saan a kumbinsido dagiti agindeg a direkta a maapektaran iti pannakakurob dagiti magnetite iti sabangan. Malaksid iti makitkitada a negatibo nga ibungana daytoy iti masakbayan, ita pay laeng, mariknan dagiti mangngalap ti epekto ti nasao nga aktibidad. Nadlawda a bumassit a bumassit ti makalkalapanda iti sabangan.

Kunada, nalabit a bunga daytan ti pannakakibur ti taeng dagiti ikan. Aglalo ket pagaammo nga addada dagiti ikan/lames a breeding ground-da ti pagsabtan ti danum-apgad ken danum-tamnay.

No kasta, mabalin nga urayto payen dagiti kinabaknang iti danum-tamnay (apaman a simrekdan iti karayan nga agkurob) kas iti kabibe, bennek ken ginukan ket maawanda. Karaman dagiti lames a pagnamnam-ayan met dagiti umili iti asideg ti karayan.

Mairamanto pay ngatan ti ludong nga iti laeng Karayan Cagayan ti pakasarakan maminsan iti makatawen?

Nalabit, kuna dagiti umili, a panagsagana payen daytoy nga aktibidad ti panagmatanto ti plano a maisubli iti Aparri ti pier iti probinsia. Ditoyton ti pagsangladan dagiti barko, saanen nga iti ili ti Sta. Ana a yan ita ti Cagayan Economic Zone Authority (CEZA).

Iti pakasaritaan ti probinsia, dati nga iti Aparri ti pagsangladan dagiti bangka ken bapor. Dakkel ti mapaspastrek ti probinsia itoy. Ngem naawan aminen dagitoy idi nayalis iti Sta. Ana.

Nupay paset ti probinsia ti Sta. Ana, awan ti sumsumrek iti kaban ti probinsia kadagiti pamastrekan idiay, no patien ti inkamkampania ti agdama nga ama dagiti Cagayano. Bukbukodan kano ti dakkel a politiko a nangipasngay iti CEZA.

Ita, no maisubli iti Aparri ti pagsangladan, dakkel ti mapastrek ti probinsia a mangsupusop kadagiti proyekto a pagimbagan dagiti agindegna.

Isu ngata pay a naaprobaran ti dredging!

Makita ita ti panagsusupanget ti kapanunotan dagiti umili. Tapno saanen a rumaba pay, agtimek koma met dagiti maseknan nga agtaltalinaed a nalulimek iti agdama. Ipariknada koma kadagiti umili ti kinapasetda. Nupay adda ti aktibidad, kitaenda a naimbag no maipatpatungpal ti adda iti napagsasaritaan. Awan ti sabali a mapaspasamak.

Ta iti udina, tunggal umili met laeng ti agsagrapto iti didigra no kaskasano. Saan nga urayen a pumudno dagiti komento iti FB! ●