Footer

SINURSURAN: Napudno a Lider ti Kasapulan (Maikadua a paset)

Iti laengen programa iti pagadalan, aglalo no kasta a panagtuturpos. Agduduma nga opisial ti barangay ken ili ti bisita malaksid pay kadagiti dadduma nga agkakangato a tattao iti gimong.

Maysa a kinapudno a mapaspasamak ti kinaatiddog unay ti programa iti panagturpos. Ta uray addan ‘tay kangrunaan a bisita (guest speaker) sakbay ti naituding nga oras, dinto pay laeng marugian ti programa gapu ta mabalin nga awan pay ni madaydayaw a kapitan, mayor, bokal wenno asino ditan nga opisiales. Mayurayda a kunam no asino a kangrunaan idinto nga adda metten ti guest speaker nga isu ti mangipaay iti mensahe kadagiti agturpos.

Apaman a marugian ti naladawen a programa, nakaad-adunto pay laeng a palpalikawna. Mangrugi iti panagkararag. Adda pay dagiti kasla mayintermision a kararag itan. Mano minuto ti ibusenna? Dagiti nagadu nga intermision a maiballaet? Sa kalpasan ti tunggal maysa, addanto pay la dayta parparaipus ti emcee a panangdayaw, bulbulataw kadagiti nagpabuya.

Maysa pay, rumbeng nga akem koma laeng ti salutatorian (ta isu ngarud ti naynay nga ag-welcome address) ti mangkablaaw kadagiti adda a nakatugaw iti presidential table. Ngem aminto nga adda pasetna iti dayta a programa, saan a dina kablaawan dagiti bisita.

Ti karigatan a pasetna, maikkan iti gundaway dagitoy a bisita iti gundaway nga agsao iti sango. Kaaduanna pay met ngarud kadakuada ti aggagatel a makaiggem iti mikropono. Pagangayanna, saanton a malagip dagiti agturpos ti sinasao ti guest-da.

Isu a kaaduanna, ti nasurok a maysa oras la koma a programa, abotenna iti tallo agingga iti uppat! Mano nga oras ti nasayang no kasta?

Maminpinsan koman a maikkat ti Filipino time. Daytoy ti mangpagpaginad ti panagdur-as ti pagilian. No mapalugodan daytoy iti kabassitan a paspasamak, saan ngarud a karkardayo a pagtuladan dagiti ubbing ket ad-adda a rumukbos daytoy nasaon a naglaad nga ugalitayo.

Isu nga iti training iti Cauayan City, no ania ti oras a naituding a rugi ken ngudo dagiti aktibidad, isu ti natungpal. Kayat ngamin ni Dr. Saceda nga ipakita kadagiti timmabuno a no kayat ti maysa a banag, maaramid wenno mabaliwan uray isu payen ti nakairuaman.

Agserbi saan a paserbian, saan a manggundaway– dagita koma pay ti adda iti maysa a lider.

Ngem adda maysa nga istoria a mangipakita no kasano ken asino dagiti kaaduan a lidertayo.

Nagbiahe kano ni Sen. Juan dela Cruz tapno makipagkita iti maysa a senador a gayyemna iti sabali a pagilian.

Idi addan iti balay ti gayyemna, permi nga apal ken siddaawna kadagiti nakitana. Nagpipintas dagiti muebles, nakalupkopan iti balitok dagiti agdan, pinggan, chandelier, ken arig amin nga alikamen iti balay.

“Pudno a nabaknangka, gayyem. Nagpintas ti balaymo,” indayaw ni Sen. dela Cruz.

“Umayka,” kuna ketdi ti gayyemna a senador. “Tuman-awka ditoy tawa… Makitam dagita a rangtay?” intudona ti masanguananda.

“Sadino?” masmasdaaw ni Sen. dela Cruz.

“Dayta!”

“Adu met ti rangtay a matantannawagak…”

“Amin dagita… dagita ti naggapuan ti makitkitam ditoy balay. Ten percent ti kukuak kadagita.”

Kalpasan ti makatawen, inawis ni Sen. dela Cruz ti gayyemna a senador. Permi a siddaaw daytoy idi makalaem iti balay ni Sen. dela Cruz.

Diamond ti arig naikalupkop kadagiti gamigam iti uneg ti balay.

“Napimpintas nga amang ti balaymo ngem siak,” indayaw ti bisita ni Sen. dela Cruz. “Kasano a napaaddam dagitoy ket no awanda met pay itay napalabas a tawen?”

“Umayka,” kinuna ni Sen. dela Cruz, “tuman-awka iti tawa… Makitam dagiti adu a rangtay iti masanguananta?”

Bininsir ti bisita a senador ti itudtudo ni Sen. dela Cruz. Ngem awan ta awan met ti makitana a rangtay uray maysa laeng koma.

“Awan makitak, gayyem…”

“Pudno, awan makitam ta siento porsiento ti bagik kadagita a rangtay… Isu ita dagiti makitkitam ditoy uneg ti balayko.”

Nagkas-ang a panunoten a kastoy ti klase dagiti lidertayo. Ngem pudno man met a mapaspasamak. Isu nga awan latta ti dur-asantayo. Kinapudnona, iti panagadal, rumrummuar a nauditayon iti tallopulo a tawen iti sistema ti edukasiontayo. Ket daytoy ita ti kayat a litupan ti agdama itan a maipatpatungpal a K to 12. Mangnamnama dagiti adda iti likudan daytoy a makakamakam met laeng ti pagilian babaen ti pannakaparnuayna kadagiti produktibo nga umili nga agbalin a napudpudno a lider.

Sapay koma ngarud ta agmata daytoy a panggep.#.