Footer

SINURSURAN: Napudno a Lider ti Kasapulan (Umuna a paset)

MAYSA nga estoria ti diak malipatan. Adda grupo dagiti billit nga agdaldaliasat iti minilmilia tapno laeng agbiagda wenno agbirok iti pagpalamiisanda no kasta a nadagaang unayen iti yanda. Migratory birds, kunada.

Iti panagdaliasatda iti tangatang, agpormada a kasla V. Maysa ti mangidaulo kadakuada. Ngem saannna a kayat a sawen nga isu nga agnanayon. No agparikut, wenno agkapsut, ket agpalikud. Sublaten ti sumaruno kenkuana ti panangidaulo.

Ta apay a porma-V ti panagtayabda?

Adda gayam sientipiko a rason daytoy. Kunak idi no kasla agliliniada laeng. Ngem saan.

Iti panagpormada a kasla “V”, agtitinnulongda nga agdaliasat a nalaglag-an ngem iti gagangay a panagtayabda. Iti dayta a posision, ti maikub-ay nga angin ti maysa, kasla isu ti mangtapaya iti adda iti masanguananna. Iti kasta, saan a kasla sulnoten ti daga ket naannayas ti panagtayabda.

Ipakita daytoy ti talugading ti maysa a napudno a lider, ti maysa a gimong nga agturong iti nasaysayaat a panagbiag.

Tunggal maysa, uray no ordinario laeng iti grupo, dakkel ti maitulongna iti naannayas a pannagna ti amin. Saan a gapu ta lider wenno maysa a dadaullo/lider, dina kayat a sawen a bukodanna aminen a trabaho, desision ken pagsayaatan.

Kas maysa a napudno a lider, ammona ti dumngeg kadagiti kameng, ti mangiturong iti organisasion, ili, wenno ti pagilian.

Kaano ngamin, aya, a tubayen ita dagiti ubbing iti anag ti napudpudno a lider?

Ita kanon ta naganusda pay, kas kuna ni Doktor Dave Saceda ti Saceda Youth Lead (SYL)– maysa a grupo a nakabase iti siudad ti Dumaguete a mangsansanay kadagiti lider iti pagadalan tapno agbalinda a produktibo a makipagili iti masakbayan. Sangapulo ket walo a tawenen daytoy a grupo.

Pagaammotayo a kadagitoy a panawen, dagiti lider ti SK wenno Sangguniang Kabataan ket in-inut metten a matibnokan iti narugit nga ay-ayam iti politika. No di annak dagiti politiko ida, awan ti ammoda iti panangidaulo. Isuda dagiti imbaon laeng dagiti nagannak kadakuada ta masapul a sanayenda dagiti bagbagida para iti posibilidad a tawidendanto ti kinapolitiko, ti kinalider dagiti nagannakda.

Iti panagsanay nga inwayat ti SYL itay nabiit iti Cauayan City National High School, nasurok a dua gasut a lider ti SSG (Supreme Student Government) ken SPG (Supreme Pupil Government) ken adbayserda ti dimmar-ay.

Naisuro kadagiti ubbing ti umno a galad ti maysa a napudpudno a lider. Kangrunaan ditoy ti panangdengngegna iti kapanunotan ti tunggal maysa kadagiti iturayanna. Masapul nga ammona pay ti makunkuna a basic parliamentary procedure.

Ngem no kitaentayo iti agdama a mapaspasamak, kaaduan a di masursurot daytoy.

Iti laengen miting iti barangay, kaaduan kadagiti lider, agturay ti di mangipakpakat iti parliamentary procedure no kasta nga agpamitingda wenno adda mapagpapatangan nga isyu. Ti nakakaldaang pay no maminsan, isuda lattan ti agpapatang a di maipakaammo iti publiko aglalo no adda pakainaiganna iti kuarta. Wenno saan, agbalin lattan a linteg wenno naanamonganen ti napagpapatangan nga isyu uray pay no awan iti korum kabayatan ti panagsasarita. Isu ket isuda lattan.

No met adda sumngay nga isusupring, kas pangarigan iti assembly meeting, saan nga ammo dagiti lider no kasano a timonen daytoy. Agingga nga agpipinnukkawton dagiti tao.

Ti pay lider, kas kuna ni Dr. Saceda, masapul a time conscious. Wenno ammona ti kinapateg ti oras. Ti oras a napagpapatangan, masapul a matungpal tapno iti kasta, maestablisar iti gimong nga addaan iti maymaysa a sarita.

Yanna manen nga adat, uray iti mismo a miting dagiti SSG/SPG, saan a masursurot ti oras a patangan. Pagarigan, alas otso ti miting– a di met matungtungpal. Filipino time, kas kunada. Banag a naglaad nga ugalitayo.

(Adda tuloyna)